ନୂଆଦିଲ୍ଲୀ,୩।୮: ମହିଳାଙ୍କ ପାଇଁ ବାହାରିଛି ନିଯୁକ୍ତି ସୁଯୋଗ । ଏବେ ଅଙ୍ଗନବାଡ଼ିରେ ନିଯୁକ୍ତି ପାଇଁ ଆବେଦନ ଆରମ୍ଭ ହୋଇଛି । ମୌଳିକ ଶିକ୍ଷା ଆଧାରରେ ଏହି ନିଯୁକ୍ତି ପ୍ରଦାନ କରାଯାଉଛି । ଏହି ନିଯୁକ୍ତି ପାଇଁ କୌଣସି ପରୀକ୍ଷା ଦେବାକୁ ପଡିବନି। ଏଥିରେ ଆପଣ ନିଜ ଯୋଗ୍ୟତା ବଳରେ ଚାକିରି ପାଇ ପାରିବେ ।
ତେବେ ଏଥିପାଇଁ ଆପଣଙ୍କୁ ପ୍ରକ୍ରିୟାନୁସାରେ ଆବେଦନ କରିବାକୁ ପଡିବ। ପ୍ରଥମେ ନିକଟସ୍ଥ ଅଙ୍ଗନବାଡ଼ି କେନ୍ଦ୍ରକୁ ଯାଇ ଖାଲି ଥିବା ପଦବୀ ବିଷୟରେ ଜାଣନ୍ତୁ। ବର୍ତ୍ତମାନ ୨୩,୭୫୩ ପୋଷ୍ଟ ପାଇଁ ଆବେଦନ ବାହାରିଛି । ଅଙ୍ଗନବାଡ଼ିରେ ଅନେକ ପୋଷ୍ଟ ଖାଲି ରହିଛି । ପାଠ୍ୟକ୍ରମରେ ରହିଥିବା ମାର୍କ ଅନୁଯାୟୀ ଏହି ପୋଷ୍ଟରେ ଚାକିରି ପ୍ରଦାନ କରାଯାଉଛି।
ମହିଳା ଏବଂ ବାଲ ମନ୍ତ୍ରଣାଳୟ ପକ୍ଷରୁ ଅଙ୍ଗନବାଡ଼ି ନିଯୁକ୍ତି ବିଜ୍ଞପ୍ତି ପ୍ରକାଶ ପାଇଛି । ଗତ ଜୁଲାଇ ୧୮ ତାରିଖରେ ଏହି ବିଜ୍ଞପ୍ତି ପ୍ରକାଶ ପାଇଛି । ଅଗଷ୍ଟ ୧୬ ତାରିଖ ପର୍ଯ୍ୟନ୍ତ ଆଶାୟୀମାନେ ଏହି ନିଯୁକ୍ତି ପାଇଁ ଆବେଦନ କରି ପାରିବେ । ଏହାପରେ ଆଉ କୌଣସି ଆବେଦନ ଗ୍ରହଣ କରାଯିବ ନାହିଁ। ପ୍ରତ୍ୟେକ ରାଜ୍ୟର ମହିଳା ଅଙ୍ଗନବାଡ଼ି କର୍ମୀ ଚାକିରି ପାଇଁ ଯୋଗ୍ୟତା ବିଷୟରେ ଜାଣିବା ଆବଶ୍ୟକ । ଅଧିକାଂଶ ପୋଷ୍ଟ ପାଇଁ କେବଳ ଦଶମ କିମ୍ବା ଦ୍ୱାଦଶ ପାସ ହୋଇଥିବା ଆଶାୟୀଙ୍କୁ ପ୍ରାଥମିକତା ଦିଆଯିବ ।
ତେବେ ଆପଣ ଯିଦ ଅଙ୍ଗନବାଡ଼ି ସୁପରଭାଇଜର ପୋଷ୍ଟ ପାଇଁ ଆବେଦନ କରିବାକୁ ଚାହୁଁଛନ୍ତି, ତେବେ ଆପଣ ସ୍ନାତକ ହାସଲ କରିଥିବା ଆବଶ୍ୟକ । ଏଥିପାଇଁ ଆବେଦନକାରୀଙ୍କୁ ସମସ୍ତ ଶିକ୍ଷାଗତ ଯୋଗ୍ୟତା ପ୍ରମାଣ ପତ୍ର ଅନଲାଇନ ମାଧ୍ୟମରେ ଅପଲୋଡ କରିବାକୁ ହେବ । ୧୮ରୁ ୩୫ ବର୍ଷର ଆଶାୟୀ ଏଥିପାଇଁ ଆବେଦନ କରି ପାରିବେ । ଏହି ନିଯୁକ୍ତିରେ ଆବେଦନ ପାଇଁ କେତେକ ନିର୍ଦ୍ଦିଷ୍ଟ ପ୍ରମାଣପତ୍ରର ଆବଶ୍ୟକତା ରହିଛି । ଆଧାରକାର୍ଡ, ପାନ କାର୍ଡ, ଦଶମ ବୋର୍ଡ ସାର୍ଟିଫିକେଟ, ଦ୍ବାଦଶ ବୋର୍ଡ ସାର୍ଟିଫିକେଟ, ଆୟ ପ୍ରମାଣପତ୍ର, ଆବାସ ପ୍ରମାଣପତ୍ର, ଜାତି ପ୍ରମାଣ ପତ୍ର ମୋବାଇଲ ନମ୍ବର, ପାସ୍ପୋଟ୍ ଆଦିର ଆବଶ୍ୟକତା ରହିଛି ।
