ନୂଆଦିଲ୍ଲୀ,୨୪ା୧୨: ସୁପ୍ରିମକୋର୍ଟର ପୂର୍ବତନ ବିଚାରପତି ଜଷ୍ଟିସ୍ ଭି. ରାମସୁବ୍ରମଣ୍ୟନ୍ଙ୍କୁ ଭାରତର ଜାତୀୟ ମାନବାଧିକାର ଆୟୋଗ (ଏନ୍ଏଚ୍ଆର୍ସି)ର ୯ମ ଅଧ୍ୟକ୍ଷ ନିଯୁକ୍ତ କରାଯାଇଛି। ପୂର୍ବରୁ ଏନ୍ଏଚ୍ଆର୍ସି ଅଧ୍ୟକ୍ଷ ଥିବା ସୁପ୍ରିମକୋର୍ଟର ଅବସରପ୍ରାପ୍ତ ବିଚାରପତି ଅରୁଣ କୁମାର ମିଶ୍ରଙ୍କ କାର୍ଯ୍ୟକାଳ ଗତ ଜୁନ୍ ୧ରେ ଶେଷ ହେବା ପରେ ଏହି ପଦବୀ
ଖାଲି ପଡ଼ିଥିଲା। ଜଷ୍ଟିସ୍ ରାମସୁବ୍ରମଣ୍ୟନ୍ ୨୦୧୯ରୁ ୨୦୨୩ ସର୍ବୋଚ୍ଚ ଅଦାଲତର ବିଚାରପତି ରହିଥିଲେ।
ଏହା ପୂର୍ବରୁ ସେ ହିମାଚଳପ୍ରଦେଶ ହାଇକୋର୍ଟର ମୁଖ୍ୟ ବିଚାରପତି ଥିଲେ। ୨୦୦୬ରେ ସେ ମାଡ୍ରାସ୍ ହାଇକୋର୍ଟର ଅତିରିକ୍ତ ବିଚାରପତି ନିଯୁକ୍ତ ହୋଇଥିଲେ ଏବଂ ନିଜ ନିବେଦନକ୍ରମେ ଅବିଭକ୍ତ ଆନ୍ଧ୍ରପ୍ରଦେଶ ହାଇକୋର୍ଟକୁ ବଦଳି ହୋଇଥିଲେ। ଆନ୍ଧ୍ରପ୍ରଦେଶରୁ ଅଲଗା ହୋଇ ତେଲଙ୍ଗାନା ଗଠନ ହେବା ପରେ ୨୦୧୯ରେ ରାମସୁବ୍ରମଣ୍ୟନ୍ ତେଲଙ୍ଗାନା ହାଇକୋର୍ଟର ବିଚାରପତି ରହିଥିଲେ। ସ୍କାଇପେ’ରେ ମାମଲା ଶୁଣାଣି କରିବାରେ ସେ ପ୍ରଥମ ବିଚାରପତି। ରାମସୁବ୍ରମଣ୍ୟନ୍ଙ୍କ ଖଣ୍ଡପୀଠ ଅଭିବ୍ୟକ୍ତି ସ୍ବାଧୀନତା ଉପରେ ଜୋର୍ ଦେଇଥିଲେ। ସାରା ବିଶ୍ୱରେ ମାନହାନି ମାମଲା ଏକ ଟ୍ରେଣ୍ଡ ହୋଇଯାଇଥିବାରୁ ତାହାକୁ ଅପରାଧମୁକ୍ତ କରାଯିବା ଉଚିତ ବୋଲି ଉକ୍ତ ଖଣ୍ଡପୀଠ କହିଥିଲେ।
ଏନ୍ଏଚ୍ଆର୍ସିର ନୂଆ ଅଧ୍ୟକ୍ଷ ଚୟନ ପାଇଁ ଗତ ୧୮ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଉଚ୍ଚକ୍ଷମତାସମ୍ପନ୍ନ କମିଟି ବୈଠକ ବସିଥିଲା। ଏଥିରେ ଲୋକ ସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ ଏବଂ ରାଜ୍ୟ ସଭାର ବିରୋଧୀ ଦଳ ନେତା ମଲ୍ଲିକାର୍ଜୁନ ଖାର୍ଗେ ଯୋଗଦେଇଥିଲେ।
