ନୂଆଦିଲ୍ଲୀ, ୨୬।୪:୨୦୨୪ ଲୋକ ସଭା ନିର୍ବାଚନରେ ବିରୋଧୀ ଏକାଠି ହେବା ନେଇ ଚର୍ଚ୍ଚା ଜୋର୍ ଧରିଛି। ନୀତୀଶ ବିରୋଧୀ ଦଳ ନେତାଙ୍କ ସହ ଭେଟ କରି ସମସ୍ତଙ୍କୁ ଏକଜୁଟ କରିବାରେ ଲାଗିଛନ୍ତି । ଆଗାମୀ ନିର୍ବାଚନରେ ବିରୋଧୀ ଦଳ ଏକାଠି ହୋଇ ଏନ୍ଡିଏ ବିପକ୍ଷରେ ମେଣ୍ଟକରି ପ୍ରତିଦ୍ୱନ୍ଦ୍ୱିତା କରିବା ଲାଗି ଅଣ୍ଟା ଭିଡ଼ିଲେଣିି। ଅନ୍ୟପଟେ କିଛି ଦଳ ତୃତୀୟ ସାମ୍ମୁଖ୍ୟ ନେଇ ଚିନ୍ତା କରୁଛନ୍ତି। ଏପରି ଏକ ଦଳ ହେଉଛି ମୁଖ୍ୟମନ୍ତ୍ରୀ ଚନ୍ଦ୍ରଶେଖର ରାଓଙ୍କ ପାର୍ଟି ଭାରତ ରାଷ୍ଟ୍ର ସମିତି(ବିଆର୍ଏସ୍)। ଆଗାମୀ ନିର୍ବାଚନ ପାଇଁ ଚନ୍ଦ୍ରଶେଖର କଂଗ୍ରେସରେ ବିରୋଧୀ ଦଳ ଏକାଠି କରିବା ସପକ୍ଷରେ ଥିଲେ। ମାତ୍ର ସେ ଏବେ ନିଜର ଆଭିମୁଖ୍ୟ ବଦଳାଇ କଂଗ୍ରେସରେ ସାମିଲ ହୋଇପାରନ୍ତି ବୋଲି ଚର୍ଚ୍ଚା ଜୋର୍ ଧରିଛି।
ଇଣ୍ଡିଆନ ଏକ୍ସପ୍ରେସକୁ ବିଆର୍ଏସ୍ର ଜଣେ ନେତା କହିଛନ୍ତି, କେନ୍ଦ୍ର ବିରୋଧୀ ଦଳ ନେତାଙ୍କ ସ୍ବର ଚାପିବାକୁ ଆଗଭର ହୋଇ ଉଠିଛି। ଏପରି ହେଲେ ପାକିସ୍ତାନ ଭଳି ହୋଇଯିବ। ପାକିସ୍ତାନରେ ଯେତେବେଳେ ଇମ୍ରାନ ସରକାର କ୍ଷମତାରେ ଥିଲେ ବିରୋଧୀ ଦଳ ନେତାଙ୍କୁ ଦେଶ ଛାଡ଼ିବାକୁ ପଡ଼ିଥିଲା। ତେଣୁ ବିରୋଧୀଙ୍କୁ ଏକଜୁଟ ହେବାକୁ ପଡ଼ିବ। ଏବେ ୨୦୧୯ ଭଳି ସ୍ଥିତି ନାହିଁ। ଆମ ମଧ୍ୟରେ ଥିବା ମତଭେଦକୁ ଶେଷ କରିବାକୁ ପଡ଼ିବ। ଦେଶକୁ ବଞ୍ଚାଇବାକୁ ହେଲେ ଭାଜପାକୁ ହରାଇବା ହିଁ ବିରୋଧୀଙ୍କ ପ୍ରାଥମିକତା ହେବା ଉଚିତ।
କଂଗ୍ରେସ ସମସ୍ତ ଆଞ୍ଚଳିକ ଦଳ ସହ ବିରୋଧୀ ମେଣ୍ଟ ନେଇ ଆଲୋଚନା କରୁ। କଂଗ୍ରେସ ଯେଉଁଠାରେ ମଜଭୁତ ରହିଛି ସେଠାରେ ଦଳକୁ ଟିକେଟ ମିଳୁ, ହେଲେ ଆଞ୍ଚଳିକ ଦଳ ଯେଉଁ ଯେଉଁ ଆସନରେ ମଜଭୁତ ରହିଛି ସେଠାରେ କଂଗ୍ରେସ ଆଞ୍ଚଳିକ ଦଳକୁ ସୁଯୋଗ ଦେବା ଆବଶ୍ୟକ । ଏହିପ୍ରକାର ହେଲେ ବିରୋଧୀ ମେଣ୍ଟ ମଜଭୁତ ହେବ ଏବଂ ଭାଜପା ସହ ମୁକାବିଲା କରି ହେବ ବୋଲି ବିଆର୍ଏସ୍ର ଜଣେ ବରିଷ୍ଠ ନେତା କହିଛନ୍ତି।
ସେ ଆହୁରି କହିଛନ୍ତି, ୨୦୧୯ ଭଳି ୨୦୨୪ରେ ମୋଦି ବନାମ ରାହୁଲ ଗାନ୍ଧୀ ମୁକାବିଲା ନ ହେଉ। ଏପରି ନେଗେଟିଭ ଦ୍ୱାରା ବିରୋଧୀଙ୍କୁ କ୍ଷତି ସହିବାକୁ ପଡିଛି। ତେବେ ଏପରି ସ୍ଥିତିରେ ନୀତୀଶ କୁମାର କିମ୍ବା ମମତା ବାନାର୍ଜୀଙ୍କୁ ବିରୋଧୀ ଦଳ ନେତା କରାଯାଉ। ସେମାନଙ୍କ ନିକଟରେ ସରକାର ଚଳାଇବାର ଅଭିଜ୍ଞତା ରହିଛି। ରାହୁଲ ବର୍ତ୍ତମାନ ସୁଦ୍ଧା ମଧ୍ୟ କଂଗ୍ରେସର ଅଫିସିଆଲ ଚେହେରା ନୁହନ୍ତି।
