ନୂଆଦିଲ୍ଲୀ, ୫ା୩: ଓବେରୟ ହୋଟେଲ୍ସ ଆଣ୍ଡ ରିସର୍ଟର ସଭାପତି ଭାବେ କାର୍ଯ୍ୟରତ ସଞ୍ଜୀବ କପୁରଙ୍କୁ ଜେଟ୍ ଏୟାରଓ୍ବେଜ୍ର ନୂଆ ସିଇଓ ନିଯୁକ୍ତ କରାଯାଇଛି। ଏ ସମ୍ପର୍କରେ ଶୁକ୍ରବାର ଜେଟ୍ ଏୟାରଓ୍ବେଜ୍ ପକ୍ଷରୁ ଘୋଷଣା କରାଯାଇଛି। କପୁର ଏପ୍ରିଲ ୪ରୁ ଦାୟିତ୍ୱ ଗ୍ରହଣ କରିବେ। ଓବେରୟ ଗ୍ରୁପ୍ରେ ଯୋଗଦେବା ପୂର୍ବରୁ ସେ ‘ଭିସ୍ତାରା’ ଏୟାରଲାଇନ୍ର ଚିଫ୍ ଷ୍ଟ୍ରାଟେଜି ଏବଂ କମର୍ସିଆଲ ଅଫିସର ଭାବେ ୨୦୧୬ରୁ ୨୦୧୮ ପର୍ଯ୍ୟନ୍ତ ଦାୟିତ୍ୱ ନିର୍ବାହ କରିଛନ୍ତି। ଭିସ୍ତାରାରେ କାର୍ଯ୍ୟ କରିବା ସମୟରେ କପୁର କମ୍ପାନୀର ରେଭିନ୍ୟୁ, ଗ୍ରାହକଙ୍କ ସୁବିଧା ଅସୁବିଧା, ନେଟ୍ଓ୍ବାର୍କ ପ୍ଲାନିଂ, ମାର୍କେଟିଂ ଇନ୍ଫ୍ଲାଇଟ୍ ସର୍ଭିସ୍, ଗ୍ରାଉଣ୍ଡ ସର୍ଭିସ୍ ଏବଂ ପ୍ରଡକ୍ଟର ଉନ୍ନତି ଦିଗରେ ବିଶେଷ ଭାବରେ ଧ୍ୟାନ ଦେଇଥିଲେ। ଏହାଛଡ଼ା ୨୦୧୪-୧୫ରେ ସେ ସ୍ପାଇସ୍ ଜେଟ୍ର ସିଓଓ ଦାୟିତ୍ୱ ମଧ୍ୟ ନିର୍ବାହ କରିଥିଲେ।
