ଦାରିଙ୍ଗବାଡି, ୧୧/୧୦ (ଅରୁଣ ସାହୁ): ମାଓବାଦୀଙ୍କୁ ପ୍ରତିହତ କରିବାକୁ ଅଣ୍ଟା ଭିଡିଛି କନ୍ଧମାଳ ପୋଲିସ। ଗତ କିଛି ଦିନ ହେଲା ମାଓବାଦୀ କନ୍ଧମାଳ ଜିଲା ଦାରିଙ୍ଗବାଡି ଏବଂ ବ୍ରାହ୍ମଣୀଗାଁ ଥାନା ଅଞ୍ଚଳରେ ପୁଣି ନିଜ ଉପସ୍ଥିତ ଜାହିର କରିଥିବା ପୋଲିସ ପାଇଁ ମୁଣ୍ଡ ବିନ୍ଧାର କାରଣ ସାଜିଛି । ଏହାକୁ ପ୍ରତିହତ କରିବା ପାଇଁ ବ୍ରାହ୍ମଣୀଗାଁ ଥାନା ତାଜୁଙ୍ଗିଆ ପଞ୍ଚାୟତ କଲିଙ୍ଗି ଠାରେ ୧୦୮ ବିଏସଏଫ ବାଟାଲିୟନର ନୂତନ କ୍ୟାମ୍ପ ସ୍ଥାପନ କରାଯାଇଛି। ଏହାକୁ କନ୍ଧମାଳ ଏସପି ହରିଶ ବିଶି ନିଜେ ଉପସ୍ଥିତି ରହି ଜାତୀୟପତାକା ଉତ୍ତୋଳନ କରି ଉଦଘାଟନ କରିଛନ୍ତି। କ୍ୟାମ୍ପରେ ବିଏସଏଫ ଯବାନମାନେ ପହଞ୍ଚି ନିଜ ଶିବିରରେ କୁଟୀର ପ୍ରସ୍ତୁତି କରିବା ସହ ତାର ବାଡ଼ କରାଯିବା ସହ ସୁରକ୍ଷା ବ୍ୟବସ୍ଥାକୁ କଡାକଡି କରିଛନ୍ତି। ଏହି ଉଦଘାଟନୀ ଉତ୍ସବରେ ଜନସମ୍ପର୍କ ଶିବିରର ଆୟୋଜନ କରାଯିବା ସହ ମାଗଣା ଚିକିତ୍ସା, ଶୀତ ବସ୍ତ୍ର, ପୋଷାକ ପିଲାଙ୍କୁ ଖାତା, କଲମ ଆଦି ବଣ୍ଟନ କରାଯାଇଛି। ଏହି ବାଟାଲିୟନ ଏବେ ଉକ୍ତ ଅଞ୍ଚଳରେ ଜୋରଦାର କମ୍ବିଂ ଅପରେଶନ କରିବା ସହ ମାଓବାଦୀଙ୍କ ଗତିବିଧି ଉପରେ ନଜର ରଖିବ ବୋଲି କୁହାଯାଇଛି। ଏହି ଉଦଘାଟନୀ ଉତ୍ସବରେ ବ୍ରାହ୍ମଣୀଗାଁ ଥାନା ଅଧିକାରୀ ବିଜୟ କୁମାର ହାଇବୁରୁ, ସବଇନ୍ସପେକ୍ଟର ଅମରେନ୍ଦ୍ର ସୁବୁଦ୍ଧି ଓ ଅନ୍ୟ କର୍ମଚାରି ଉପସ୍ଥିତ ରହି ପରିଚାଳନା କରିଥିଲେ। ଜିଲା ପୋଲିସ ଦାରିଙ୍ଗବାଡି ଥାନା ଅଞ୍ଚଳର ବିଭିନ୍ନ ସ୍ଥାନରେ ଏଭଳି କ୍ୟାମ୍ପ କରିବା ପାଇଁ ପ୍ରସ୍ତୁତି ହେଉଥିବା ଜଣାପଡିଛି।
Dharitri – Odisha’s No.1 Odia Daily
