ବେଙ୍ଗାଲୁରୁ,୧୭।୭:ବେଙ୍ଗାଲୁରୁରେ ଆଇପିଏଲ ଦଳ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁର ବିଜୟ ଉତ୍ସବ ସମୟରେ ଦଳାଚକଟା ସମ୍ପର୍କରେ କର୍ନାଟକ ସରକାର ହାଇକୋର୍ଟରେ ଏକ ବିସ୍ତୃତ ରିପୋର୍ଟ ଦାଖଲ କରିଛନ୍ତି। ଏହି ରିପୋର୍ଟରେ ସରକାର ଦଳାଚକଟା ପାଇଁ ଆରସିବିକୁ ସମ୍ପୂର୍ଣ୍ଣ ଦାୟୀ କରିଛନ୍ତି। ଏଥିରେ ଦଳର ଅଭିଜ୍ଞ ଖେଳାଳି ଏବଂ ପୂର୍ବତନ ଅଧିନାୟକ ବିରାଟ କୋହଲିଙ୍କ ନାମ ମଧ୍ୟ ଉଲ୍ଲେଖ କରାଯାଇଛି। କର୍ନାଟକ ସରକାର କହିଛନ୍ତି ଯେ ବିଜୟ ଉତ୍ସବ ପାଇଁ ଆରସିବି ଅନୁମତି ନେଇ ନ ଥିଲା, ଏହା କେବଳ ସୂଚନା ଦେଇଥିଲା।
ରିପୋର୍ଟରେ ଗୁରୁତର ଅବହେଳା ଉଲ୍ଲେଖ କରାଯାଇଛି। ଜୁନ ୪ ତାରିଖରେ ଚିନ୍ନାସ୍ବାମୀ ଷ୍ଟାଡିୟମ ବାହାରେ ଦଳାଚକଟା ପାଇଁ କେନ୍ଦ୍ରୀୟ ପ୍ରଶାସନିକ ଟ୍ରିବ୍ୟୁନାଲ ଆରସିବିକୁ ଦାୟୀ କରିଥିଲେ। ଆରସିବି ହଠାତ୍ ପୋଲିସ ଅନୁମତି ବିନା ସୋସିଆଲ ମିଡିଆରେ ବିଜୟ ପରେଡ ଆୟୋଜନ କରିବାକୁ ଘୋଷଣା କରିଥିଲା, ଯାହା ଯୋଗୁ ଲକ୍ଷ ଲକ୍ଷ ଲୋକ ଷ୍ଟାଡିୟମ ବାହାରେ ଜମା ହୋଇଥିଲେ। ଦଳାଚକଟା ସମୟରେ ୧୧ ଜଣଙ୍କ ଜୀବନ ଯାଇଥିଲା।
କର୍ନାଟକ ସରକାର ରିପୋର୍ଟ ମାଧ୍ୟମରେ କହିଛନ୍ତି ଯେ, ବିଜୟ ପରେଡ ସମୟରେ ବହୁତ ଅବହେଳା ହୋଇଥିଲା ଏବଂ କୌଣସି ଉପଯୁକ୍ତ ବ୍ୟବସ୍ଥା ନ ଥିଲା। କାର୍ଯ୍ୟକ୍ରମ ଆୟୋଜନ କରିଥିବା କମ୍ପାନୀ ଡିଏନଏ ନେଟୱାର୍କ ପ୍ରାଇଭେଟ ଲିମିଟେଡ କେବଳ ଜୁନ ୩ ତାରିଖରେ ପୋଲିସକୁ ସୂଚନା ଦେଇଥିଲା, କିନ୍ତୁ ୨୦୦୯ ନିର୍ଦ୍ଦେଶ ଅନୁଯାୟୀ ଅନୁମତି ନେଇନଥିଲା। କୌଣସି ପ୍ରକାରର ଘଟଣା ଏଡାଇବା ପାଇଁ ପୋଲିସ ସୀମିତ କାର୍ଯ୍ୟକ୍ରମ ପାଇଁ ଅନୁମତି ଦେଇଥିଲା, କିନ୍ତୁ ଆଶାଠାରୁ ଅଧିକ ଲୋକ କାର୍ଯ୍ୟକ୍ରମରେ ପହଞ୍ଚିଥିଲେ।
କୋହଲି ଦଳର ଜଣେ ଅଭିଜ୍ଞ ଖେଳାଳି ଏବଂ ସେ ଆରସିବିର ଚେହେରା ମଧ୍ୟ। ସରକାର ହାଇକୋର୍ଟରେ ଦାଖଲ କରିଥିବା ରିପୋର୍ଟରେ କୋହଲିଙ୍କ ନାମ ଉଲ୍ଲେଖ କରାଯାଇଛି। ସରକାର କହିଛନ୍ତି ଯେ, ଆରସିବି ସାର୍ବଜନୀନ କାର୍ଯ୍ୟକ୍ରମର ପ୍ରଚାର ପାଇଁ ଜୁନ ୪ ତାରିଖରେ ସୋସିଆଲ ମିଡିଆରେ ବିରାଟ କୋହଲିଙ୍କ ଏକ ଭିଡିଓ ଶେୟାର କରିଥିଲା। କୋହଲି ଭିଡିଓ ମାଧ୍ୟମରେ ପ୍ରଶଂସକମାନଙ୍କୁ କାର୍ଯ୍ୟକ୍ରମରେ ମାଗଣାରେ ଯୋଗଦେବାକୁ ଅନୁରୋଧ କରିଥିଲେ।
