ଯାଜପୁର,୨୮ା୪(ହର୍ଷବର୍ଦ୍ଧନ ବେହେରା)ଯାଜପୁର-କେନ୍ଦୁଝର ରୋଡ୍ ରେଳଷ୍ଟେଶନ (ଜେଜେକେଆର) ‘ଏ’ ବର୍ଗ ସତ୍ତ୍ବେ ଏଠାରେ ଦୀର୍ଘଦିନ ଧରି ଗର୍ଭମେଣ୍ଟ ରେଲଓ୍ବେ ଆଉଟପୋଷ୍ଟ (ଜିଆର୍ଓପି) ରହିଛି। ମାତ୍ର ୨ ଜଣ ଏଏସ୍ଆଇ ଏବଂ ୪ ଜଣ କନଷ୍ଟେବଳଙ୍କ ଦ୍ୱାରା ପ୍ରାୟ ୪୦୦ କି.ମି. ରେଳ ଅଞ୍ଚଳରେ ଆଇନ ଶୃଙ୍ଖଳା ପରିସ୍ଥିତି ନିୟନ୍ତ୍ରଣ କଷ୍ଟକର ହେଉଛି। ଏହି ମର୍ମରେ ୧୨ା୯ା୨୦୨୩ରେ ଧରିତ୍ରୀରେ ସବିଶେଷ ଖବର ପ୍ରକାଶ ପାଇବା ସହ ୧୫ା୯ା୨୦୨୩ରେ ଯାଜପୁର ରୋଡ୍ ରେଳଷ୍ଟେଶନ ପରାମର୍ଶଦାତା କମିଟି ପକ୍ଷରୁ କଟକ ପୋଲିସ ଡିଜିଙ୍କୁ ଲିଖିତ ଭାବେ ଦୃଷ୍ଟି ଆକର୍ଷଣ କରାଯିବା ପରେ ବିଭାଗୀୟ ତତ୍ପରତା ପ୍ରକାଶ ପାଇଛି। ଅନୁଗୋଳ, ଢେଙ୍କାନାଳ, ନୟାଗଡ଼ ଓ ବାଲୁଗଁା ଷ୍ଟେଶନରେ ନୂତନ ଜିଆର୍ପିଏସ୍(ଗର୍ଭମେଣ୍ଟ ରେଳଓ୍ବେ ପୋଲିସ ଷ୍ଟେଶନ), ବଇଣ୍ଡା, ବୁଢାପଙ୍କ, କେନ୍ଦ୍ରାପଡା, କେନ୍ଦୁଝର, ବଡବିଲ, ଖଲ୍ଲିକୋଟ ଓ ବାଙ୍ଗିରିପୋଷି ଷ୍ଟେଶନରେ ନୂତନ ଜିଆରଓପି ଏବଂ ପାରାଦୀପ, ପାରଳାଖେମୁଣ୍ଡି, ଯାଜପୁର ରୋଡ୍, ବାରିପଦା ଓ ଜଳେଶ୍ୱର ଜିଆରଓପିକୁ ଜିଆର୍ପିଏସ୍ ମାନ୍ୟତା ଦେବାକୁ ପ୍ରସ୍ତାବ ଗ୍ରହଣ କରାଯାଇଛି। ଏହି କ୍ରମରେ ଗତ ୨୬ ତାରିଖରେ କଟକ ରେଲଓ୍ବେ ପୋଲିସର ଅଧୀକ୍ଷକ ଆସନ୍ତା ୩୦ ତାରିଖ ସୁଦ୍ଧା ଆବଶ୍ୟକ ରିପୋର୍ଟ ପ୍ରସ୍ତୁତ କରି ଦାଖଲ କରିବାକୁ କଟକ, ଖୋର୍ଦ୍ଧାରୋଡ୍, ଭଦ୍ରକ, ବାଲେଶ୍ୱର, ବ୍ରହ୍ମପୁର ଆଇଏସ୍ଆଇସି, ଓଏସ୍ଆଇସି ଏବଂ କଟକ ଜିଆରପିଙ୍କୁ ନିର୍ଦ୍ଦେଶ ଜାରି କରିଛନ୍ତି। ଏହାବାଦ ଭୁବନେଶ୍ୱର ରେଲଓ୍ବେ ଏବଂ କୋଷ୍ଟାଲ ସିକ୍ୟୁରିଟି ଆଡିଶନାଲ ଡିଜିଙ୍କୁ ଯାଜପୁର-କେନ୍ଦୁଝର ରୋଡ୍ ଜିଆର୍ଓପିକୁ ଜିଆର୍ପିଏସ୍ ଭାବେ ମାନ୍ୟତା ଦେବାକୁ ପ୍ରସ୍ତାବ ଦେଇଛନ୍ତି।
କେନ୍ଦ୍ର ସରକାରଙ୍କ ଦ୍ୱାରା ପରିଚାଳିତ ଯାଜପୁର ରୋଡ୍ ରେଳଷ୍ଟେଶନ ସମ୍ପୂର୍ଣ୍ଣ ଭାବେ ଅବହେଳିତ ହୋଇ ପଡ଼ିରହିଛି। ଏହାର ସମସ୍ତ ୫ଟି ପ୍ଲାଟଫର୍ମରେ ସମ୍ପୂର୍ଣ୍ଣ ଛାତ ଓ ଭୁବନେଶ୍ୱର-ନୂଆଦିଲ୍ଲୀ ରାଜଧାନୀ ଏକ୍ସପ୍ରେସର ରହଣି ଇତ୍ୟାଦି ଦାବି ହୋଇ ଆସୁଥିଲେ ହେଁ କିଛି ସୁଫଳ ମିଳିପାରୁନାହିଁ। ଏହାବାଦ ଷ୍ଟେଶନର ଦକ୍ଷିଣ ଫାଟକରେ ଏକ ଫ୍ଲାଏଓଭର ବ୍ରିଜ ନିର୍ମାଣ କରିବାକୁ ଦାବି ହୋଇ କେନ୍ଦ୍ର ବଜେଟରେ ଅର୍ଥ ମଞ୍ଜୁର ହୋଇସାରିଥିଲେ ହେଁ ତାହା ଏଯାଏ କାର୍ଯ୍ୟକାରୀ ହୋଇପାରିନାହିଁ। ଏପରି କି ଗତ ମାର୍ଚ୍ଚ ୫ରେ ଚଣ୍ଡିଖୋଲଠାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯାଜପୁର ରୋଡ୍ ଷ୍ଟେଶନରେ ଫ୍ଲାଏଓଭର ଓ ଗଳିପୋଲ ନିର୍ମାଣ କରିବାକୁ ଉଦ୍ଘାଟନ କରିଥିଲେ ହେଁ କାର୍ଯ୍ୟ ଆରମ୍ଭ ହେବାରେ ବିଳମ୍ବ ଘଟୁଛି। ରେଲଓ୍ବେ ପକ୍ଷରୁ କେବଳ ଜମି ଅଧିଗ୍ରହଣ ଉଦ୍ଦେଶ୍ୟରେ ଏକ ନୋଟିସ ଜାରି କାର୍ଯ୍ୟରେ ପଦକ୍ଷେପ ସୀମିତ ରହିଥିବା ଅଭିଯୋଗ ହେଉଛି। ଫଳରେ ଯାଜପୁର ରୋଡ୍ ସହରର ଦକ୍ଷିଣ ପାର୍ଶ୍ୱ ଅଞ୍ଚଳରେ ଥିବା ଯାଜପୁର ରୋଡ୍ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, କେନ୍ଦ୍ରୀୟ ବିଦ୍ୟାଳୟ, ଏନ୍ସି ହାଇସ୍କୁଲ, ପ୍ରାଣୀ ଚିକିତ୍ସାଳୟ, ଶଶିଭୂଷଣ ବାଳିକା ହାଇସ୍କୁଲ, ମୁଣ୍ଡାମାଳ ସରସ୍ବତୀ ଶିଶୁ ବିଦ୍ୟାମନ୍ଦିର ସମେତ ରାଛିପୁର, ଜୋକଡ଼ିଆ, ମାର୍ଥାପୁର ଆଦି ଅଞ୍ଚଳବାସୀ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି। ଥରେ ରେଳ ଫାଟକ ବନ୍ଦ ରହିଲେ ପ୍ରାୟ ସମୟରେ ୪ଟି ଗାଡ଼ି ଅତିକ୍ରମ କରୁଛି। ଫଳରେ ପ୍ରାୟ ଅଧ ଘଣ୍ଟା ପର୍ଯ୍ୟନ୍ତ ପଥଚାରୀ ପ୍ରବଳ ଖରାରେ ଅଟକି ରହୁଥିବାର ଦେଖିବାକୁ ମିଳୁଛି। ନିର୍ବାଚନ ସମୟରେ ସାଧାରଣ ଲୋକଙ୍କୁ ଏଭଳି ଭାବେ ଅଣଦେଖା ସରକାରଙ୍କ ପାଇଁ ବୁମେରାଂ ହେବ ବୋଲି ସାଧାରଣରେ ଆଲୋଚନା ହେଉଛି।
