ଦାରିଙ୍ଗବାଡ/ଭଞ୍ଜନଗର,୨୩।୯(ଅରୁଣ ସାହୁ/ବାବୁଲା ପ୍ରଧାନ): ଆସନ୍ତା ୩୦ ତାରିଖ ଯାଏଁ ବନ୍ଦ ରହିବ କଳିଙ୍ଗା ଘାଟି ରାସ୍ତା। ସୋମବାର ଦ୍ବିତୀୟ ଭୂସ୍ଖଳନ ପରେ କନ୍ଧମାଳ ଜଲାପାଳଙ୍କ ଏହି ନିଷ୍ପତ୍ତି ନେଇଛନ୍ତି। ଘାଟିରେ ସ୍ଥିତି ଅନୁଧ୍ୟାନ ପରେ ଜିଲାପାଳ ଏହି ନିର୍ଣ୍ଣୟ ନେଇଥିବା ଜଣପଡ଼ିଛି। ତେବେଞ୍ଜନଗର ଓ ସୁବର୍ଣ୍ଣପୁରରୁ ୨ଟି ଏକ୍ସପର୍ଟ ଟିମ ଯାଇ ଘଟଣାସ୍ଥଳରେ ସ୍ଥିତି ଅନୁଧ୍ୟାନ କରିବ ବୋଲି ଜିଲାପାଳ କହିଛନ୍ତି।
ବିଗତ ୧୫ ଦିନ ମଧ୍ୟରେ କଳିଙ୍ଗା ଘାଟିରୁ ୫ରୁ ଊଦ୍ଧର୍ବ ଥର ପଥର ଖସିଲାଣି। ଗତ ୧୬ ତାରିଖରେ ବଡ଼ ଧରଣର ପଥର ସବୁ ଝରଣାରେ ଗଡି ଗଡ଼ି ପାହାଡ ତଳକୁ ଆସିଥିଲା। ଫଳରେ ଭଞ୍ଜନଗର ଫୁଲବାଣୀ ଜାତୀୟ ରାଜପଥର ଏକାଧିକ ସ୍ଥାନରେ ରାସ୍ତା ଧୋଇ ହୋଇଯାଇଥିଲା। ତେଣୁ ଆଜକୁ ଏକ ସପ୍ତାହ ହେବ ଜାତୀୟ ରାଜପଥ ଉପରେ ଯାତାୟତ ବନ୍ଦ ଅଛି । ଆଗକୁ ରାସ୍ତା ସ୍ବଭାବିକ ହେବାକୁ ବହୁତ ଦିନ ଲାଗିଯିବ।
ଗତ ୧୬ ତାରିଖରେ ବହୁ ପରିମାଣର ପଥର ଖସିଥିଲା। ସେଥିମଧ୍ୟରୁ ଆହୁରି ଶହ ଶହ ପଥର ବିପଦଶଙ୍କୁଲ ଅବସ୍ଥାରେ ରାସ୍ତା କଡର ପାହାଡ ଉପରେ ରହିଛି। ବର୍ତ୍ତମାନ ରାସ୍ତା ସ୍ବଭାବିକ ପାଇଁ ବଡବଡ ହାଇୱା ଗାଡ଼ି ଲାଗିଛି। ମାତ୍ର ଉକ୍ତ ଗାଡ଼ି ଏବଂ ବାରମ୍ବାର ବର୍ଷାର ପ୍ରଭାବରେ ପୁଣି ପଥର ଖସୁଛି। ଯେଉଁ ପଥର ଗୁଡ଼ିକ ବିପଦ ସଙ୍କୁଳ ଅବସ୍ଥାରେ ଅଛି ତାହା ଖସୁଛି। ସୋମବାର ଦିନକ ମଧ୍ୟରେ ୩ ଥର ପଥର ଖସିଛି। ଖବର ପାଇ ସନ୍ଧ୍ୟାରେ ଭଞ୍ଜନଗର ତହସିଲଦାର ଅଭିପ୍ସା ପଟ୍ଟନାୟକ, ଅତିରିକ୍ତ ତହସିଲଦାର ଅବିନାଶ ମହାର ପ୍ରମୁଖ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି।
