ଭୁବନେଶ୍ୱର, ୨୨।୧୨ (କ୍ରୀଡ଼ା ପ୍ରତିନିଧି): କିଟ୍ର ବିଜୁ ପଟ୍ଟନାୟକ ଇନ୍ଡୋର ଷ୍ଟାଡିୟମରେ ଚାଲିଥିବା ଜାତୀୟ ଜୁନିୟର (୧୯ ବର୍ଷରୁ କମ୍) ବ୍ୟାଡ୍ମିଣ୍ଟନ ଚାମ୍ପିୟନଶିପ୍ର ଦଳଗତ ପ୍ରତିଯୋଗିତା ବୁଧବାର ଶେଷ ହୋଇଛି। ଏହାର ଫାଇନାଲରେ ହରିୟାଣାକୁ ହରାଇ ତାମିଲନାଡ଼ୁ ଚାମ୍ପିୟନ ହୋଇଛି। ଉତ୍ତରାଖଣ୍ଡ ଓ ମଣିପୁର ତୃତୀୟ ସ୍ଥାନରେ ରହି ବ୍ରୋଞ୍ଜ ପଦକ ହାସଲ କରିଛନ୍ତି। ଫାଇନାଲର ବାଳକ ସିଙ୍ଗଲ୍ସରେ ହରିୟାଣାର ମନରାଜ ସିଂ ତାମିଲନାଡ଼ୁର କେ.ଏମ. ନିଧିଙ୍କୁ ୨୧-୧୧, ୨୧-୧୯ରେ ହରାଇଥିବାବେଳେ ବାଳିକା ସିଙ୍ଗଲ୍ସରେ ତାମିଲନାଡ଼ୁର ରକ୍ଷିତା ଶ୍ରୀ ୧୮-୨୧, ୨୧-୧୩, ୨୧-୯ରେ ହରିୟାଣାର ଖରବ ଅନମୋଲଙ୍କୁ ପରାସ୍ତ କରିଛନ୍ତି। ବାଳକ ଡବଲ୍ସରେ ତାମିଲନାଡ଼ୁର ଆୟାପ୍ପାନ ଦେବ ଓ ଆୟାପ୍ପାନ ଧିରେନ ଯୋଡ଼ି ୨୨-୨୦, ୨୧-୧୫ରେ ହରିୟାଣାର ବୁଧଓ୍ବାର ଅନଶୁଲ ଓ ମନରାଜ ସିଂଙ୍କୁ ହରାଇ ଦେଇଛନ୍ତି।
ବାଳିକା ଡବଲ୍ସରେ କିନ୍ତୁ ହରିୟାଣାର ଅନମୋଲ ଖରବ ଓ ତୁର ରିଧି କୌର ଯୋଡ଼ି ତାମିଲନାଡ଼ୁର ବାଲାଜ ଶ୍ରେୟା ଓ ଏନ. ଶ୍ରୀନିଧିଙ୍କୁ ୨୧-୧୮, ୨୨-୨୦ରେ ହରାଇ ମୁକାବିଲାକୁ ୨-୨ କରି ଦେଇଥିଲେ। ନିର୍ଣ୍ଣାୟକ ମିକ୍ସଡ ଡବଲ୍ସରେ ତାମିଲନାଡ଼ୁର ଆର. ଅରୁଲଭୁରୁଗାନ ଓ ଏନ. ଶ୍ରୀନିଧି ଯୋଡ଼ି ବିପକ୍ଷ ଦଳର ବାହାଦୂର ଅନସୁଲ ଓ ତୁର ରିଧି କୌରଙ୍କୁ ୨୧-୧୪, ୧୭-୨୧, ୨୯-୨୭ରେ ହରାଇ ଦେଇଥିଲେ। ରାଜ୍ୟ ସରକାରଙ୍କ କ୍ରୀଡ଼ା ବିଭାଗର ଯୁଗ୍ମ ସଚିବ ଶୁଭ୍ରାଂଶୁ ମିଶ୍ରଙ୍କ ଆବାହକତ୍ୱରେ ଅନୁଷ୍ଠିତ ଉଦ୍ଯାପନୀ ଉତ୍ସବରେ ବିଏମ୍ସି କମିଶନର ବିଜୟ ଅମୃତ କୁଲାଙ୍ଗେ ମୁଖ୍ୟ ଅତିଥି, କ୍ରୀଡ଼ା ବିଭାଗ ଓଏସ୍ଡି ସୋନାଲି ଚାନ୍ଦ ସମ୍ମାନିତ ଅତିଥିଭାବେ ଯୋଗଦେଇଥିଲେ। ଅନ୍ୟମାନଙ୍କ ମଧ୍ୟରେ ବ୍ୟାଡ୍ମିଣ୍ଟନ ଆସୋସିଏଶନ ଅଫ୍ ଇଣ୍ଡିଆ ଉପସଭାପତି ଏସ. ମୁରଲୀଧରନ, ଯୁଗ୍ମ ସମ୍ପାଦକ ଓମାର ରଶିଦ, କେରଳ ରାଜ୍ୟ ବ୍ୟାଡ୍ମିଣ୍ଟନ ଆସୋସିଏଶନ ପ୍ରତିନିଧି ରାକେଶ ଶେଖର, ବିଡବ୍ଲ୍ୟୁଏଫ୍ ରେଫରି ଗିରିଶ ନାଟୁ, ମ୍ୟାଚ ରେଫରି ଉଦୟ ସାନେ, ଆୟୋଜକ କମିଟି ସମ୍ପାଦକ ନିଲେନ କୁମାର ପ୍ରମୁଖ ଉପସ୍ଥିତ ଥିଲେ।
