ରାଇଘର/ନବରଙ୍ଗପୁର, ୨୬।୧୧ (କିରଣ ପଟ୍ଟନାୟକ/ସଦାଶିବ ପ୍ରହରାଜ): ପ୍ରେମିକାଙ୍କୁ ହତ୍ୟା କରି ୩୧ ଖଣ୍ଡ କରିବା ଅଭିଯୋଗରେ ଅଟକ ଥିବା ନବରଙ୍ଗପୁର ଜିଲା ରାଇଘର ବ୍ଲକ ଗୋନା ପଞ୍ଚାୟତ ମୁରୁମଡିହି ଗ୍ରାମର ପ୍ରେମିକ ଚନ୍ଦ୍ର ରାଉତ ଓ ତାଙ୍କ ସ୍ତ୍ରୀ ସିଆଙ୍କୁ ରବିବାର ଗିରଫ ପରେ କୋର୍ଟ ଚାଲାଣ କରାଯାଇଛି। କୋର୍ଟରେ ଜାମିନ ମଞ୍ଜୁର ନ ହେବାରୁ ଉଭୟଙ୍କୁ ବିଚାରାଧୀନ ହାଜତକୁ ପଠାଇ ଦିଆଯାଇଛି। ସିଆଙ୍କ ସହ ତାଙ୍କ ଅଢ଼େଇ ବର୍ଷର ପୁଅ ରହିବ ବୋଲି ଜଣାପଡ଼ିଛି। ମୃତ ତିଲାବାଈଙ୍କ ପରିବାର ଓ ବାଘବେଡ଼ା ଗ୍ରାମବାସୀ ରବିବାର ଥାନା ପରିସରରେ ପଶିଥିଲେ। ଅଭିଯୁକ୍ତଙ୍କୁ ଫାଶୀ ଦିଆଯାଉ ବୋଲି କହି ହଟ୍ଟଗୋଳ କରିଥିଲେ। ସେଠାରେ ଉତ୍ତେଜନା ଦେଖିବାକୁ ମିଳିଥିଲା। ପୋଲିସ ବୁଝାଶୁଝା କରି ସେମାନଙ୍କୁ ପଠାଇଥିଲା। ଥାନାରେ ଏକ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି।
ସୂଚନା ଯୋଗ୍ୟ, ବାଘବେଡ଼ା ଗ୍ରାମର ତିଲାବାଈ ଗଣ୍ଡଙ୍କର ଚନ୍ଦ୍ର ରାଉତଙ୍କ ସହ ୨ବର୍ଷ ଧରି ପ୍ରେମ ସମ୍ପର୍କ ଥିଲା। ତିଲାବାଈ ବୁଧବାର ଘରୁ ବାହାରି ସ୍ତ୍ରୀର ଅଧିକାର ମାଗିବାକୁ ଚନ୍ଦ୍ରଙ୍କ ପାଖକୁ ଯାଇଥିଲେ। ଏହାପରେ ଚନ୍ଦ୍ର ଓ ତାଙ୍କ ସ୍ତ୍ରୀ ସିଆ ତିଲାବାଈଙ୍କୁ ହତ୍ୟା କରିଥିଲେ। ପ୍ରମାଣ ନଷ୍ଟ କରିବାକୁ ଉଭୟେ ତିଲାଙ୍କ ମୃତଦେହକୁ କଟୁରିରେ ୩୧ ଖଣ୍ଡ କରି ନିକଟସ୍ଥ ଜଙ୍ଗଲରେ ପୋତିଦେଇଥିଲେ। ଏକ କାର୍ଟୁନରେ ପୋଷାକ ରଖି ନିଆଁ ଲଗାଇ ଦେଇଥିଲେ। ମୃତଦେହ ଖଣ୍ଡକୁ ଅଖାରେ ଭର୍ତ୍ତିକରି ଜଙ୍ଗଲକୁ ନେଇଥିଲେ। ତାହାକୁ ଲୁଣ ପକାଇ ପୋତିଦେଇଥିଲେ। ଶନିବାର ରକ୍ତଛିଟା ଦେଖି କେତେଜଣ ଯୁବକ ତିଲାବାଈଙ୍କ ପରିବାରକୁ ଖବର ଦେଇଥିଲେ। ତିଲାବାଈଙ୍କ ବାପା ରାଇଘର ପୋଲିସକୁ ଜଣାଇଥିଲେ। ସ୍ଥାନୀୟ ପୋଲିସ ଓ ସାଇଣ୍ଟିଫିକ୍ ଟିମ୍ ପହଞ୍ଚି ମାଟି ଖୋଳି ମୃତଦେହ ଜବତ କରିଥିଲେ। ବ୍ୟବଚ୍ଛେଦ କରାଇ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଉତ୍ତ୍ୟକ୍ତ ଗ୍ରାମବାସୀ ମୃତଦେହକୁ ଶନିବାର ରାତିରେ ଅଭିଯୁକ୍ତ ଚନ୍ଦ୍ରଙ୍କ ଘର ଅଗଣାରେ ସତ୍କାର କରିଥିଲେ।
