ଭୁବନେଶ୍ୱର,୨୭।୧୨: ଓଡିଶା ରାଜନୀତିର ଏକ ଚର୍ଚ୍ଚିତ ଚେହେରା ଭି.କେ.ପାଣ୍ଡିଆନ ରାଜନୀତିରୁ ଅବସର ନେଇଥିଲେ ମଧ୍ୟ ତାଙ୍କୁ ନେଇ ଅନେକ ସମୟରେ ଚର୍ଚ୍ଚା ଲାଗିରହିଥାଏ। ନିକଟରେ ଶେଷ ହୋଇଥିବା ବିଜେଡିର ୨୮ତମ ପ୍ରତିଷ୍ଠା ଦିବସରେ ତାଙ୍କୁ ନେଇ ଅନେକ ଆଲୋଚନା ହୋଇଥିଲା। କିଏ କହୁଥିଲେ ସେ ରାଜନୀତିକୁ ପୁଣି ଥରେ ଫେରି ବିଜେଡିର ମଙ୍ଗ ଧରିବେ ଆଉ କିଏ କହୁଥିଲେ ନବୀନଙ୍କ ସହ ତାଙ୍କ ସମ୍ପର୍କ ଏବେ ବି ଗଭୀର। ଏମିତି ଚର୍ଚ୍ଚା ଭିତରେ ତାଙ୍କ ନାଁରେ ଏକ ଟୁଇଟ୍ ଭାଇରାଲ ହୋଇଛି। ଯେଉଁଥିରେ ସେ ଓଡ଼ିଶାବାସୀଙ୍କୁ ଭୁଲ୍ ମାଗୁଥିବା ଦେଖାଯାଇଛି। ବିଜେଡିର ପ୍ରତିଷ୍ଠା ଦିବସରେ ଏକ୍ସରେ କାର୍ତ୍ତିକ ପାଣ୍ଡିଆନ୍ ନାମକ ଆକାଉଣ୍ଟରୁ ଲେଖାଯାଇଥିଲା, ଭୁଲ ସମସ୍ତଙ୍କ ଜୀବନରେ ହୋଇଥାଏ,ଯଦି କାହାର କିଛି ଅସୁବିଧା, ସମସ୍ତ ଓଡ଼ିଶାବାସୀଙ୍କ ପାଖରେ କ୍ଷମା ପ୍ରାର୍ଥନା କରୁଛି। ଓଡ଼ିଶାରେ ଜନ୍ମ ହେବା ଯେତିକି ଜୁରୁରୀ ନୁହେ, ଓଡ଼ିଆ କହିବା, ଓଡିଶାବାସୀଙ୍କ ସୁଖ-ଦୁଃଖ ରେ ସାଥୀ ହେବା ସେତିକି ଆବଶ୍ୟକ। ଏହି ଟୁଇଟ୍ ଚାରିଆଡେ ଭାଇରାଲ ହୋଇଥିଲା।
ଟୁଇଟ୍ ଭାଇରାଲର ଦିନକ ପରେ ସଫେଇ ଦେଇଛନ୍ତି କାର୍ତ୍ତିକ ପାଣ୍ଡିଆନ। ସେ ଇନ୍ଷ୍ଟାଗ୍ରାମ ଷ୍ଟାଟସରେ କହିଛନ୍ତି, ମୋର କୌଣସି ଏକ୍ସ ଆକାଉଣ୍ଟ ନାହିଁ। ମୋ ନାଁ ଏବଂ ଫଟୋ ଅପବ୍ୟବହାର କରାଯାଇ ରାଜନୈତିକ ଫାଇଦା ଉଠାଯାଉଛି।
