ଖଇରା,୧୫।୫(ଉତ୍କଳବନ୍ଧୁ ପଣ୍ଡା): ବାଲେଶ୍ୱର ଜିଲା ଖଇରା ଓ ଔପଦା ୨ ବ୍ଲକକୁ ସଂଯୋଗ କରୁଥିବା ଖଇରା-ଭଞ୍ଜପଦା ଗ୍ରାମ୍ୟ ଉନ୍ନୟନ ରାସ୍ତା କାମ ଆରମ୍ଭ ହୋଇଛି । ତେବେ ରାସ୍ତା ନିର୍ମାଣକୁ ନେଇ ରାସ୍ତା ସଂଲଗ୍ନ ଗ୍ରାମଗୁଡିକର ଅଧିବାସୀଙ୍କ ମଧ୍ୟରେ ଅସନ୍ତୋଷ ବଢିବାରେ ଲାଗିଛି। ରାସ୍ତାର ସ୍ଥାୟିତ୍ୱ ନେଇ ସାରକୋଣା, ବିଦ୍ୟାଧରପୁର ଶାସନ, ମୁକ୍ତାବେଗୁନିଆ, କେନ୍ଦୁଭଦଳୀ ଓ ଭଞ୍ଜପଦା ଗ୍ରାମର ଲୋକେ ପ୍ରଶ୍ନ ଉଠାଇବା ସହ ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି।
ଶୋଚନୀୟ ରାସ୍ତାର ପୁନଃ ନିର୍ମାଣ ପାଇଁ ବାରମ୍ବାର ଦାବି ପରେ ୪କି.ମି. ୩ଶହ ମିଟର ରାସ୍ତା ନିର୍ମାଣ ପାଇଁ ଆନୁମାନିକ ୪କୋଟି ୭୫ଲକ୍ଷ ଟଙ୍କା ପ୍ରଦାନ କରାଯାଇଛି। କାର୍ଯ୍ୟ ଆରମ୍ଭ ସମୟ ୨୦୨୪ ମାର୍ଚ୍ଚ ୧୫ ଥିବା ବେଳେ ଶେଷ ଅବଧି ୨୦୨୪ ଡିସେମ୍ବର ୧୪ତାରିଖ ଅଛି। ଏବେ କିଛି ଦିନ ତଳେ ଭଞ୍ଜପଦା ଗ୍ରାମ ନିକଟରୁ ଆରମ୍ଭ ହୋଇଛି। ହେଲେ ରାସ୍ତା ନିର୍ମାଣରେ ବ୍ୟବହୃତ କଞ୍ଚାମାଲ ନିମ୍ନମାନର ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ରାସ୍ତାର ୨ ପାର୍ଶ୍ୱକୁ ପ୍ରଶସ୍ତୀକରଣ କରାଯାଉଥିବା ବେଳେ ଏଷ୍ଟିମେଟ ଅନୁଯାୟୀ ଏହା କରାଯାଉ ନ ଥିବା ନେଇ ବହୁ ଗ୍ରାମବାସୀ ଆପତ୍ତି ଉଠାଇଛନ୍ତି । ସେହିଭଳି ମୁକ୍ତାବେଗୁନିଆ ନିକଟରେ ଚାଲିଥିବା ଡ୍ରେନ କାମରେ ମଧ୍ୟ ଅନିୟମିତତା ହେଉଥିବା ସ୍ଥାନୀୟ ଗ୍ରାମବାସୀ ଆର୍ଡି ଅଧିକାରୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ଏ ସମ୍ପର୍କରେ କନିଷ୍ଠଯନ୍ତ୍ରୀ ମନୋଜ କୁମାର ସେଣ୍ଟଙ୍କୁ ଯୋଗାଯୋଗ କରିବାରେ ଖୁବ୍ଶୀଘ୍ର ରାସ୍ତା ପରିଦର୍ଶନ ପାଇଁ ଅଧୀକ୍ଷଣ ଯନ୍ତ୍ରୀଙ୍କ ସହିତ ରାସ୍ତାକୁ ଯିବେ ବୋଲି କହିଛନ୍ତି ।
