ଲକ୍ଡାଉନ୍ ଯୋଗୁ ଗତ ମାର୍ଚ୍ଚ ମାସରୁ ସମସ୍ତ ଟିଭି ସିରିଏଲ ଶୁଟିଂ ବନ୍ଦ ରହିଛି। ପାଖାପାଖି ୪ ମାସ ପରେ ଏବେ ଧୀରେ ଧୀରେ ଶୁଟିଂ ଆରମ୍ଭ ହୋଇଛି। ଏହି କ୍ରମରେ ଲୋକପ୍ରିୟ କମେଡି ଶୋ’ କପିଲ ଶର୍ମା କମେଡିର ଶୁଟିଂ ପୁଣି ଆରମ୍ଭ ହୋଇଛି। କରୋନା ଯୋଗୁ ଶୋ’ର ଶୁଟିଂରେ କିଛି ସତର୍କତା ଅବଲମ୍ବନ କରାଯାଇଛି। ସାମାଜିକ ଦୂରତାକୁ ଦୃଷ୍ଟିରେ ରଖି ଏଥର ଶୋ’ରେ ଲାଇଭ୍ ଅଡିଏନ୍ସଙ୍କୁ ଦେଖିବାକୁ ମିଳିବନି। କିନ୍ତୁ ଯେଉଁ ଦର୍ଶକ ଶୋ’ରେ ଭାଗ ନେବାକୁ ଇଚ୍ଛା ପ୍ରକାଶ କରିବେ ସେମାନଙ୍କ ପାଇଁ ଏକ ନୂଆ ଯୋଜନା ପ୍ରସ୍ତୁତ କରାଯାଇଛି। ଏନେଇ କପିଲ ଟୁଇଟ କରି କହିଛନ୍ତି, ନମସ୍କାର ବନ୍ଧୁଗଣ, ବର୍ତ୍ତମାନ ଆପଣ ସମସ୍ତେ ଘରୁ ଭିଡିଓ କଲ ସାହାଯ୍ୟରେ କପିଲ ଶର୍ମା ଶୋ’ର ଏକ ଅଂଶ ହୋଇପାରିବେ। ତୁମକୁ କେବଳ ଏକ ଇଣ୍ଟ୍ରୋ ଭିଡିଓ ତିଆରି କରିବାକୁ ପଡିବ। ଯେଉଁଥିରେ ତୁମେ ତୁମର ନାମ, ସହର ନାମ କହିପାରିବ। ଏହାକୁ ଇନଷ୍ଟାଗ୍ରାମରେ ଅପଲୋଡ କରି ମୋତେ ଏବଂ @tkssaudience କୁ ଟ୍ୟାଗ କରନ୍ତୁ। ତା’ପରେ ଆମ ଟିମ୍ ଏହି ଭିଡିଓ ଦେଖି ତୁମ ସହିତ ଲାଇଭ୍ କଥାବାର୍ତ୍ତା କରିବେ। ଏହି ଟୁଇଟ ସହିତ କପିଲ ମଧ୍ୟ ତାଙ୍କ ଭିଡିଓ ଅପଲୋଡ କରିଛନ୍ତି।
