ନୂଆଦିଲ୍ଲୀ,୧୫।୩: ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଆନ୍ଥୋନି ଆଲବାନିସ୍ ଦେଶରେ ଭାରତ ବିରୋଧୀ କାର୍ଯ୍ୟ ରୋକିବା ପାଇଁ ଆଶ୍ୱାସନା ଦେବାର କିଛି ଦିନ ପରେ ପୁଣି ଖଲିସ୍ତାନ ସମର୍ଥକମାନେ ବ୍ରିସବେନରେ ଥିବା ଭାରତୀୟ ବାଣିଜ୍ୟ ଦୂତାବାସ ବନ୍ଦ କରି ଦେଇଛନ୍ତି। ଦି ଅଷ୍ଟ୍ରେଲିଆ ଟୁଡେରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ବ୍ରିସବେନର ଟାରିଙ୍ଗା ଉପନଗରର ସ୍ବାନ ରୋଡରେ ଥିବା ଭାରତୀୟ ବାଣିଜ୍ୟ ଦୂତାବାସ ଖଲିସ୍ତାନ ସମର୍ଥକମାନେ ଅଶ୍ଳୀଳ ସ୍ଲୋଗାନ ଦେଇଥିଲେ ଏବଂ ହିନ୍ଦୁ ବିରୋଧୀ ପୋଷ୍ଟର ଲଗାଇଥିଲେ। ଉତ୍ତେଜନାକୁ ଦୃଷ୍ଟିରେ ରଖି ଏହି ଅଞ୍ଚଳରେ ପୋଲିସ ଫୋର୍ସ ଉପସ୍ଥିତ ଅଛନ୍ତି।
ନିକଟରେ ଭାରତ ଗସ୍ତରେ ଆସିଥିବା ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ଆନ୍ଥୋନୀ ଆଲବାନିସ୍ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଷ୍ଟ୍ରେଲିଆରେ ଖଲିସ୍ତାନ ସଂଗଠନ ଦ୍ୱାରା ସୃଷ୍ଟି ହୋଇଥିବା ବିଶୃଙ୍ଖଳା ବିଷୟରେ ଆଲୋଚନା କରିଥିଲେ। ଆଲବାନିସ୍ ଶାନ୍ତି ବଜାୟ ରଖିବା ପାଇଁ ସମସ୍ତ ପଦକ୍ଷେପ ନେବାକୁ ନିଶ୍ଚିତ କରିଥିଲେ।
କିଛି ଦିନ ପୂର୍ବରୁ ଖଲିସ୍ତାନମାନେ ବ୍ରିସବେନରେ ଥିବା ଏକ ହିନ୍ଦୁ ମନ୍ଦିରକୁ ମଧ୍ୟ ଟାର୍ଗେଟ କରିଥିଲେ। ମାର୍ଚ୍ଚ ପ୍ରାରମ୍ଭରେ ଖାଲିସ୍ତାନ ସମର୍ଥକମାନେ ଶ୍ରୀ ଲକ୍ଷ୍ମୀ ନାରାୟଣ ମନ୍ଦିର ଉପରେ ଭଙ୍ଗାରୁଜା କରିଥିଲେ।
