କେସିଙ୍ଗା,୩।୪(ଡି.ଏନ.ଏ.): କଳାହାଣ୍ଡି ଜିଲା କେସିଙ୍ଗା ମୁଖ୍ୟ ପୋଷ୍ଟ ଅଫିସ ଏବେ ବିଭିନ୍ନ ସମସ୍ୟା ଦେଇ ଗତି କରୁଛି। ପୋଷ୍ଟ ଅଫିସ ଦିନକୁ ଲକ୍ଷ ଲକ୍ଷ ଟଙ୍କା କାରବାର ହେଉଥିଲେ ମଧ୍ୟ ବିଭାଗୀୟ ଅଧିକାରୀଙ୍କ ଖାମଖିଆଲି ଓ ଅବହେଳା ଯୋଗୁ ଅବ୍ୟବସ୍ଥା ଲାଗି ରହିଛି। ମାସକୁ ୧୦ ଦିନ ଲିଙ୍କ ରହୁ ନ ଥିବାରୁ କାମରେ ବ୍ୟାଘାତ ସୃଷ୍ଟି ଦେଖାଯାଉଛି। କୌଣସି କାରଣରୁ ବିଦ୍ୟୁତ୍ ଗଲେ କାମ ବନ୍ଦ ହୋଇଯାଉଛି। ଅଫିସ ପରିସରରେ ଥିବା ୩ଟି ଷ୍ଟାଫ ଘର କାମକୁ ଆସୁନି। ୧୦ ବର୍ଷରୁ ଅଧିକ ହେଲା ଖାଲି ପଡ଼ିବାରୁ ଘରଗୁଡ଼ିକ ପାଲଟିଛି ଭୁତ କୋଠୀ। ପାଣିର ସୁବିଧା ନ ଥିବାରୁ କୌଣସି ଷ୍ଟାଫ ରହୁନାହାନ୍ତି ବୋଲି ଶୁଣିବାକୁ ମିଳୁଛି। ହେଲେ ୨ ବର୍ଷ ତଳେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ଷ୍ଟାଫ ଘରଗୁଡ଼ିକୁ ମରାମତି କରାଯାଇଥିଲା। ଗ୍ରାହକମାନଙ୍କ ପାଇଁ ଶୌଚାଳୟ ଗୋଟିଏ ନାହିଁ। ପାଇପ ପାଇଁ ପାଣିର କୌଣସି ସୁବିଧା ନାହିଁ। ଲୋକେ ନାହିଁ ନ ଥିବା ଅସୁବିଧା ର ସମ୍ମୁଖୀନ ହେଉଛନ୍ତି। ଗତ ଦୁଇ ମାସ ତଳେ ଡାକ ବିଭାଗର ସୁପରିଟେଣ୍ଟଣ୍ଡେଣ୍ଟ କେସିଙ୍ଗା ମୁଖ୍ୟ ଡାକଘର ପରିଦର୍ଶନ ଆସିଥିଲେ ସୁଦ୍ଧା କୌଣସି ସୁଫଳ ମିଳୁନାହିଁ। ଏହି ସବୁ ବିଷୟ ଉପରେ ଅଭିଯୋଗ କରାଯାଇଥିଲେ ମଧ୍ୟ ଏ ପର୍ଯ୍ୟନ୍ତ କୌଣସି ପଦକ୍ଷେପ ନିଆଯାଇ ନାହିଁ। ପୋଷ୍ଟ ଅଫିସ ଭିତରେ ଥିବା ଗୋଟିଏ କୁଅ ରକ୍ଷଣବେକ୍ଷଣ ଅଭାବରୁ ଅନୁପଯୋଗୀ ହୋଇଯାଇଛି। ୩ ବର୍ଷରୁ ଅଧିକ ହେଲା ବାହାରେ ଜେନେରେଟର ପଡ଼ି ଉଈ ଖାଇଲାଣି। ଟଙ୍କା ଗଣିବା ମେଶିନ ପୁରୁଣା ହୋଇଯାଇଥିବାରୁ ବହୁତ ଅସୁବିଧା ହେବା ସହ ଘଣ୍ଟା ଘଣ୍ଟା ସମୟ ଲାଗୁଛି। ଖାତା ପ୍ରିଣ୍ଟ ହେଇ ପାରୁନାହିଁ ବୋଲି ଅଭିଯୋଗ ଆସୁଛି। ଏମିତି ଅନେକ ସମସ୍ୟା କେସିଙ୍ଗା ପୋଷ୍ଟ ଅଫିସରେ ଦେଖିବାକୁ ମିଳୁଛି। କେସିଙ୍ଗାରେ ଥିବା ଡାକ ଇନ୍ସପେକ୍ଟର ସିଂବାବୁଙ୍କୁ ପଚାରିଲେ ମୁଁ ପୋଷ୍ଟାଲ ସୁପରିଟେଣ୍ଟଣ୍ଡେଣ୍ଟଙ୍କୁ ଜଣାଇ ଦେଇଛି ବୋଲି କହି କଥାକୁ ଆଡାଇ ଦେଇଛନ୍ତି। ଅତିଶୀଘ୍ର କେସିଙ୍ଗା ପୋଷ୍ଟ ଅଫିସ ସମସ୍ୟା ଦୂର କରିବାକୁ ସାଧାରଣରେ ଦାବି ହେଉଛି।
