ଆଜମେର,୫ ।୭: ନୁପୁର ଶର୍ମାଙ୍କ ବୟାନକୁ ସାରା ଦେଶରେ ବିରୋଧ କରାଯାଉଛି । ଏହାକୁ ନେଇ ଲଗାତାର କିଛି ନା କିଛି ଭିଡିଓ ପ୍ରତିଦିନ ସାମ୍ନାକୁ ଆସୁଛି । ଏବେ ଏମିତି ଏକ ଭିଡିଓ ଭାଇରାଲ ହୋଇଛି ଯେଉଁଥିରେ ତାଙ୍କୁ ହତ୍ୟା କରିବା କଥା ଉଠିଛି । ଏହି ଭିଡିଓରେ ହଜରତ ଖ୍ୱାଜା ମୋଇନୁଦ୍ଦିନ ହସନ ଚିସ୍ତି ଦରଗାହର ଜଣେ ଖାଦିମ କହୁଛନ୍ତି ଯିଏ ନୁପୁର ଶର୍ମାଙ୍କ ମୁଣ୍ଡନେଇକି ଆସିବ, ତାକୁ ମୁଁ ମୋ ଘର ଦେଇଦେବି । ଆଜମେର ପୋଲିସ ଭିଡିଓକୁ ଆଧାର ବୋଲି ଧରି ମାମଲା ରୁଜୁ କରିଛି ।
ସୂଚନାଯୋଗ୍ୟ, ଉଦୟପୁରରେ ନୁପୁର ଶର୍ମାଙ୍କ ସମର୍ଥନରେ ସାମନାକୁ ଆସିଥିବା ପୋଷ୍ଟର ପରେ ଟେଲର କହ୍ନେୟା ଲାଲଙ୍କ ହତ୍ୟା ମାମଲା ଶାନ୍ତ ହୋଇ ନ ଥିବା ବେଳେ ଆଜମେର ଦରଗାହର ଖାଦିମଙ୍କ ଭିଡିଓ ଭାଇରାଲ ହୋଇଛି । ଯେଉଁଥିରେ ପୁଣିଥରେ ବିରୋଧର ବହ୍ନି ଲାଗିଛି । ସୋସିଆଲ ମିଡିଆରେ ଦରଗାହର ଖାଦିମଙ୍କ ଭିଡିଓ ଭାଇରାଲ ହୋଇଛି, ଯେଉଁଥିରେ ଖାଦିମ ନୁପୁର ଶର୍ମାଙ୍କୁ ଗୁଳି ମାରିବା କଥା କହିଛନ୍ତି । ତେବେ ଭିଡିଓଟି ୩-୪ ଦିନ ତଳର ବୋଲି କୁହାଯାଉଛି । ଭିଡିଓରେ ଯେଉଁ ବ୍ୟକ୍ତି ନଜର ଆସୁଛନ୍ତି ସେ ଦରଗାହର ଖାଦିମ ଓ ଦରଗାହ ଥାନାର ହିଷ୍ଟ୍ରିସିଟର ଯାହାଙ୍କ ନାମରେ ବିଭିନ୍ନ ମାମଲା ରହିଛି ।
