ନୂଆଦିଲ୍ଲୀ,୧୮।୨: ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ କମଲ ନାଥ ଭାଜପାରେ ଯୋଗଦେବା ନେଇ କଳ୍ପନାଜଳ୍ପନା ଚାଲିଛି। ଏସବୁ ଭିତରେ ଆଉ ଏକ ଚର୍ଚ୍ଚା ହେଉଛି କମଲ ନାଥ ଭାଜପାରେ ରାଜନୀତିରୁ ଅବସର ଘୋଷଣା କରିବେ। ତାଙ୍କ ପୁଅ ତଥା ଏମ୍ପି ନକୁଲ ନାଥ ଏବଂ ବୋହୂ ପ୍ରିୟା ନାଥ ଭାଜପାରେ ଯୋଗଦେବେ।
କମଲ ନାଥ ତାଙ୍କ ରାଜନୈତିକ ଯାତ୍ରାର ଶେଷ ପର୍ଯ୍ୟାୟରେ ଥିବାରୁ ଏହା କୁହାଯାଉଛି। ତାଙ୍କର ବୟସ ପ୍ରାୟ ୭୭ବର୍ଷ। ଏଭଳି ପରିସ୍ଥିତିରେ ତାଙ୍କ ପାଇଁ ରାଜନୀତିରେ ବେଶୀ କିଛି ସମ୍ଭାବନା ନାହିଁ। ସେ ରାଜନୈତିକ ଜୀବନର ଶେଷ ପର୍ଯ୍ୟାୟରେ ଭାଜପାରେ ଯୋଗ ଦେଇ ନିଜର ଭାବମୂର୍ତ୍ତିକୁ ନଷ୍ଟ କରିବାକୁ ଚାହୁଁନାହାଁନ୍ତି। କମଲ ନାଥ ୨୨ ବର୍ଷ ବୟସରେ କଂଗ୍ରେସରେ ଯୋଗ ଦେଇଥିଲେ। ଏହା ପରେ ସେ ସଂଗଠନରେ ଅନେକ ପଦବୀରେ ଅବସ୍ଥାପିତ ହୋଇଥିଲେ, ଅନେକ ଥର କେନ୍ଦ୍ର ମନ୍ତ୍ରୀ ହୋଇଥିଲେ ଏବଂ ପରେ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ହୋଇଥିଲେ।
ନକୁଲ ନାଥ ବର୍ତ୍ତମାନ ଓ୍ବିଣ୍ଡୱାରାର ଏମ୍ପି। ଯଦି ସେ ଭାଜପାର ଯୋଗ ଦିଅନ୍ତି ତେବେ ସେ ଏହି ଆସନରୁ ଲୋକ ସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ। ଏଥି ସହିତ କମଲ ନାଥ ରାଜନୀତିରୁ ଅବସର ନେବା ପରେ ତାଙ୍କ ବିଧାନସଭା ଆସନ ଖାଲି ହୋଇଯିବ, ଯେଉଁଠାରୁ ପ୍ରିୟା ଉପ-ନିର୍ବାଚନରେ ବିଜୟୀ ହୋଇ ବିଧାନସଭାକୁ ଯାଇପାରିବେ।
ଭାଜପାରେ ଯୋଗଦେବା ବିଷୟରେ ପ୍ରଶ୍ନ ପଚାରିବାରୁ କମଲ ନାଥ କହିଛନ୍ତି- ମୁଁ ଗତକାଲି କହିଥିଲି ଯେ ଯଦି ଏପରି କିଛି ଘଟେ ତେବେ ମୁଁ ତୁମ ସମସ୍ତଙ୍କୁ କହିବି। ମୁଁ କାହା ସହିତ କଥାବାର୍ତ୍ତା କରି ନାହିଁ। ଆଜି ବି ତାହା ହିଁ କହୁଛି।
କମଲ ନାଥ ଶନିବାର ଦିନ ତାଙ୍କ ପୁଅ ନକୁଲ ନାଥଙ୍କ ସହ ଦିଲ୍ଲୀରେ ପହଞ୍ଚିଥିଲେ। ଏହା ପରେ ତାଙ୍କ ଭାଜପାରେ ଯୋଗଦେବା ନେଇ ଚର୍ଚ୍ଚା ଜୋର ଧରିଛି।
