କୋକସରା,୭।୫(ଦୁଷ୍ମନ୍ତ କୁମାର ପାଟ୍ଟଯୋଷୀ): କାଳବୈଶାଖୀ ଆଣିଛି ତାତିରୁ ଶାନ୍ତି, ହେଲେ ଏହାର ପ୍ରଭାବରେ ବଡ ବଡ ଗଛ ସହ ବିଦ୍ୟୁତ ଖୁଣ୍ଟ ଉପୁଡି ପଡି ଉପାନ୍ତ ଅଞ୍ଚଳରେ ବିଦ୍ୟୁତ ସେବା ପ୍ରଭାବିତ ହୋଇଥିବା ଦେଖିବାକୁ ମିଳିଛି। ମଙ୍ଗଳବାର ଭୋର ସମୟରେ ହାଠାତ କାଳବୈଶାଖୀ ସହ ପ୍ରବଳ ବେଗରେ ପବନ ଓ ଝିପି ଝିପି ବର୍ଷା ହୋଇଥିଲା। ତେବେ ବିଗତ କିଛି ଦିନରୁ ପ୍ରଚଣ୍ଡ ଖରାରୁ ଲୋକଙ୍କୁ ସାମୟିକ ଭାବେ ଆଶ୍ୱସ୍ତି ମିଳିଥିବାବେଳେ କାଳବୈଶାଖୀ ପ୍ରଭାବରେ ହୋଇଥିବା ଝଡତୋଫାନରେ କୋକସରା ବ୍ଲକର ବଡକେନ୍ଦୁଗୁଡା, ଡୁଡୁକାଠେଙ୍ଗା, ଖଲିଗଡ, ଦାବ୍ରିଗୁଡା, ଆମପାଣି ସହ ୨୫ରୁ ଉଦ୍ଧର୍ବ ଗାଁରେ ବିଦ୍ୟୁତ ସେବା ବ୍ୟାହତ ହୋଇଥିବା ଜଣାପଡିଛି।
କାଳବୈଶାଖୀର ପ୍ରଭାବ ଏତେ ଜୋରରେ ଥିଲା ଯେ ଆମପାଣି ଗ୍ରାମ ବସଷ୍ଟାଣ୍ଡ ନିକଟରେ ଥିବା ଏକ ଘରେ ଏକ ବିରାଟ ତେନ୍ତୁଳି ଗଛ ଦୁଇ ଜଣଙ୍କ ଘର ଉପରେ ପଡିବାରୁ ପରିବାର ଲୋକେ ଅଳ୍ପକେ ବର୍ତ୍ତି ଯାଇଥିବା ବେଳେ ଘର ନଷ୍ଟ ହୋଇଛି। ଖବର ପାଇ କୋକସରା ଦମକଳ କର୍ମଚାରୀ ମାନେ ପହଞ୍ଚି ଗଛ କାଟି ହଟାଇଥିଲେ। ଅନ୍ୟପଟେ ଉପାନ୍ତ ଅଞ୍ଚଳକୁ ଯୋଗାଣ ହେଉଥିବା ବଡ଼ ବଡ଼ ବିଦ୍ୟୁତ ଖୁଣ୍ଟକୁ ଧରାଶାୟୀ କରିଦେଇଛି। ଡୁଡୁକାଠେଙ୍ଗା ପଞ୍ଚାୟତର ବଡ଼କଛାରକୁ ସଂଯୋଗ କରୁଥିବା ବିଦ୍ୟୁତ ଖୁଣ୍ଟକୁ ଉପାଡି ଦେଇଛି, ଫଳରେ ଏହି ଅଞ୍ଚଳରେ ବିଦ୍ୟୁତ ସେବା ଖବର ଲେଖା ଯିବା ପର୍ଯ୍ୟନ୍ତ ଠପ ହୋଇପଡିଛି। ଏନେଇ ସରପଞ୍ଚ ହରିପ୍ରିୟା ନାଗ ବିଦ୍ୟୁତ ବିଭାଗ ଅଧିକାରୀଙ୍କୁ ସୂଚନା ଦେଇଥିଲେ ଓ ଖବର ପାଇଁ ବିଦ୍ୟୁତ ବିଭାଗର କର୍ମଚାରୀ ମାନେ ମରାମତି କାର୍ଯ୍ୟ ଜାରି ରଖିଥିବା ସୂଚନା ମିଳିଛି।
