ଦଶମନ୍ତପୁର, ୧୭।୧୨( ଅରବିନ୍ଦ ନାୟକ ): କୋରାପୁଟ ଜିଲା ଦଶମନ୍ତପୁର ବ୍ଲକ ଡୁମ୍ବାଗୁଡ଼ା ପଞ୍ଚାୟତ ପଦାବାଗ୍ରୀ ଗ୍ରାମରେ ଜଣେ ବୃଦ୍ଧଙ୍କୁ ଟାଙ୍ଗିଆରେ ହାଣି ହତ୍ୟା କରାଯାଇଛି। ମୃତକ ହେଲେ ଜୟ ଜାନୀ(୬୦)। ମୃତକଙ୍କୁ ଟାଙ୍ଗିଆରେ ହାଣିବା ପରେ ତାଙ୍କୁ ପ୍ରାୟ ୩ଶହ ମିଟର ଘୋଷାଡି ଘୋଷାଡି ଅଣାଯାଇଥିବା ପୋଲିସ ପ୍ରକାଶ କରିଛି।
ସୂଚନାନୁଯାୟୀ, ଜୟଙ୍କ ପୁଅ ଫୁଲଧର ଶନିବାର ସକାଳେ ଅଣ୍ଡରା ଘାଟ ନଦୀ ଆଡ଼କୁ ଶୌଚ ହେବାକୁ ଯାଉଥିବାବେଳେ ବାପାଙ୍କୁ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ବାଟରେ ପଡ଼ିଥିବା ଦେଖିଥିଲେ। ସେ ତାଙ୍କ ଦାଦା ପୁଅ ଭାଇ ଲୀମ ଜାନୀଙ୍କ ସହାୟତାରେ ଉଦ୍ଧାର କରି ଘରକୁ ଆଣିବାବେଳେ ଜୟଙ୍କ ମୃତ୍ୟୁ ଘଟିଥିଲା। ଟାଙ୍ଗିଆରେ ହାଣି ବାପାଙ୍କୁ ହତ୍ୟା କରାଯାଇଥିବା ନେଇ ଜୟ ଦଶମନ୍ତପୁର ଥାନାକୁ ଜଣାଇଥିଲେ।
ଥାନା ଅଧିକାରୀ ସୁକୁମାଙ୍କ ନେତୃତ୍ୱରେ ସେକେଣ୍ଡ ଅଫିସର ନିର୍ମଳା ଲିମା, ଏଏସ୍ଆଇ ଏଲ୍.କେ. ପଣ୍ଡା, ପୋଲିସ ସହ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଜୟଙ୍କ ମୃତଦେହ ମିଳିବା ସ୍ଥାନରୁ ପ୍ରାୟ ୩୦୦ ମିଟର ପର୍ଯ୍ୟନ୍ତ ରକ୍ତ ଛିଟା ସହ ଘୋଷାଡି ଆଣିବାର ଚିହ୍ନ ପୋଲିସକୁ ମିଳିଥିଲା। ରକ୍ତାକ୍ତ ସ୍ଥାନରୁ ମାଟି ସଂଗ୍ରହ କରି ପୋଲିସ ଘଟଣାର ଅଧିକ ତଦନ୍ତ ଚଲାଇଛି।
