ବ୍ରହ୍ମପୁର,୧୨।୬(ସୁବାସ ଚନ୍ଦ୍ର ପାଢ଼ୀ) : ବ୍ରହ୍ମପୁର ମଣ୍ଡଳ କାରାଗାର ମୁଖ୍ୟ ଫାଟକ ସମ୍ମୁଖରେ ଜେଲ ଓ୍ବାର୍ଡର ଜଣେ ଯୁବକଙ୍କୁ ମାଡ ମାରୁଥିବା ଭିଡିଓ ଭାଇରାଲ ହେଉଛି । ଜଣେ ମହିଳାଙ୍କ ମୋବାଇଲ ଫୋନ ଚୋରି କରିବା ଅଭିଯୋଗରେ ଓ୍ବାର୍ଡର ଜଣକ ଯୁବକଙ୍କୁ ମାଡ଼ ମାରିଥିବା କୁହାଯାଉଛି । ତେବେ ଏନେଇ କୌଣସିଠାରେ ଅଭିଯୋଗ ହୋଇନାହିଁ । ଗୁରୁବାର ମହିଳା ଓ ସଂପୃକ୍ତ ଯୁବକ ପୃଥକ ଭାବେ ନିଜ ସମ୍ପର୍କୀୟଙ୍କୁ କାରାଗରରେ ଦେଖା କରିବାକୁ ଆସିଥିଲେ । ମହିଳାଜଣକ ଦୋକାନ ନିକଟରେ ଛିଡା ହୋଇଥିବା ବେଳେ ତାଙ୍କ ମୋବାଇଲ ଫୋନ ଚୋରି ହୋଇଯାଇଥିଲା । ପରେ ସଂପୃକ୍ତ ଯୁବକଙ୍କ ନିକଟରୁ ଉକ୍ତ ମୋବାଇଲ ଫୋନ ମିଳିଥିଲା । ଘଟଣା ସମ୍ପର୍କରେ ମହିଳା ଜଣକ ଫାଟକରେ କାର୍ଯ୍ୟରତ ଜେଲ ଓ୍ବାର୍ଡରଙ୍କୁ କହିଥିଲେ । ମୋବାଇଲ ମିଳିବା ପରେ ଓ୍ବାର୍ଡର ଜଣଙ୍କ ଯୁବକଙ୍କ ପାଖକୁ ଆସି ଚାପୁଡା ମାରିଥିବା ଭାଇରାଲ ଭିଡିଓରେ ଦେଖାଯାଇଛି ।
