ବେଙ୍ଗାଲୁରୁ,୨୫।୩: କର୍ନାଟକର ପୂର୍ବତନ ମନ୍ତ୍ରୀ ତଥା ଖଣି ବ୍ୟବସାୟୀ ଜି ଜନାର୍ଦ୍ଦନ ରେଡ୍ଡୀ ସୋମବାର ଲୋକ ସଭା ନିର୍ବାଚନ ପୂର୍ବରୁ ଭାରତୀୟ ଜନତା ପାର୍ଟି(ଭାଜପା)ରେ ଯୋଗ ଦେଇଛନ୍ତି। ଗତ ବର୍ଷ ବିଧାନସଭା ନିର୍ବାଚନ ପୂର୍ବରୁ ରେଡ୍ଡୀ ଭାଜପା ସହିତ ତାଙ୍କର ଦୁଇ ଦଶନ୍ଧି ପୁରୁଣା ସଙ୍ଗଠନ ଭାଙ୍ଗି ‘କଲ୍ୟାଣ ରାଜ୍ୟ ପ୍ରଗତି ପକ୍ଷ’ (କେଆରପିପି) ଗଠନ କରିଥିଲେ। ସେ ବେଆଇନ ଖଣି ମାମଲାରେ ଅଭିଯୁକ୍ତ ଏବଂ ସେ ଗଙ୍ଗାବାଟିର ବିଧାୟକ।
ରେଡ୍ଡୀ ତାଙ୍କ କେଆରପିପିକୁ ଭାଜପା ସହିତ ମିଶ୍ରଣ କରି ତାଙ୍କ ପତ୍ନୀ ଅରୁଣା ଲକ୍ଷ୍ମୀ ଏବଂ ପରିବାରର କିଛି ସଦସ୍ୟଙ୍କ ସହ ବରିଷ୍ଠ ଦଳର ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ବି.ଏସ ୟେଦୁରପ୍ପା, ପ୍ରଦେଶ ଅଧ୍ୟକ୍ଷ ବି ଓ୍ବାଇ ବିଜୟେନ୍ଦ୍ର ଏବଂ ଅନ୍ୟମାନଙ୍କ ଉପସ୍ଥିତିରେ ଯୋଗ ଦେଇଥିଲେ। ଏହି ସମୟରେ ସେ କହିଛନ୍ତି ଯେ ମୁଁ ଜାତୀୟ ସ୍ବାର୍ଥରେ ଭାଜପାରେ ଯୋଗ ଦେଇଛି ଏବଂ ତୃତୀୟ ଥର ପାଇଁ ପ୍ରଧାନମନ୍ତ୍ରୀ ହେବାରେ ପ୍ରଧାନମନ୍ତ୍ରୀ ମୋଦିଙ୍କୁ ସମର୍ଥନ କରିଛି। ମୁଁ ମୋ ଘରକୁ ଫେରି ଆସିଛି ପାର୍ଟି ମୋତେ ଯାହା ଦାୟିତ୍ୱ ଦେବେ ମୁଁ ତାହା ପୂରଣ କରିବି। ମୁଁ ସମସ୍ତଙ୍କ ପାଇଁ ପ୍ରଚାର କରିବି ଏବଂ ନିକଟରେ ରେଡ୍ଡୀ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କୁ ଦିଲ୍ଲୀରେ ଭେଟିଥିଲେ। ତେବେ ନିକଟରେ ରାଜ୍ୟ ସଭା ନିର୍ବାଚନରେ ସେ କଂଗ୍ରେସ ପ୍ରାର୍ଥୀଙ୍କୁ ସମର୍ଥନ କରିଥିଲେ।
ଗତ ବର୍ଷ ବିଧାନସଭା ନିର୍ବାଚନ ପର୍ଯ୍ୟନ୍ତ ରେଡ୍ଡୀ ପ୍ରାୟ ୧୨ବର୍ଷ ଧରି ରାଜନୈତିକ ସ୍ତରରେ ନିଷ୍କ୍ରିୟ ଥିଲେ। ଏହି ସମୟ ମଧ୍ୟରେ, ୨୦୧୮ବିଧାନସଭା ନିର୍ବାଚନ ପୂର୍ବରୁ ସେ ତାଙ୍କର ଘନିଷ୍ଠ ବନ୍ଧୁ ତଥା ପୂର୍ବତନ ମନ୍ତ୍ରୀ ବି ଶ୍ରୀରାମୁଲୁଙ୍କ ପାଇଁ ମଲାକାଲମୁରୁ ବିଧାନସଭା ନିର୍ବାଚନମଣ୍ଡଳୀରେ ପ୍ରଚାର କରିଥିଲେ।
୨୦୧୮ ବିଧାନସଭା ନିର୍ବାଚନ ପୂର୍ବରୁ ତତ୍କାଳୀନ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ସାମ୍ବାଦିକମାନଙ୍କ ସହ କଥାବାର୍ତ୍ତା ବେଳେ କହିଥିଲେ ଯେ ଜନାର୍ଦ୍ଦନ ରେଡ୍ଡୀଙ୍କ ସହ ଭାଜପାର କୌଣସି ସମ୍ପର୍କ ନାହିଁ।
