ଗଞ୍ଜାମ ସହରରେ ରହିଛି ବହୁ ଦୈବୀପୀଠ ଓ ପିକ୍ନିକ୍ ସ୍ପଟ୍, ସେଥିମଧ୍ୟରୁ ଶେରଗଡର କରଞ୍ଜେଇ ପୀଠ ଅନ୍ୟତମ। କରଞ୍ଜେଇ ଓ ପାକିଡି ପାହାଡ ମଝିରେ ରହିଛି ଏହି ମନୋରମ ସ୍ଥଳ। କିମ୍ବଦନ୍ତୀ ଅନୁଯାୟୀ ମୁନିଋଷିମାନେ ଏହି ପାହାଡରେ ତପସ୍ୟା କରି ସିଦ୍ଧିଲାଭ କରୁଥିଲେ। ମୟୂର ଓ କୃଷ୍ଣସାର ମୃଗଙ୍କ ବିହାର ସହ ଘନ ବନରାଜି ଓ ପାର୍କ ଏଠାକୁ ଆସିବାକୁ ପର୍ଯ୍ୟଟକଙ୍କୁ ଆକୃଷ୍ଟ କରେ। ବର୍ଷସାରା ଏଠାକୁ ପର୍ଯ୍ୟଟକ ଆସି ପ୍ରକୃତିକୁ ମନଭରି ଉପଭୋଗ କରନ୍ତି। ପିକ୍ନିକ୍ ପାଇଁ ଏଠାରେ ସମସ୍ତ ବ୍ୟବସ୍ଥା ରହିଛି। ପୀଠଟି ଜାତୀୟ ରାଜପଥ ନଂ.୫୯ କଡରେ ଥିବାରୁ ଏଠାକୁ ଯିବାକୁ ଅସୁବିଧା ହୁଏ ନାହିଁ। ସନ୍ଧ୍ୟା ପର୍ଯ୍ୟନ୍ତ ଏଠାରୁ ଫେରିବା ପାଇଁ ମଧ୍ୟ ବସ୍ ମିଳିବ। ଜାତୀୟ ରାଜପଥଠାରୁ ମାତ୍ର ୫୦୦ ମିଟର ଦୂରରେ ରହିଛି ଏହି ସ୍ପଟ୍। କରଞ୍ଜେଇ ପାହାଡ ନାମ ଅନୁଯାୟୀ ଏହି ପୀଠର ନାମ ରଖାଯାଇଛି। ଇକୋ ଟୁରିଜମ୍ ସାଙ୍ଗକୁ ବନ ବିଭାଗର ନର୍ସରୀ ଓ ବିଶ୍ରାମଗୃହ ବ୍ୟବସ୍ଥା ଅଛି। ବିଶେଷ କରି ମା’ କରଞ୍ଜେଇ ଠାକୁରାଣୀ ମନ୍ଦିର ତରଫରୁ ପର୍ଯ୍ୟଟକଙ୍କ ପାଇଁ ବ୍ୟାପକ ସୁବିଧା କରାଯାଇଛି। ଅଞ୍ଚଳର ବିଭିନ୍ନ ସରକାରୀ, ବନ୍ଧୁ ମିଳନ କାର୍ଯ୍ୟକ୍ରମ ଏଠାରେ ହୁଏ। ଚାରିଆଡେ ମୟୂରଙ୍କ ବିଚରଣ ପିଲାଠାରୁ ବୟସ୍କ ସମସ୍ତଙ୍କୁ ଆକୃଷ୍ଟ କରେ। ୨ ବ୍ଲକ ପ୍ରଶାସନ ଆସିକା ଓ ଶେରଗଡର ତତ୍ତ୍ୱାବଧାନରେ ଚାଲିଛି ଏହି ପୀଠ। ବିକାଶ ଦିଗରେ ବିଗତ କିଛିଦିନ ମଧ୍ୟରେ ବହୁ ପଦକ୍ଷେପ ନିଆଯାଇଥିବା କହିଛନ୍ତି କରଞ୍ଜେଇ ସମନ୍ବୟ ସମିତି ସଭାପତି ଭଜରାମ ପଲେଇ ଓ ସଭ୍ୟ ମାଧବାନନ୍ଦ ପଣ୍ଡା। ସାମାଜିକ କର୍ମୀ ବିକୁ ନାୟକ କୁହନ୍ତି, ଏହାର ବିକାଶ ସହ ପର୍ଯ୍ୟଟକ ମାନଚିତ୍ରରେ ସ୍ଥାନ ଦେବାକୁ ବହୁବାର ପ୍ରଶାସନର ବୈଠକ ବସିଛି, ହେଲେ ଫଳ ଶୂନ। ତୁରନ୍ତ ଏହାକୁ ପର୍ଯ୍ୟଟନସ୍ଥଳୀର ମାନ୍ୟତା ଦେବାକୁ ସେ ଦାବି କରିଛନ୍ତି।
କେମିତି ଯିବେ
ବ୍ରହ୍ମପୁର ରେଳଷ୍ଟେଶନରୁ କରଞ୍ଜେଇ ପୀଠର ଦୂରତା ୨୭ କି.ମି.। ବାହାରୁ ଆସୁଥିବା ପର୍ଯ୍ୟଟକ ବ୍ରହ୍ମପୁର ରେଳ ଷ୍ଟେଶନରେ ପହଞ୍ଚତ୍ବା ପରେ ଟ୍ୟାକ୍ସି ଏବଂ ବସ୍ ଯୋଗେ ଭାୟା ହିଞ୍ଜିଳିକାଟୁ ଦେଇ ଯାଇପାରିବେ। ଆସିକା ଯାଉଥିବା ସମସ୍ତ ବସ୍ କରଞ୍ଜେଇ ଛକରେ ରହିଥାଏ। ପଶ୍ଚିମ ଓଡ଼ିଶାର ଲୋକେ ଭଞ୍ଜନଗର ଦେଇ ଏହି ପୀଠକୁ ଆସିପାରିବେ। ଭଞ୍ଜନଗରରୁ ବ୍ରହ୍ମପୁର ଆସୁଥିବା ସମସ୍ତ ବସ୍ କରଞ୍ଜେଇ ପୀଠ ଦେଇ ଯାଇଥାଏ।
– ରିପୋର୍ଟ: ସୂର୍ଯ୍ୟନାରାୟଣ ଦାସ, ଶେରଗଡ଼
