ଦାରିଙ୍ଗବାଡ଼ି,୨୬।୧(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ସିମନବାଡ଼ି ଶିବ ମନ୍ଦିର ପ୍ରାଙ୍ଗଣରେ ଚାଲିଥିବା ୩ ଦିନିଆ ଭାରତ ମାତା ପୂଜନ ଏବଂ ବିର୍ସାମୁଣ୍ଡାଙ୍କ ୧୫୦ତମ ଜନ୍ମ ଜୟନ୍ତୀ ଉତ୍ସବର ଦ୍ୱିତୀୟ ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ପ୍ରଶାନ୍ତ କୁମାର ସାହୁଙ୍କ ମଞ୍ଚ ପରିଚାଳନାରେ ଅନୁଷ୍ଠିତ ସାଂସ୍କୃତିକ କାର୍ଯ୍ୟକ୍ରମରେ ମୁଖ୍ୟ ଅତିଥିଭାବେ କନ୍ଧମାଳ ଏମ୍ପି ସୁକାନ୍ତ କୁମାର ପାଣିଗ୍ରାହୀ ଯୋଗଦେଇ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ।
ଅନ୍ୟତମ ଅତିଥି ଭାବେ ଜିଲାପରିଷଦ ମୁଖ୍ୟ ଉନ୍ନୟନ ଅଧିକାରୀ ଶମ୍ଭୁନାଥ ନନ୍ଦୀ, ବାଲିଗଡ଼ା ଆଇଟିଡିଏ ପ୍ରକଳ୍ପ ପ୍ରଶାସକ ଗଦାଧର ପାତ୍ର, ଅମରେଶ୍ୱର ମିଶ୍ର, ବଲିଉଡ଼ କଳାକାର ଗଦାଧର ବାରିକ, ଦୁର୍ଗାମାଧବ ଆଚାର୍ଯ୍ୟ, ନିରଞ୍ଜନ ପଣ୍ଡା, ଅବସରପ୍ରାପ୍ତ ପ୍ରଫେସର ପ୍ରଭୁଚରଣ ଲେଙ୍କା, ଅମରେଶ୍ୱର ମିଶ୍ର ପ୍ରମୁଖ ଯୋଗ ଦେଇଥିଲେ।
ବିର୍ସାମୁଣ୍ଡାଙ୍କ ଜନ୍ମ ଜୟନ୍ତୀ ଅବସରରେ ଗାଁ, ଗାଁରେ ଅନୁଷ୍ଠିତ ପଲିସଭା, ଗ୍ରାମ ସଭାରେ ଲୋକଙ୍କ ଅଧିକାର ଜଳ, ଜଙ୍ଗଲ, ଜମି ପାଇଁ ପ୍ରଶାସନସ୍ତରରେ କାର୍ଯ୍ୟ କରାଯାଇଥିବା ଜିଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ଶମ୍ଭୁନାଥ ନନ୍ଦୀ କହିଥିଲେ। ଏପରିକି କନ୍ଧମାଳ ଜିଲାରେ ମଧ୍ୟ ଅନେକ ସଂଗ୍ରାମୀ ଦେଶ ପାଇଁ ଶହୀଦ ହୋଇଥିବା କହିଥିଲେ। ଲୋକଙ୍କ ଜୀବନଜୀବିକାର ଉନ୍ନତି ପାଇଁ ପ୍ରଶାସନ କାର୍ଯ୍ୟ କରୁଛି, ଆହୁରି ମଧ୍ୟ କରିବ ବୋଲି ସେ କହିଥିଲେ ।
ଏହି ଅବସରେ ବାଲିଗୁଡ଼ା ଆଇଟିଡିଏ ପ୍ରକଳ୍ପ ପ୍ରଶାସକ ପାତ୍ର ବିର୍ସାମୁଣ୍ଡାଙ୍କ ଜୀବନୀ ବିଷୟରେ କହିବା ସହ ଜନଜାତିଙ୍କ ପାଇଁ ଆଇଟିଡିଏ ପକ୍ଷରୁ ନିଆଯାଇଥିବା ବିଭିନ୍ନ ପଦକ୍ଷେପ ସମ୍ପର୍କରେ ଅବଗତ କରିଥିଲେ।
ମୁଖ୍ୟ ଅତିଥି କନ୍ଧମାଳ ଏମପି କହିଥିଲେ ଯେ, କନ୍ଧମାଳ ହେଉଛି ପ୍ରକୃତ କ୍ଷେତ୍ର। କନ୍ଧମାଳ ଆଉ ପଛରେ ପଡିବ ନାହିଁ । ଜିଲାର ବିକାଶ ପାଇଁ ସରକାରଙ୍କ ପକ୍ଷରୁ ସମସ୍ତ ପ୍ରକାର ପଦକ୍ଷେପ ନିଆଯାଉଥିବା କହିଥିଲେ।
ଏହି ଅବସରରେ ବିଭିନ୍ନ କ୍ଷେତ୍ରରେ ପ୍ରତିଭା ଅର୍ଜନ କରିଥିବା ପ୍ରତିଭାଙ୍କୁ ସ୍ମାରକପତ୍ର ଦେଇ ସମ୍ବର୍ଦ୍ଧିତ କରାଯାଇଥିଲା। କାର୍ଯ୍ୟକ୍ରମରେ ଭୁବନେଶ୍ୱରର ସଙ୍ଗୀତ ଗୁରୁ ଲଳିତ ପାତ୍ର ଏବଂ ତାଙ୍କ ସାଥୀ କଣ୍ଠଶିଳ୍ପୀ ସନ୍ଦୀପ ମିଶ୍ର, ସୁଭ୍ରାଶୁଂ ମିଶ୍ର, ଚିନ୍ମୟୀ ସିଂଙ୍କ ଦ୍ୱାରା ଭଜନ ସଙ୍ଗୀତ ପରିବେଷଣ କରାଯାଇଥିଲା। ଏପରିକି ଗୋଟିପୁଅ, ଛଉ ନୃତ୍ୟ ସହ ଓଡ଼ିଶୀ ଆଦି ବିଭିନ୍ନ ରଙ୍ଗାରଙ୍ଗ କାର୍ଯ୍ୟକ୍ରମ ହୋଇଥିଲା।
