ଜଗନ୍ନାଥପ୍ରସାଦ,୧୨।୧(ଡି.ଏନ.ଏ.): ଗଞ୍ଜାମ ଜିଲା ଜଗନ୍ନାଥପ୍ରସାଦ ଥାନା ଭୂଷଣ୍ଡପାଳ ଛକ ନିକଟ ଧାନବିଲରୁ ଗତ ଡିସେମ୍ବର ୨ରେ ଯୁବତୀଙ୍କ ମୃତଦେହ ଜବତ ଘଟଣାର ପର୍ଦ୍ଦାଫାଶ ହୋଇଛି। ମୃତ ଯୁବତୀ ଜଣକ ହେଲେ ବାଲେଶ୍ୱର ସଦର ଥାନା ଅନ୍ତର୍ଗତ ମାହାନା ଗ୍ରାମର ପୂଜା ସେଠୀ। ୫ ବର୍ଷ ହେଲା ପୂଜା ଭୁବନେଶ୍ୱରର ଖଣ୍ଡଗିରି ଅଞ୍ଚଳରେ ରହୁଥିବା ମାନସ ରଞ୍ଜନ ପାଇକରାୟଙ୍କ ଘରେ ସହାୟିକା ଭାବେ କାମ କରୁଥିଲେ। ଆଉ କାମ କରିବେନି ବୋଲି ସେ ବାରମ୍ବାର କହୁଥିଲେ ମଧ୍ୟ ମାନସ ଓ ସ୍ତ୍ରୀ ସରୋଜିନୀ ତାଙ୍କୁ ଛାଡ଼ୁ ନ ଥିଲେ। ଏହାକୁ ନେଇ ଦମ୍ପତି ଓ ପୂଜାଙ୍କ ମଧ୍ୟରେ ସବୁବେଳେ ଯୁକ୍ତିତର୍କ ହେଉଥିଲା। ଗତ ଡିସେମ୍ବର ୧ ସନ୍ଧ୍ୟାରେ ଏହା ଉଗ୍ରରୂପ ନେଇଥିଲା। ପୂଜା ଘର ଛାଡ଼ି ପଳାଇବେ ବୋଲି ଜିଦ୍ ଧରିବାରୁ ଦମ୍ପତି ତାଙ୍କୁ ମାଡ଼ମାରି ତଣ୍ଟି ଚିପି ଦେଇଥିଲେ। ଫଳରେ ଘଟଣାସ୍ଥଳରେ ପୂଜାଙ୍କ ମୃତ୍ୟୁ ଘଟିଥିଲା। ପରେ ଦମ୍ପତି ରାତି ପ୍ରାୟ ୧୦ଟାରେ ମୃତଦେହକୁ ଏକ ଓଲା କାର୍(ନଂ ଓଡ଼ି୩୩ ଏମ୩୦୧୪)ରେ ଅନ୍ୟତ୍ର ଫୋପାଡ଼ିବାକୁ ନେଇଥିଲେ। ଜାଗା ଖୋଜିଖୋଜି ସେମାନେ ଭୁବନେଶ୍ୱରରୁ ୧୫୦ କି.ମି. ଦୂର ଆସି ଭୂଷଣ୍ଡପାଳ ଛକ ନିକଟ ଧାନ ବିଲରେ ମୃତଦେହ ପକାଇ ଚାଲିଯାଇଥିଲେ। ଅଭିଯୁକ୍ତ ଦମ୍ପତି ମାନସ ଓ ସରୋଜିନୀଙ୍କୁ ସୋମବାର ଜଗନ୍ନାଥପ୍ରସାଦ ପୋଲିସ ଗିରଫ କରି କୋର୍ଟଚାଲାଣ କରିଛି। ଏହି ଘଟଣାରେ ସମ୍ପୃକ୍ତ ଅନ୍ୟ ଅଭିଯୁକ୍ତମାନଙ୍କୁ ଖୁବଶୀଘ୍ର ଗିରଫ କରାଯିବ ବୋଲି ଖବରଦାତା ସମ୍ମିଳନୀରେ ଗଞ୍ଜାମ ଏସ୍ପି ବ୍ରିଜେଶ କୁମାର ରଏ ସୂଚନା ଦେଇଛନ୍ତି।
ଏସ୍ପି ଆହୁରି କହିଛନ୍ତି, ପୂଜାଙ୍କ ମୃତଦେହରେ କୌଣସି କ୍ଷତ ଚିହ୍ନ ନ ଥିଲା। ପାଟି ଓ ନାକରୁ ରକ୍ତ ବାହାରିଥିବାରୁ ଏହା ଏକ ହତ୍ୟାକାଣ୍ଡ ବୋଲି ସନ୍ଦେହ କରାଯାଇଥିଲା। ଜଗନ୍ନାଥପ୍ରସାଦ ଥାନାରେ ଏ ନେଇ ଆଇପିସି ଦଫା ୩୦୨/୨୦୧ ଅନୁଯାୟୀ ମାମଲା (ନଂ.୨୮୪/୨୨୦) ରୁଜୁ କରି ତଦନ୍ତ ଆରମ୍ଭ ହୋଇଥିଲା। ମୃତଦେହ ଚିହ୍ନଟ ପାଇଁ ଭଞ୍ଜନଗର ମେଡିକାଲରେ ୭୨ଘଣ୍ଟା ପର୍ଯ୍ୟନ୍ତ ରଖାଯାଇଥିଲା। ତଥାପି ଚିହ୍ନଟ ହୋଇ ନ ପାରିବାରୁ ୫ଟି ପୋଲିସ ଟିମ୍ ଗଠନ କରାଯାଇ ବିଭିନ୍ନ ଥାନା ଅଞ୍ଚଳକୁ ପଠାଯାଇଥିଲା। ଜଗନ୍ନାଥପ୍ରସାଦ ଥାନା ଅଧିକାରୀ ଦିଲୀପ କୁମାର ସ୍ବାଇଁ ଏହାର ତଦାରଖ କରୁଥିଲେ। ପୋଲିସ ଟିମ୍ ବିଭିନ୍ନ ସମୟରେ ଭୁବନେଶ୍ୱର, ଖୋର୍ଦ୍ଧା, ନୟାଗଡ଼, ବାଲେଶ୍ୱର, ପୁରୀ, କନ୍ଧମାଳ, ରାୟଗଡା, କୋରାପୁଟ ଜିଲାର ପ୍ରାୟ ୧୦୦ ଥାନାକୁ ଯାଇ ମୃତ ଯୁବତୀଙ୍କ ଫଟୋ ଦେଖାଇ ଚିହ୍ନଟ କରିବାକୁ ଚେଷ୍ଟା କରିଥିଲେ। ଏପରିକି ପୋଲିସର ହ୍ବାଟ୍ସଆପ୍ ଗ୍ରୁପ୍ରେ ମଧ୍ୟ ଫଟୋ ସେୟାର କରାଯାଇଥିଲା। ବିଭିନ୍ନ ଅଞ୍ଚଳରୁ କେତେଜଣଙ୍କୁ ସନ୍ଦେହରେ ଉଠାଇ ପଚରାଉଚୁରା ହୋଇଥିଲା। ବାଲେଶ୍ୱର ଅଞ୍ଚଳର ଜଣେ ବ୍ୟକ୍ତି ମୃତା ଯୁବତୀଙ୍କୁ ଚିହ୍ନଟ କରିଥିଲେ। ପୂଜାଙ୍କ ବାପା ଫଟୋ ଦେଖି ଝିଅକୁ ଚିହ୍ନଟ କରିଥିଲେ। ଭୁବନେଶ୍ୱରରେ ଜଣେ ବାବୁଙ୍କ ଘରେ ଝିଅ ରହୁଥିବା ଓ ତାଙ୍କୁ ସେ ଚିହ୍ନି ନ ଥିବା ବାପା କହିଥିଲେ। ପରେ ପୋଲିସ ଟିମ ବାରମ୍ବାର ଭୁବନେଶ୍ୱରକୁ ଯାଇ ତଦନ୍ତ କରିବା ପରେ ଅଭିଯୁକ୍ତ ଦମ୍ପତିଙ୍କୁ ଧରିବାରେ ସକ୍ଷମ ହୋଇଥିଲା। ଅଭିଯୁକ୍ତ ମାନସଙ୍କ ଘର ନୟାଗଡ଼ ଜିଲାର ଫତେଗଡ଼ ଥାନା ଅନ୍ତର୍ଗତ ପଥରପୁଞ୍ଜି ଗ୍ରାମ ଓ ସରୋଜିନୀଙ୍କ ଘର କଟକ ଜିଲାର ବୈଦେଶ୍ୱର ଥାନା ଅନ୍ତର୍ଗତ କଳାପଥର ଗ୍ରାମରେ ବୋଲି ଜେରା ବେଳେ ଜଣାପଡ଼ିଛି। ଜଗନ୍ନାଥପ୍ରସାଦ ପୋଲିସର ଏଭଳି ସଫଳତା ପାଇଁ ଏସ୍ପି ୧୦୦୦ଟଙ୍କା ପୁରସ୍କାର ପ୍ରଦାନ କରିଛନ୍ତି।
