ସୋର, ୨୭ା୧୨(ଡି.ଏନ୍.ଏ.): ରବିବାର ରାତିରେ ସୋର ପୌରପାଳିକା ଅଧୀନ କମରପୁର ମୌଜାରରେ ଥିବା ଅନ୍ନପୂର୍ଣ୍ଣା ରାଇସ୍ ମିଲ୍ ନିକଟସ୍ଥ ବଢ଼େଇ ସାହିରେ ଥିବା ଦୁଇଟି ଘରୁ ୧୦ଲକ୍ଷରୁ ଊର୍ଦ୍ଧ୍ୱ ଟଙ୍କାର ସୁନାରୁପା ଅଳଙ୍କାର ଚୋରି ହୋଇଥିବା ଅଭିଯୋଗ ହୋଇଛି। ରାଇସ୍ ମିଲ୍ ପରିସରରେ ସ୍ବର୍ଗତ ଗୋପବନ୍ଧୁ ନାୟକଙ୍କ ପୁଅ ଜୟଦେବ ସପରିବାରେ ତଳ ମହଲାରେ ରହୁଥିବା ବେଳେ ଉପର ମହଲାରେ ତାଙ୍କ କକା ଡମ୍ବରୁଧର ନାୟକ ରହୁଥିଲେ। ଗତ ୭ ଦିନ ତଳେ ଜୟଦେବଙ୍କ ପରିବାର କୌଣସି କାମରେ ଭୁବନେଶ୍ୱରରେ ରହୁଥିବା ସୁଯୋଗ ନେଇ ଘର ସମ୍ମୁଖ ଦ୍ୱାର ଭାଙ୍ଗି ଡକାୟତ ଘରେ ପଶି ଲୁହା ଆଲମିରା ଓ ଅନ୍ୟାନ୍ୟ ସୁଟ୍କେଶ୍ ଚାବି ଭାଙ୍ଗି ନଗଦ ଟଙ୍କା ଓ ଅଳଙ୍କାର ଲୁଟି ନେଇଛନ୍ତି। ସକାଳେ ତଳ ଘର ଆଗ ଦୁଆର ଭଙ୍ଗାଯାଇଥିବା ଦେଖି ଡମ୍ବରୁଧର ନାୟକ ପୋଲିସକୁ ଜଣାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଖବର ଲେଖା ହେବା ପର୍ଯ୍ୟନ୍ତ ଜୟଦେବଙ୍କ ପରିବାର ସୋରରେ ପହଞ୍ଚି ନ ଥିବାରୁ ଚୋରି ଗହଣାର ମୂଲ୍ୟ ଠିକ୍ ଭାବେ ଆକଳନ କରାଯାଇପାରିନି। ସେହିପରି ଏହି ମିଲ୍ ପରିସର ସଂଲଗ୍ନ ବଢ଼େଇ ସାହିରେ ଭଡାରେ ରହୁଥିବା ଅଭିମନ୍ୟୁ ବେହେରାଙ୍କ ପରିବାର ରବିବାର ରାତିରେ ସରଶଂଖସ୍ଥିତ ଶ୍ୱଶୁର ଘରକୁ ବୁଲି ଯାଇଥିବା ବେଳେ ତାଙ୍କ ଘର ଆଗ ଗ୍ରୀଲ୍ କାଟି ୬ ଲକ୍ଷରୁ ଊର୍ଦ୍ଧ୍ୱ ଟଙ୍କାର ସୁନା ରୁପା ଅଳଙ୍କାର ଲୁଟି ନେଇଛନ୍ତି ଦୁର୍ବୃତ୍ତ। ସୋମବାର ମଧ୍ୟାହ୍ନରେ ବାଲେଶ୍ୱରରୁ ସାଇଣ୍ଟିଫିକ୍ ଟିମ୍ ସହ ସନ୍ଧାନୀ କୁକୁର ନେଇ ପୋଲିସ ବିଭିନ୍ନ ସ୍ଥାନରେ ଚଢାଉ କରିଛି। ଏହି ଷ୍ଟେଶନ ନିକଟ ଅଞ୍ଚଳରେ ଲଗାତର ଚୋରି ହେଉଥିବା ବେଳେ ପୋଲିସ ଅଦ୍ୟାବଧି କିଛି ଟେର ପାଉନି।
