ରାୟଗଡ଼ା ଅଫିସ/ରାୟଗଡ଼ା(ସ୍ବ.ପ୍ର.),୨୧ା୩- ରାୟଗଡ଼ା ଜିଲା କାଶୀପୁର ବ୍ଲକରେ କାର୍ଯ୍ୟରତ ପୂର୍ତ୍ତ ବିଭାଗ କନିଷ୍ଠ ଯନ୍ତ୍ରୀ ଗୋପୀନାଥ କିଷାନ ୪ ମହିଳାଙ୍କୁ ବିବାହ କରିଥିବା ଅଭିଯୋଗରେ ଗିରଫ ହୋଇଛନ୍ତି। ଚତୁର୍ଥ ସ୍ତ୍ରୀ ସୁନୀତା ମାଧିଆ ଓରଫ ସୁନୀତା କିଷାନଙ୍କ ଅଭିଯୋଗ ପ୍ରକାରେ କନିଷ୍ଠ ଯନ୍ତ୍ରୀଙ୍କୁ ଗିରଫ ପରେ ମଙ୍ଗଳବାର କୋର୍ଟ ଚାଲାଣ କରାଯାଇଛି।
କନିଷ୍ଠ ଯନ୍ତ୍ରୀ କିଶାନଙ୍କ ପ୍ରଥମ ସ୍ତ୍ରୀଙ୍କ ମୃତ୍ୟୁ ପରେ ସୁନ୍ଦରଗଡ଼ରେ ଆଉ ଜଣଙ୍କୁ ବିବାହ କରିଥିଲେ। ତାଙ୍କୁ ଶାରିରୀକ ଓ ମାନସିକ ନିର୍ଯାତନା ଦେବା ପରେ କୌଣସି କାରଣ ନ ଥାଇ ଛାଡି ଦେଇଥିଲେ। ପରେ ଗୋପୀନାଥ ରାଉରକେଲାର ଜଣେ ଯୁବତୀଙ୍କୁ ତୃତୀୟ ବିବାହ କରିଥିଲେ। ତାଙ୍କୁ ମଧ୍ୟ ନିର୍ଯାତନା ଦେଇ ଛାଡ଼ି ଦେଇଥିଲେ। ୨୦୨୨ ଫେବୃୟାରୀ ମାସରେ ଗୋପୀନାଥ ଛତିଶଗଡ଼ର ଚକ୍ରଧର ନଗର ଥାନା ଅଞ୍ଚଳର ସୁନୀତା ମାଧିଆଙ୍କୁ ଝାରସୁଗୁଡ଼ା ଠାରେ ବିବାହ କରିଥିଲେ। ପୂର୍ବରୁ ଅନ୍ୟ ୩ ଜଣଙ୍କୁ ଗୋପୀନାଥ ବିବାହ କରିଥିବା ସୁନୀତା ଜାଣିବା ପରେ ଏ ନେଇ ତାଙ୍କୁ ପଚାରିଥିଲେ। ଏହାପରଠାରୁ ସୁନିତାଙ୍କୁ ସେ ଅଧିକ ଯୌତୁକ ଆଣିବାକୁ କହି ନିର୍ଯାତନା ଦେବା ଆରମ୍ଭ କରି ଦେଇଥିଲେ। ଏଥିରେ ପ୍ରଥମ ସ୍ତ୍ରୀଙ୍କ ମା’ ମଧ୍ୟ ସାମିଲ ଥିଲେ ବୋଲି ସୁନୀତା ଅଭିଯୋଗରେ ଦର୍ଶାଇଛନ୍ତି। ଅଭିଯୋଗ ମିଳିବା ପରେ ରାୟଗଡ଼ା ପୋଲିସ ଘଟଣାର ତଦନ୍ତ କରି କନିଷ୍ଠ ଯନ୍ତ୍ରୀଙ୍କୁ ସାଇପ୍ରିୟା ନଗରସ୍ଥିତ ତାଙ୍କ ଘରୁ ଗିରଫ କରିଥିଲା। ଏ ନେଇ ନଂ.୯୦/୨୩ରେ ମାମଲା ରୁଜୁ କରି ପୋଲିସ ଅଧିକ ତଦନ୍ତ ଚଳାଇଛି। ଘଟଣା ସମ୍ପର୍କରେ ପୂର୍ତ୍ତ ବିଭାଗ ନିର୍ବାାହୀ ଯନ୍ତ୍ରୀଙ୍କୁ ଅବଗତ କରାଯାଇଛି।
