ଚିତ୍ରକୋଣ୍ଡା,୭।୬: ମାଓବାଦୀଙ୍କ କାର୍ଯ୍ୟକଳାପକୁ ବିରୋଧ କରି ପୁଣି ଗର୍ଜିଲେ ମାଲକାନଗିରି ଜିଲା ଚିତ୍ରକୋଣ୍ଡା ସ୍ବାଭିମାନ ଅଞ୍ଚଳର ଯୋଡାମ୍ବ ପଞ୍ଚାୟତବାସୀ। ସ୍ବାଭିମାନ ଅଞ୍ଚଳ ଆଦିବାସୀ ବିକାଶ ଶାନ୍ତି ପରିଷଦର ଆହ୍ବାନ କ୍ରମେ ଏହି ପ୍ରଜାମେଳିଟି ଦାରଲାବେଡାଠାରେ ଅନୁଷ୍ଠିତ ହୋଇଥିଲା। ତେବେ ସ୍ବାଭିମାନ ଅଞ୍ଚଳବାସୀଙ୍କ ଅଭିଯୋଗ ଏହା କି ପୂର୍ବେ ସଡକପଥରେ ଯୋଗାଯୋଗ ନ ଥିବା ହେତୁ ଅଞ୍ଚଳର ବିକାଶ ହୋଇପାରୁ ନ ଥିଲା। କିନ୍ତୁ ଗୁରୁପ୍ରିୟା ସେତୁ ନିର୍ମାଣ ପରେ ସରକାର ବିଭିନ୍ନ ଉନ୍ନୟନ ମୂଳକ ଯୋଜନା ସେଠାରେ ପହଂଚିପାରୁଛି। ହେଲେ ମାଓବାଦୀ ମାନେ ହିଁ ବିକାଶରେ ବାଧା ଦେଉଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ନିରୀହ ଆଦିବାସୀଙ୍କୁ ପୋଲିସ ଇନଫର୍ମର କହି ମିଥ୍ୟାରେ ଅତି ନିର୍ମମ ଭାବେ ହତ୍ୟା କରିବା ସହ ବିଭିନ୍ନ ସ୍ଥାନରେ ଲ୍ୟାଣ୍ଡମାଇନ ଖଞ୍ଜି ଦେଉଛନ୍ତି। ଯାହାଦ୍ୱାରା କି ନିରୀହ ଆଦିବାସୀଙ୍କ ମୃତ୍ୟୁ ହେଉଛି। ନିକଟରେ ଆନ୍ଧ୍ରପ୍ରଦେଶର ପେଦାବାଇଲୁ ମଣ୍ଡଳର ଚିନ୍ତାଲିଭିଦି ଗ୍ରାମର ଦୁଇ ନିରୀହ ଆଦିବାସୀ ମୃତ୍ୟୁବରଣ କରିଥିବା ସହ ପୂର୍ବରୁ କାଲିମେଳା ଅଞ୍ଚଳରେ ଏପରି ବହୁ ଘଟଣାମାନ ଘଟିଥିବା ଦେଖିବାକୁ ମିଳିଛି। ମାଓବାଦୀମାନେ ସବୁବେଳେ ଏହି ନିରୀହ ଆଦିବାସୀଙ୍କ ପାଇଁ ଲଢ଼ୁଥିବା କହୁଛନ୍ତି। ଯଦି ପ୍ରକୃତରେ ସେମାନେ ଲଢ଼ୁଛନ୍ତି ତାହେଲେ କାହିଁକି ଯୋଡାମ୍ବ ଗ୍ରାମକୁ ପୋଡ଼ିଦେଲେ ବୋଲିୂ ଗ୍ରାମବାସୀ ପ୍ରଶ୍ନ କରିଛନ୍ତି। ସେମାନେ କୁନି କୁନି ପିଲାଙ୍କୁ ମଧ୍ୟ ନିଜ ମାଓ ସଂଗଠନ୍ରେ ଜୋର ଜବରଦସ୍ତି ମିଶାଇବା ନିମନ୍ତେ ବାଧ୍ୟ କରୁଛନ୍ତି। ତେଣୁ ଯୋଡାମ୍ବ ପଞ୍ଚାୟତରେ ସରକାରଙ୍କ ବିଭିନ୍ନ ଉନ୍ନୟନ ମୂଳକ କାର୍ଯ୍ୟ ପହଞ୍ଚାଇ ଅଞ୍ଚଳକୁ ବିକାଶ ପଥରେ ଆଗେଇବା ହେଉଛି ଆମର ଲକ୍ଷ୍ୟ ବୋଲି ଗ୍ରାମବାସୀ କହିଛନ୍ତି। ହିଂସା ନୁହେଁ ବରଂ ଆମେ ଶାନ୍ତି ଚାହୁଁ ବୋଲି ଏହି ପ୍ରଜାମେଳି ମାଧ୍ୟମରେ ଗ୍ରାମବାସୀ ଆହ୍ବାନ ଦେଇଛନ୍ତି।
