କେସିଙ୍ଗା,୧୪ା୭(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗାସ୍ଥିତ ସିଟିଜେନ୍ସ ଫୋରମର ସଭାପତି ଡ.ହେମସାଗର ସାହୁଙ୍କ ନେତୃତ୍ୱରେ କେସିଙ୍ଗା ଅଞ୍ଚଳର ବିଭିନ୍ନ ସମସ୍ୟାକୁ ନେଇ ଏକ ଖବରଦାତା ସମ୍ମିଳନୀ ସରକାରୀ ବିଦ୍ୟାପୀଠର ସଭାଗୃହରେ ରବିବାର ସନ୍ଧ୍ୟାରେ ଅନୁଷ୍ଠିତ ହୋଇଯାଇଛି। କେସିଙ୍ଗାର ମୁଖ୍ୟ ସମସ୍ୟା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଆବଶ୍ୟକତା ଅନୁସାରେ ଡାକ୍ତର ନିଯୁକ୍ତି, କେସିଙ୍ଗାରୁ ଭୁବନେଶ୍ୱର ଏକ ଟ୍ରେନ ଚଳାଚଳ, ହାଓ୍ବଡା ଇସ୍ପାତ ଟ୍ରେନ୍କୁ ଟିଟିଲାଗଡ଼ରୁ କେସିଙ୍ଗା ଯାଏ ସମ୍ପ୍ରସାରଣ, ନିର୍ମାଣାଧୀନ ଓଭର ବ୍ରିଜ୍କୁ ଜୋଲକୋ ଯାଏ ସମ୍ପ୍ରସାରଣ କରିବା, କେସିଙ୍ଗା ଏନ୍ଏସିକୁ ମ୍ୟୁନିସିପାଲିଟି କରିବା, ଧର୍ମଗଡ଼ଠାରୁ କେସିଙ୍ଗା ରେଳ ଷ୍ଟେଶନକୁ ବନ୍ଦେ ଭାରତ ଟ୍ରେନକୁ ସଂଯୋଗ କରିବା ପାଇଁ ଏକ ବସ୍ ସେବା ଯୋଗାଇବା, ଆଦର୍ଶ ବିଦ୍ୟାଳୟକୁ ପକ୍କା ରାସ୍ତା ନିର୍ମାଣ, କେସିଙ୍ଗା ବ୍ଲକ ଗୁର୍ଜିମୁଣ୍ଡା ଗ୍ରାମସ୍ଥିତ ଯୋଗମାୟା ପୀଠ ଓ ଦେବ ଗୁମ୍ଫାକୁ ପର୍ଯ୍ୟଟନସ୍ଥଳର ମାନ୍ୟତା ଦିଆଯିବା, କାଣ୍ଡେଲ ରୋଡ଼ ଷ୍ଟେଶନରେ ଦୁଇ ମିନିଟ୍ ସମ୍ବଲପୁର-ରାୟଗଡ଼ା ଏକ୍ସପ୍ରେସ୍ ରହଣି ଓ ମୁଖ୍ୟମନ୍ତ୍ରୀଙ୍କୁ ଦିଆ ଯାଇଥିବା ବିଭିନ୍ନ ଦାବି ବିଷୟରେ ଆଲୋଚନା କରାଯାଇଥିଲା।
ଏଥିରେ ସିଟିଜେନ୍ ଫୋରମ୍ର ସମ୍ପାଦକ ବି.ଚନ୍ଦ୍ରଶେଖର ଆଚାରି ମଞ୍ଚ ପରିଚାଳନା କରିଥିଲେ। ଉକ୍ତ ଅନୁଷ୍ଠାନର ଉପସଭାପତି ବିନାୟକ ପ୍ରକାଶ ନାଏକଙ୍କ ସମେତ ସମସ୍ତ ଗଣମାଧ୍ୟମ ପ୍ରତିନିଧିମାନେ ଯୋଗଦେଇଥିଲେ।
