ମୁମ୍ବାଇ,୧୯।୩ : ଉଦ୍ଧବ ଠାକରେ ଦଳର ଏମ୍ପି ସଞ୍ଜୟ ରାଉତ ଭାଜପା ସରକାରଙ୍କୁ ରବିବାର କଡ଼ା ସମାଲୋଚନା କରଛନ୍ତି। ସେ କଂଗ୍ରେସର ରାହୁଲ ଗାନ୍ଧୀଙ୍କୁ ମଧ୍ୟ ସୁରକ୍ଷା କରିଛନ୍ତି। ବିରୋଧୀ ଦଳର ନେତାଙ୍କୁ ସରକାରଙ୍କ ବିରୋଧରେ କହିବାକୁ ଅନୁମତି ଦିଆଯାଉ ନାହିଁ ବୋଲି ରାଉତ ଅଭିଯୋଗ କରିଛନ୍ତି। ଦେଶରେ ଚାଲିଥିବା ଏକଛତ୍ରବାଦୀ ଶାସନ ବିରୋଧରେ କଂଗ୍ରେସ ନେତା ରାହୁଲ ସ୍ବର ଉତ୍ତୋଳନ କରିଛନ୍ତି। ସେଥିପାଇଁ ତାଙ୍କ ଏମ୍ପି ସଦସ୍ୟତା ରଦ୍ଦ କରିବାକୁ ଭାଜପା ନେତାଏ ଦାବି କରୁଛନ୍ତି। ଏହା ପଛରେ ରାହୁଲଙ୍କ ପ୍ରତତି ସେମାନଙ୍କର ଭୟ ଥିବା ସ୍ପଷ୍ଟ ହେବାରେ ଲାଗିଛି।
ଆଇନ ମନ୍ତ୍ରୀ କିଛି ବିଚାରପତିଙ୍କୁ ଭାରତ ବିରୋଧୀ ଦଳର ଅଂଶ ବୋଲି କହିଛନ୍ତି। ଏହା ନ୍ୟାୟପାଳିକା ଉପରେ ଚାପ ପକାଇବା ଏବଂ ବିଚାରପତିମାନଙ୍କୁ ଧମକ ଦେବା ପାଇଁ ଏକ ପ୍ରୟାସ।
ସେ ଆଇନ ମନ୍ତ୍ରୀ କିରେନ ରିଜିଜୁଙ୍କ ବିଷୟରେ ମଧ୍ୟ ଉଲ୍ଲେଖ କରି କହିଛନ୍ତି, ନ୍ୟାୟପାଳିକାକୁ ଧମକ ଦିଆଯାଉଛି। ଆଇନ ମନ୍ତ୍ରୀ ନ୍ୟାୟପାଳିକାକୁ ବିଭିନ୍ନ କ୍ଷେତ୍ରରେ ଅପଦସ୍ଥ କରୁୁଛନ୍ତି।
ଆଇନ ମନ୍ତ୍ରୀ ବିଚାରପତିଙ୍କୁ ଧମକ ଦେଉଛନ୍ତି, ଯେଉଁଠି ଦିନେ ବାବାସାହେବ ଭୀମରାଓ ଆମ୍ବେଡକର ସମ୍ବିଧାନ ଲେଖିଥିଲେ? ଏଭଳି ଭାଷା ଆଇନ ମନ୍ତ୍ରୀଙ୍କ ପାଇଁ ଅନୁକୂଳ ନୁହେଁ। କ୍ଷମତାକୁ ଆସିବା ପରଠାରୁ ସରକାର ନ୍ୟାୟପାଳିକାର କାର୍ଯ୍ୟରେ ହସ୍ତକ୍ଷେପ କରୁଛନ୍ତି। ସରକାର ସୁପ୍ରିମକୋର୍ଟଙ୍କୁ ନିଜ ପକେଟରେ ରଖିବାକୁ ଚେଷ୍ଟା କରୁଛନ୍ତି।
ଏହାକୁ ଏକ ଗୁରୁତର ପ୍ରସଙ୍ଗ କହି ସେ ପ୍ରଶ୍ନ କରିଛନ୍ତି, ସରକାରଙ୍କ ବିରୋଧରେ କହିବା ଅପରାଧ କି? ଶାସକଦଳର ଇଚ୍ଛା କି ଦେଶର ନ୍ୟାୟପାଳିକା ସ୍ବାଧୀନ ରହିବା ଉଚିତ ନୁହେଁ? ତେଣୁ ଦେଶର ଆଇନ ମନ୍ତ୍ରୀ ନ୍ୟାୟପାଳିକାକୁ ଧମକ ଦେଇଛନ୍ତି। ଭାଜପା ସରକାର କୁହନ୍ତି ଆମ କଥା ଶୁଣ ଏବଂ ଆମେ ଆପଣଙ୍କୁ ରାଜ୍ୟପାଳ କରିବୁ, ଆପଣଙ୍କୁ ଲୋକସଭାକୁ ପଠାଇବୁ, ଆପଣଙ୍କୁ ଆୟୋଗର ଚେୟାରମ୍ୟାନ କରିବୁ। ଏସବୁ ଲାଭ ନିଅନ୍ତୁ କିମ୍ବା ବିରୋଧ କରି ଅନୁସନ୍ଧାନର ସମ୍ମୁଖୀନ ହୁଅନ୍ତୁ।
ଲଣ୍ଡନରେ ରାହୁଲଙ୍କ ବିବୃତ୍ତିକୁ ନେଇ ବିବାଦ ଉପରେ ମଧ୍ୟ ସଞ୍ଜୟ ନିଜର ମତ ରଖିଛନ୍ତି। ରାହୁଲଙ୍କ କ୍ଷମା ମାଗିବା ପ୍ରସଙ୍ଗରେ ସଞ୍ଜୟ କହିଛନ୍ତି, ରାହୁଲ କ୍ଷମା ମାଗିବେ ନାହିଁ। ରାହୁଲ କାହିଁକି କ୍ଷମା ମାଗିବା ଉଚିତ ? ତାଙ୍କ ବଦଳରେ ଅନେକ ଭାଜପା ନେତା ଆଜି କ୍ଷମା ମାଗିବା ଉଚିତ। ସରକାର ବିରୋଧୀଙ୍କ ସ୍ବରକୁ ଦମନ କରୁଛନ୍ତି। ସରକାର ମାଇକକୁ ବନ୍ଦ କରୁଛନ୍ତି। ମୋ ଭଳି ଲୋକଙ୍କୁ ନୀରବ କରିବା ପାଇଁ ଜେଲରେ ରଖାଯାଉଛି। ଏହା ସରକାରଙ୍କ ଏକଛତ୍ରବାଦ ଶାସନର ଉଦାହରଣ।
