ନୂଆଦିଲ୍ଲୀ,୨୮।୧୧: ଆଇପିଏଲ୍ ୨୦୨୫ ମେଗା ଅକ୍ସନ ଅନେକ ମାମଲାରେ ସ୍ବତନ୍ତ୍ର ଥିଲା। କାରଣ ଏଥିରେ ଆଇପିଏଲ୍ ଇତିହାସରେ ପ୍ରଥମ ଥର ପାଇଁ ସମସ୍ତ ରେକର୍ଡ ଭାଙ୍ଗିଛି। ଋଷଭ ପନ୍ତ, ଶ୍ରେୟାସ ଆୟର ଏବଂ ଭେଙ୍କଟେଶ ଆୟର ସବୁଠାରୁ ମହଙ୍ଗା ଖେଳାଳି ଭାବେ ବିକ୍ରି ହୋଇଥିଲେ। ହେଲେ ଏହି ଅକ୍ସନରେ ଜଣେ ଖେଳାଳିଙ୍କ ଭାଗ୍ୟ ଏଭଳି ବଦଳି ଯାଇଛି ଯେ କାହାକୁ ବିଶ୍ୱାସ ହୋଇ ନ ଥିଲା। କାରଣ ଖେଳାଳିଙ୍କ ଦରମା ୫୫୦୦% ବୃଦ୍ଧି ପାଇଛି। ଗତ ସିଜନରେ ଲକ୍ଷାଧିକ ଟଙ୍କାରେ କିଣା ହୋଇଥିବା ଏହି ଖେଳାଳି ଏଥର କୋଟିରେ ବିକ୍ରି ହୋଇଛନ୍ତି।
ଆଇପିଏଲ୍ ୨୦୨୫ ଲାଗି ସାଉଦି ଆରବରେ ୨୪ ଏବଂ ୨୫ ନଭେମ୍ବରରେ ଅକ୍ସନ ରଖାଯାଇଥିଲା। ପ୍ରତି ଥର ପରି ଏଥର ମଧ୍ୟ ଆର୍ସିବି ଟିମ୍ ଅନେକ ଚମକାଇବା ଭଳି ନିଷ୍ପତ୍ତି ନେଇଥିଲା। ଜଣେ ଯୁବ କ୍ରିକେଟରଙ୍କୁ କିଣିବା ଲାଗି ଦଳ ଆଖିବୁଜା ଟଙ୍କା ଖର୍ଚ୍ଚ କରିଥିଲା। ସେ ହେଲେ ଜିତେଶ ଶର୍ମା। ଉଇକେଟକିପର ବ୍ୟାଟ୍ସମ୍ୟାନ ଜିତେଶଙ୍କ ଲାଗି ଏହି ଅକ୍ସନ ସ୍ବତନ୍ତ୍ର ଥିଲା। କାରଣ ତାଙ୍କୁ ଆର୍ସିବି ୧୧ କୋଟିରେ କିଣିଥିଲା।
କହିରଖୁଛୁ, ଗତ ସିଜନ ଯାଏ ଜିତେଶ ଶର୍ମାଙ୍କୁ ଆଇପିଏଲ୍sଖରେ ମାତ୍ର ୨୦ ଲକ୍ଷ ଟଙ୍କା ମିଳୁଥିଲା। ଆଇପିଏଲ୍ ୨୦୨୨ରେ ପଞ୍ଜାବ ଟିମ୍ ତାଙ୍କୁ ବେସ୍ ପ୍ରାଇସରେ କିଣିଥିଲା। ଏହାପରେ ଆଗାମୀ ଦୁଇ ସିଜନରେ ସେ ତାଙ୍କ ଦାମକୁ ଅପରିବର୍ତ୍ତିତ ରଖିଥିଲେ। ଗତ ସିଜନରେ ସେ ପଞ୍ଜାବ ଟିମ୍ର ଉପଅଧିନାୟକ ଥିଲେ। ହେଲେ ଏଥର ଦଳ ତାଙ୍କୁ ରିଟେନ କରି ନ ଥିଲା। ଶେଷରେ ଅକ୍ସନକୁ ସେ ଆସି ମୋଟା ଅଙ୍କର ପାଉଣା ପାଇଛନ୍ତି। ଆର୍ସିବି ତାଙ୍କୁ ଆଇପିଏଲ ଦରମାର ୫୫ଗୁଣା ଅଧିକ ଟଙ୍କା ଦେଇଛି। ଦଳକୁ ଦୀନେଶ କାର୍ତ୍ତିକଙ୍କ ସ୍ଥାନ ନେବାକୁ ଜଣେ ଉଇକେଟକିପର-ବ୍ୟାଟ୍ସମ୍ୟାନ୍ର ଆବଶ୍ୟକତା ଥିଲା। ଏମିତିରେ ଆର୍ସିବି ଜିତେଶଙ୍କ ଉପରେ ବଡ଼ ଦାମ୍ ଲଗାଇଥିଲା।
ଜିତେଶ ଆଇପିଏଲ୍ ୨୦୨୨ରେ ନିଜର ଆଇପିଏଲ୍ କ୍ୟାରିୟର ଆରମ୍ଭ କରିଥିଲେ। ସେ ଏଯାବତ ଟୁର୍ନାମେଣ୍ଟରେ ୪୦ ମ୍ୟାଚରେ ୭୩୦ ରନ କରିଛନ୍ତି। ଗତ ସିଜନରେ ସେ ୧୪ ମ୍ୟାଚରେ କେବଳ ୧୮୭ ରନ କରିପାରି ଥିଲେ। ଏହିକାରଣରୁ ପଞ୍ଜାବ ତାକୁ ରିଲିଜ କରିଦେଇଥିଲା। ତେବେ ଜିତେଶ ମୁମ୍ବାଇ ଟିମ୍ର ଅଂଶ ରହିଥିଲେ। ୨୦୧୬ ଏବଂ ୨୦୧୭ରେ ଦଳରେ ଥିଲେ ହେଁ ତାଙ୍କୁ ସୁଯୋଗ ମିଳି ନ ଥିଲା।
