ବାରିପଦା ଅଫିସ, ୨୮।୪: ପଶ୍ଚିମବଙ୍ଗ ସୀମାନ୍ତ ଦେଇ ଝାଡଖଣ୍ଡରୁ ଏକ ବିଶାଳ ହାତୀପଲ ମଙ୍ଗଳାବାର ବିଳମ୍ବିତ ରାତିରେ ମୟୂରଭଞ୍ଜ ଜିଲା ରାସଗୋବିନ୍ଦପୁର ରେଞ୍ଜରେ ପଶିଛନ୍ତି। ଏହି ପଲରେ ୭୦ରୁ ଉର୍ଦ୍ଧ୍ୱ ହାତୀ ଥିବାବେଳେ ବୁଧବାର ତମାମ ବଡ଼ାମପୁର ସଂରକ୍ଷିତ ଜଙ୍ଗଲରେ ଅଟକି ରହିଛନ୍ତି। ରାତିରେ ଏହି ହାତୀପଲ ବାଲେଶ୍ୱର ଜିଲା କୁଲଡିହା ଅଭୟାରଣ୍ୟର ନୀଳଗିରି ମୁଖେ ଅଗ୍ରସର ହେବାକୁ ଥିବା ନେଇ ବନବିଭାଗ ପୂର୍ବାନୁମାନ କରିଛି।
ସୂଚନା ମୁତାବକ, ଝାଡଖଣ୍ଡରୁ ଆସିଥିବା ହାତୀପଲ ପଶ୍ଚିମବଙ୍ଗ ହୋଇ ରାସଗୋବିନ୍ଦପୁର ରେଞ୍ଜ୍ର ଜମ୍ଭୀରା ନଦୀ ପାର ହୋଇ ପ୍ରବେଶ କରିଛନ୍ତି। ପରେ ବେତନଟୀ ରେଞ୍ଜ ଅଧୀନ ବଡ଼ାମପୁର ସଂରକ୍ଷିତ ଜଙ୍ଗଲରେ ଅଟକି ରହିଛନ୍ତି। ଖାଦ୍ୟ ଅନ୍ବେଷଣରେ ଆସିଥିବା ଏହି ହାତୀପଲଙ୍କ ମଧ୍ୟରେ ଅନେକ ଦନ୍ତାହାତୀ ରହିଛନ୍ତି। ଧାନକ୍ଷେତ ଖାଲି ପଡିଥିବାରୁ ହାତୀପଲ ଜନବସତି ମୁହାଁ ହେବାକୁ ଥିବା ବେଳେ ବନବିଭାଗ ପକ୍ଷରୁ ଲୋକମାନଙ୍କୁ ସଚେତନ କରାଯାଉଛି ା ହାତୀଙ୍କ ଗତିବିଧିକୁ ନଜରରେ ରଖି ଲୋକମାନେ ରାତି ତମାମ ଜାଗ୍ରତ ପ୍ରହରୀ ଭାବେ ସତର୍କ ଦୃଷ୍ଟି ଦେଇଛନ୍ତି। ପ୍ରତିବର୍ଷ ଅକ୍ଟୋବର ଓ ନଭେମ୍ବର ମାସରେ ପାଚିଲା ଧାନ ଖାଇବାକୁ ଆସି ନୀଳଗିରି ମୁହାଁ ହୋଇ ପୁନର୍ବାର ଜାନୁୟାରୀ ଓ ଫେବୃୟାରୀ ମାସରେ ବାହୁଡିଥାନ୍ତି ା ତେବେ ବିଶାଳ ହାତୀପଲଙ୍କ ଦାଉରୁ ଧନଜୀବନକୁ ସୁରକ୍ଷିତ ରଖିବା ପାଇଁ ବିଭାଗ ପକ୍ଷରୁ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ଅଞ୍ଚଳବାସୀ ଦାବି କରିଛନ୍ତି।
