ଯାଜପୁର ଅଫିସ,୨୦।୧୧: ଡିସେମ୍ବର ୨୦ରୁ ଚଳିତ ବର୍ଷର ଖରିଫ ଧାନ ସଂଗ୍ରହ ହେବ। ନିୟମ ଅନୁଯାୟୀ ଅନୁପାଳନ ସହ ଚାଷୀମାନଙ୍କୁ ସମ୍ପୂର୍ଣ୍ଣ ସହଯୋଗ କରାଯିବ। ଗୁରବାର ଯାଜପୁର ଗୌତମ ବୁଦ୍ଧ ସଂସ୍କୃତି ଭବନଠାରେ ଅନୁଷ୍ଠିତ ଜିଲାସ୍ତରୀୟ ଧାନ ସଂଗ୍ରହ କମିଟି ବୈଠକରେ ଜିଲାପାଳ ଚକ୍ରବର୍ତ୍ତୀ ସିଂହ ରାଠୋର ଯୋଗଦେଇ ଏହା ପ୍ରକାଶ କରିଛନ୍ତି।
ଚଳିତ ବର୍ଷ ୪୩,୮୧୧ ଚାଷୀ ନାମ ପଞ୍ଜୀକରଣ କରିଥିବା ସୂଚନା ଦିଆଯାଇଛି। ଏହାସହ ୧୨୨ଟି ପ୍ୟାକ୍ସ ଓ ୧୬ଟି ମହିଳା ସ୍ବୟଂସହାୟକ ଗୋଷ୍ଠୀ ମାଧ୍ୟମରେ ଧାନ ସଂଗ୍ରହ କରାଯିବ। ଜିଲାରେ ୧୧୦୯୮୪ ହେକ୍ଟର ଧାନ ଚାଷ ଜମି ମଧ୍ୟରୁ ୨୩୯୮୭୭.୯୬ ମେଟ୍ରିକ ଟନ(ଏମଟି) ଧାନ ଉପତ୍ାଦନର ଲକ୍ଷ୍ୟ ରହିଛି। ପ୍ରଥମ ପର୍ଯ୍ୟାୟରେ ବଳକା ଧାନ ମଧ୍ୟରୁ ୭୮୦୮୮.୨୩୬ ଏମଟି ଧାନ ଚାଷୀଙ୍କଠାରୁ ସଂଗ୍ରହ କରାଯିବ ବୋଲି ଜିଲା ଯୋଗାଣ ଅଧିକାରୀ ଜି.ପ୍ରଭାକର ପାତ୍ର ସୂଚନା ଦେଇଛନ୍ତି। ମଣ୍ଡିମାନଙ୍କରେ ଚାଷୀଙ୍କ ପାଇଁ ପାଣି, ଆଶ୍ରୟ, ଧାନର ସୁରକ୍ଷା ଓ ଆଲୋକ ବ୍ୟବସ୍ଥାକୁ ସୁନିଶ୍ଚିତ କରିବା ସହ ଭବିଷ୍ୟତରେ ଧାନ ସଂଗ୍ରହ ସ୍ଥଳରେ ସ୍ଥାୟୀ ବ୍ୟବସ୍ଥା କରିବାକୁ ଜିଲାପାଳ ରଠୋର ପରାମର୍ଶ ଦେଇଥିଲେ। ମିଲରମାନେ ନିର୍ଦ୍ଧାରିତ ଦିନରେ ଧାନ ଉଠାଇବା ସହ ଚାଷୀଙ୍କୁ ସହଯୋଗ, ଚାଷୀଙ୍କୁ ଧାନ ପ୍ରଦାନ ସଂଗ୍ରହରେ ବିଭାଗୀୟ କର୍ତ୍ତୃପକ୍ଷ ପୂର୍ବରୁ ସୂଚନା ଦେବା ଓ ସେମାନଙ୍କ ଅସୁବିଧା ପ୍ରତି ଧ୍ୟାନ ଦେବାକୁ ଜିଲାପାଳ କହିଥିଲେ। ବୈଠକରେ ଅନ୍ୟମାନଙ୍କ ମଧ୍ୟରେ ଜିଲା ପରିଷଦ ସଭାପତି ନରେଶଚନ୍ଦ୍ର ମହାନ୍ତି, ପ୍ରକଳ୍ପ ନିର୍ଦ୍ଦେଶକ ଇନ୍ଦ୍ରମଣି ନାୟକ, ଅତିରିକ୍ତ ଜିଲାପାଳ ମିହିର ପ୍ରସାଦ ମହାନ୍ତି, ଉପଜିଲାପାଳ ନାରାୟଣ ଧଳ, ଡିଆରସିଏସ ରୂଦ୍ରପ୍ରତାପ ଦାସ ପ୍ରମୁଖ ଯୋଗଦେଇ ଚାଷୀ, ମିଲର ଓ ବିଭାଗୀୟ ଅଧିକାରୀଙ୍କ ମଧ୍ୟରେ ସୁସମନ୍ବୟ, ଚାଷୀଙ୍କୁ ଠିକ ସମୟରେ ଟୋକନ ପ୍ରଦାନ, ମଣ୍ଡିରୁ ଠିକ ଭାବେ ମିଲରଙ୍କ ଦ୍ୱାରା ଧାନ ଉଠାଣ, ଟୋକନ ପ୍ରଦାନ ପରେ ଚାଷୀଙ୍କ ସହ ଯୋଗାଯୋଗ ଆଦି ସମ୍ପର୍କରେ ଆଲୋକପାତ କରିଥିଲେ। ଗତ ବର୍ଷ ଟୋକନ ମିଳିବାର ୭ଦିନ ମଧ୍ୟରେ ଚାଷୀ ଧାନ ଦେଇଥିଲେ। କିନ୍ତୁ ଚଳିତ ବର୍ଷ ଏହାକୁ ୩୦ ଦିନକୁ ବୃଦ୍ଧି କରାଯାଇଛି। କୌଣସି ସମସ୍ୟା ଥିଲେ ତାହାକୁ ଆଲୋଚନା ମାଧ୍ୟମରେ ସମାଧାନ କରାଯିବ ବୋଲି ବୈଠକରେ ସୂଚନା ଦିଆଯାଇଛି। ଉପସ୍ଥିତ ଚାଷୀ ପ୍ରତିନିଧି ଓ ମିଲରମାନେ ସେମାନଙ୍କ ମତାମତ ଉପସ୍ଥାପନ କରିଥିଲେ।
