ମୁମ୍ବାଇ,୭।୨ : ବମ୍ବେ ହାଇକୋର୍ଟ ଏକ ମାମଲାର ଶୁଣାଣି ବେଳେ କହିଛନ୍ତି ଯେ ଭିତ୍ତିହୀନ ଅଭିଯୋଗ ଦ୍ୱାରା ବଦନାମ ତଥା ହାନୀ ହୋଇଥିବା ମାନ-ସମ୍ମାନକୁ ନ୍ୟାୟିକ ପ୍ରକ୍ରିୟା ଫେରାଇ ଆଣିପାରିବ ନାହିଁ। ବମ୍ବେ ହାଇକୋର୍ଟର ଔରଙ୍ଗାବାଦ ବେଞ୍ଚ ଜଣେ ନ୍ୟାୟିକ ଅଧିକାରୀଙ୍କ ବିରୋଧରେ ଦାଖଲ ହୋଇଥିବା ଏଫଆଇଆର ବନ୍ଦ କରିବାକୁ ନିର୍ଦ୍ଦେଶ ଦେଇଥିବା ବେଳେ ଏଭଳି ମନ୍ତବ୍ୟ ଦେଇଛନ୍ତି। ନ୍ୟାୟିକ ଅଧିକାରୀଙ୍କ ବୋହୂ ଶାରୀରିକ ତଥା ମାନସିକ ନିର୍ଯାତନା ଅଭିଯୋଗରେ ନଭେମ୍ବର ୨୦୧୯ ରେ ଜଲଗାଓଁ ପୋଲିସ ଷ୍ଟେଶନରେ ଅଧିକାରୀ, ତାଙ୍କ ଭାଇ ଏବଂ ପିତାମାତାଙ୍କ ବିରୋଧରେ ଏଫଆଇଆର ଦାଖଲ କରିଥିଲେ।
ଯେଉଁଥିରେ ୪୦ ବର୍ଷ ବୟସ୍କା ମହିଳା ନ୍ୟାୟିକ ଅଧିକାରୀ ନିଜ ବିରୋଧରେ ଏବଂ ତାଙ୍କ ପରିବାର ସଦସ୍ୟଙ୍କ ବିରୋଧରେ ପଞ୍ଜୀକୃତ ହୋଇଥିବା ଏଫଆଇଆର୍ ରଦ୍ଦ କରିବାକୁ ଦାବି କରି ହାଇକୋର୍ଟର ଡିଭିଜନ ବେଞ୍ଚରେ ଆବେଦନ କରିଥିଲେ। ଏହା ଶୁଣାଣି କରି ଜଷ୍ଟିସ ଅନୁଜା ପ୍ରଭୁଦେଶାଇ ଏବଂ ଜଷ୍ଟିସ ଆରଏମ ଯୋଶୀ ଜାନୁଆରୀ ୭ ରେ ଦେଇଥିବା ଆଦେଶରେ କହିଛନ୍ତି ଯେ ନାଗରିକଙ୍କ ପାଇଁ ସମ୍ମାନର ଅଧିକାର ସମ୍ବିଧାନର ଧାରା ୨୧ ଏବଂ ୧୯ (୨) ର ଏକ ଅବିଚ୍ଛେଦ୍ୟ ଅଙ୍ଗ।
ଆବେଦନରେ କୁହାଯାଇଛି ଯେ ଆବେଦନକାରୀଙ୍କୁ ବୈବାହିକ ବିବାଦରେ ଜାଣିଶୁଣି ଅଯଥାରେ ସାମିଲ କରାଯାଇଛି। ଏହି ଆବେଦନ ଶୁଣାଣି ବେଳେ କୋର୍ଟ କହିଛନ୍ତି ଯେ ଆବେଦନକାରୀଙ୍କ ବିରୋଧରେ ଆସିଥିବା ଅଭିଯୋଗ ସତ୍ୟ ବୋଲି ଗ୍ରହଣ କଲେ ମଧ୍ୟ ଆବେଦନକାରୀଙ୍କ ବିରୋଧରେ ତଦନ୍ତ ଯଥାର୍ଥ ହୋଇପାରିବ ନାହିଁ। ବେଞ୍ଚ କହିଛନ୍ତି ଯେ ଭିତ୍ତିହୀନ ଅଭିଯୋଗ ଏବଂ ଦୀର୍ଘ ଦିନର କୋର୍ଟ ପ୍ରକ୍ରିୟା ନକାରାତ୍ମକ ପ୍ରଭାବ ପକାଇପାରେ। ଏପରି ପରିସ୍ଥିତିରେ ବ୍ୟକ୍ତିଙ୍କୁ ଗୁରୁତର ମାନସିକ ଆଘାତ, ବଦନାମ ଏବଂ ଆର୍ଥିକ କ୍ଷତି ସହିବାକୁ ପଡିବ। ଏହା ବ୍ୟକ୍ତିଙ୍କର କ୍ୟାରିୟର ଏବଂ ଭବିଷ୍ୟତ ଉପରେ ମଧ୍ୟ ଗୁରୁତର ପ୍ରଭାବ ପକାଇପାରେ।
ଅଦାଲତ ତାଙ୍କ ମନ୍ତବ୍ୟରେ କହିଛନ୍ତି ଯେ ଖ୍ୟାତି, ଚରିତ୍ରର ବଦନାମ ତାଙ୍କ ବନ୍ଧୁ ଏବଂ ସମ୍ପର୍କୀୟଙ୍କ ମଧ୍ୟରେ ଜଣେ ବ୍ୟକ୍ତିଙ୍କ ଭାବମୂର୍ତ୍ତିକୁ କ୍ଷୁର୍ଣ୍ଣ କରିଥାଏ। ଏଠାରେ ଧ୍ୟାନ ଦେବାକୁ ହେବ ଯେ ନ୍ୟାୟିକ ପ୍ରକ୍ରିୟା ଦ୍ୱାରା ବଦନାମ ହୋଇଥିବା ସମ୍ମାନର ପୁନରୁଦ୍ଧାର ହୋଇପାରିବ ନାହିଁ । ଆବେଦନକାରୀ ଏବଂ ତାଙ୍କ ପରିବାର ସଦସ୍ୟଙ୍କ ବିରୋଧରେ ପଞ୍ଜୀକୃତ ହୋଇଥିବା ଏଫଆଇଆର୍ ଖାରଜ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି ଏବଂ ବ୍ୟକ୍ତିଗତ ଶତ୍ରୁତା ପାଇଁ ଆଇନ ପ୍ରକ୍ରିୟାକୁ ଅପବ୍ୟବହାର କରାଯାଇପାରିବ ନାହିଁ ବୋଲି କହିଛନ୍ତି।
