ମୁମ୍ବାଇ: ବଲିଉଡ ଅଭିନେତା କାର୍ତ୍ତିକ ଆର୍ଯ୍ୟନ ଏମିତି ଜଣେ କଳାକାର ଯାହାର ଫ୍ୟାନ ଫଲୋଇଙ୍ଗ ସଂଖ୍ୟା ବହୁତ ଅଧିକ । ଏହି ଅଭିନେତା ଖୁ୍ବ୍ କମ୍ ଫିଲ୍ମରେ ଅଭିନୟ କରିଥିଲେ ବି ଦର୍ଶକଙ୍କର ଖୁବ୍ ନିକଟତର ହୋଇ ପାରିଛନ୍ତି । ୨୦୨୧ରେ ତାଙ୍କ ଫିଲ୍ମ କ୍ୟାରିୟର ଆଉ ପାଦେ ଆଗକୁ ଯାଇଛି । ଫିଲ୍ମ ଧମାକା ସହ ସେ ଓଟିଟି ପ୍ଲଟଫର୍ମରେ ଡେବ୍ୟୁ କରି ସମସ୍ତଙ୍କୁ ଇମ୍ପ୍ରେସ କରି ଦେଇଛନ୍ତି । ସେମିତି ୨୦୨୨ରେ ବି ସେ କିଛି ନୂଆ କରିବାକୁ ଲକ୍ଷ୍ୟ ରଖିଛନ୍ତି । ନିକଟରେ ଏକ ସାକ୍ଷାତ୍କାରରେ କାର୍ତ୍ତିକ ଏକ କ୍ରିକେଟରଙ୍କ ବାୟୋପିକରେ କାମ କରିବାକୁ ଇଚ୍ଛା ରଖିଥିବା ପ୍ରକାଶ କରିଛନ୍ତି । ତେବେ ସେ କେଉଁ କ୍ରିକେଟରଙ୍କ ବାୟୋପିକରେ କାମ କରିବାକୁ ପସନ୍ଦ କରିବେ ବୋଲି ପ୍ରଶ୍ନ କରାଯିବାରୁ ତାଙ୍କର ଉତ୍ତର ଥିଲା ବିରାଟ କୋହଲି । ନିକଟରେ ଜଣେ କ୍ରିକେଟର ବେଶରେ କାର୍ତ୍ତିକ ଏକ ଫଟୋ ଶେୟାର କରିଥିଲେ । ଏହାକୁ ନେଇ ଆଲୋଚନା ହୋଇଥିଲା କି ସେ କୌଣସି କ୍ରିକେଟର ଭୂମିକାରେ ଅଭିନୟ କରୁଛନ୍ତି । ହେଲେ ଏହା ଫିଲ୍ମ ନୁହେଁ ବରଂ ଏକ ବିଜ୍ଞାପନ ଥିଲା ବୋଲି ପରେ କାର୍ତ୍ତିକ କହିଥିଲେ । ଏବେ ସାକ୍ଷାତ୍କାରରେ ଏହା ବି ସ୍ପଷ୍ଟ ହୋଇଛି କି ବିରାଟ କୋହଲି ହେଉଛନ୍ତି କାର୍ତ୍ତିକଙ୍କର ପ୍ରିୟ କ୍ରିକେଟର । ଯଦି ଭବିଷ୍ୟତରେ ସୁଯୋଗ ମିଳିଲା ତେବେ ସେ ବିରାଟ କୋହଲିଙ୍କ କ୍ୟାରେକ୍ଟରରେ ଅଭିନୟ କରିପାରନ୍ତି । କାରଣ ପ୍ରଥମେ କାର୍ତ୍ତିକ ତାଙ୍କ ମନକଥା କହି ସାରିଛନ୍ତି । ଯଦି ଏହା ସତ ହେଲା ତେବେ ଗତବର୍ଷ ତୁଳନାରେ ଚଳିତ ବର୍ଷ କାର୍ତ୍ତିକଙ୍କ ପାଇଁ ଜବରଦସ୍ତ ସାବ୍ୟସ୍ତ ହେବ । ଏବେ କାର୍ତ୍ତିକଙ୍କ ହାତରେ ‘ଶହଜାଦା’, ‘ଭୁଲ ଭୁଲେୟା ୨’, ‘ଫ୍ରିଡି’ ଓ ‘କ୍ୟାପଟେନ ଇଣ୍ଡିଆ’ ଭଳି ପ୍ରୋଜେକ୍ଟ ରହିଛି ।
