ଆବୁଧାବି, ୨୩।୯: ଡିଫେଣ୍ଡିଂ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସର ନିଦ ହଜାଇ ଦେଇଛି କୋଲକାତା ନାଇଟ୍ ରାଇଡର୍ସ (କେକେଆର୍)। ଆବୁଧାବି ଗ୍ରାଉଣ୍ଡରେ ମୁମ୍ବାଇ ପକ୍ଷରୁ ଧାର୍ଯ୍ୟ ୧୫୬ ରନ୍ର ବିଜୟ ଲକ୍ଷ୍ୟକୁ ଅତିସହଜରେ ୧୫.୧ ଓଭରରେ ୩ ଉଇକେଟରେ ହରାଇ ହାସଲ କରି ନେଇଛି।
ବୃହତ୍ ବିଜୟ ଯୋଗୁ ଚଳିତ ଆଇପିଏଲରେ ପ୍ରଥମ ଥର ପାଇଁ ଟପ୍ ୪ରେ ପ୍ରବେଶ କରିଛି କେକେଆର୍। ଅନ୍ୟପକ୍ଷରେ ମୁମ୍ବାଇର ଅଧିନାୟକ ରୋହିତ ଶର୍ମାଙ୍କ ପାଇଁ ସମସ୍ୟା ବଢ଼ିଯାଇଛି। ଏବେ ଦଳ ପାଖରେ ୮ ପଏଣ୍ଟ ଥିବା ବେଳେ ଆଗକୁ ଆହୁରି ୫ ମ୍ୟାଚ୍ ଖେଳିବାକୁ ଅଛି। ଏଣୁ କ୍ୱାଲିଫାୟର୍ସ ଲାଗି ଯୋଗ୍ୟତା ଅର୍ଜନ କରିବାକୁ ହେଲେ ମୁମ୍ବାଇକୁ ଅତିକମ୍ରେ ୪ଟି ବିଜୟ ଦରକାର।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ମୁମ୍ବାଇକୁ ୭୮ ରନ୍ର ଭଲ ଆରମ୍ଭ ଦେଇଥିଲେ ଅଧିନାୟକ ରୋହିତ ଶର୍ମା (୩୩ ରନ୍, ୪ ଚୌକା) ଓ କୁଇଣ୍ଟନ ଡି’ କକ୍ (୫୫ ରନ୍, ୪ ଚୌକା ଓ ୩ ଛକା)। ଦୁଇ ସେଟ୍ ବ୍ୟାଟ୍ସମ୍ୟାନ ଆଉଟ୍ ହେବା ପରେ କେକେଆର ବୋଲରମାନେ ପୂରା ପ୍ରଭାବ ବିସ୍ତାର କରିଥିଲେ। ଲଗାତାର ଉଇକେଟ ହରାଇବାରୁ ମୁମ୍ବାଇ ଧାର୍ଯ୍ୟ ୨୦ ଓଭରରେ ୬ ଉଇକେଟ ହରାଇ ୧୫୫ ରନ୍ କରିବାକୁ ସକ୍ଷମ ହୋଇଥିଲା। ପ୍ରସିଦ୍ଧ କ୍ରିଷ୍ଣା ଓ ଲୋକି ଫର୍ଗୁସନ ୨ ଲେଖାଏ ଉଇକେଟ ନେଇଥିଲେ।
ଜବାବରେ ଟ୍ରେଣ୍ଟ ବୋଲ୍ଟ, ଯଶପ୍ରୀତ ବୁମରା ଓ ଆଡାମ ମିଲନେଙ୍କ ଭଳି ବୋଲରଙ୍କୁ ନିର୍ଘାତ ପ୍ରହାର କରିଥିଲେ ଭେଙ୍କଟେଶ ଆୟର। ୩୦ ବଲରେ ସେ ଖେଳିଥିଲେ ୫୩ ରନ୍ର ପାଳି। ତାଙ୍କ ଇନିଂସରେ ସାମିଲ ଥିଲା ୪ ଚୌକା ଓ ୩ ଛକା। ଆୟରଙ୍କ ଭଳି ବିସ୍ଫୋରକ ୭୪ (୮ ଚୌକା ଓ ୩ ଛକା) ରନ୍ର ଅପରାଜିତ ପାଳି ଖେଳିଥିଲେ ରାହୁଲ ତ୍ରିପାଠି। ଫଳରେ ୧୫.୧ ଓଭରରେ ୩ ଉଇକେଟ ହରାଇ ୧୫୯ ରନ୍ ମ୍ୟାଚ୍ ଜିତି ନେଇଥିଲା କେକେଆର୍।
