ମେକ୍ସିକୋ,୯ା୧୦: ମେକ୍ସିକୋର ଉତ୍ତର-ପଶ୍ଚିମ ରାଜ୍ୟ ସିନାଲୋଆର ମାଜାଟାନ ସହରରେ ଥିବା ‘ଏଲ କାଷ୍ଟିଲୋ’ ଜେଲ୍ରେ ଘଟିଥିବା ଏକ ସଂଘର୍ଷରେ ୧୦ ଜଣଙ୍କ ମୃତ୍ୟୁ ହୋଇଥିବାବେଳେ ୧୬ ଜଣ ଆହତ ହୋଇଛନ୍ତି ବୋଲି ରାଜ୍ୟ କର୍ତ୍ତୃପକ୍ଷ ସୂଚନା ଦେଇଛନ୍ତି।
ସିନାଲୋଆର ସାର୍ବଜନୀନ ସୁରକ୍ଷା ସଚିବାଳୟ କହିଛି, ଜେଲ୍ ଭିତରେ ହୋଇଥିବା ଏହି ସଂଘର୍ଷରେ ୯ ଜଣ କଏଦୀ ଏବଂ ଜଣେ ପରିବାର ସଦସ୍ୟ (ଯିଏ ସାକ୍ଷାତ କରିବାକୁ ଆସିଥିଲେ) ସେ ପ୍ରାଣ ହରାଇଛନ୍ତି।
ସୋସିଆଲ ମିଡିଆରେ ପୋଷ୍ଟ କରାଯାଇଥିବା ଏକ ଭିଡିଓରେ ସିନାଲୋଆର ସାର୍ବଜନୀନ ସୁରକ୍ଷା ସଚିବ ସିନୁହେ ଟେଲେଜ କହିଛନ୍ତି, ମୃତ୍ୟୁବରଣ କରିଥିବା ସେହି ବ୍ୟକ୍ତି ଜଣକ ଜଣେ ନାବାଳକ ଥିଲେ। ଆହତ ୧୬ ଜଣ କଏଦୀଙ୍କୁ ଚିକିତ୍ସା ପାଇଁ ସ୍ଥାନାନ୍ତର କରାଯାଇଥିବା ସଚିବାଳୟ ପକ୍ଷରୁ କୁହାଯାଇଛି।
ସୁରକ୍ଷା ବାହିନୀର ଏକ ମିଳିତ ଦଳ ଘଟଣାସ୍ଥଳରେ ପହଞ୍ଚିଥିଲେ ଏବଂ ବର୍ତ୍ତମାନ ଜେଲ୍୍ ପରିସର ଶାନ୍ତ ହୋଇଛି। କର୍ତ୍ତୃପକ୍ଷ ଘଟଣାସ୍ଥଳରେ ଉପସ୍ଥିତ ରହିଥିବା ଜଣାପଡ଼ିଛି।
ସାମାଜିକ କର୍ମୀମାନେ ମୃତକଙ୍କ ପରିବାର ସହ ଯୋଗାଯୋଗ କରୁଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ସତର୍କତାମୂଳକ ପଦକ୍ଷେପ ସ୍ବରୂପ କାରାଗାରକୁ ସାକ୍ଷାତ ଅନୁମତି ସାମୟିକ ଭାବେ ବନ୍ଦ କରାଯାଇଛି ଏବଂ ଅନ୍ୟ କଏଦୀମାନେ ସୁରକ୍ଷିତ ଅଛନ୍ତି।
ସିନାଲୋଆ ହେଉଛି ‘ସିନାଲୋଆ ଡ୍ରଗ କାର୍ଟେଲ’ର ପରସ୍ପର ବିରୋଧୀ ଗୋଷ୍ଠୀଗୁଡ଼ିକ ମଧ୍ୟରେ ଚାଲିଥିବା ସଂଘର୍ଷର ଏକ କ୍ଷେତ୍ର। ସୁରକ୍ଷା ଦୃଷ୍ଟିକୋଣରୁ ଆମେରିକୀୟ ନାଗରିକମାନଙ୍କୁ ଯେଉଁ ଛଅଟି ମେକ୍ସିକାନ ରାଜ୍ୟକୁ ନ ଯିବାକୁ ଆମେରିକାର ବୈଦେଶିକ ବିଭାଗ ପରାମର୍ଶ ଦେଇଥାଏ, ସିନାଲୋଆ ସେଗୁଡ଼ିକ ମଧ୍ୟରୁ ଅନ୍ୟତମ।
ଜେଲ୍ରେ ଘଟିଥିବା ଏହି ହିଂସାକାଣ୍ଡ ସେହି ସଂଘର୍ଷ ସହିତ ଜଡ଼ିତ କି ନୁହେଁ, ସେ ସମ୍ପର୍କରେ ଅଧିକାରୀମାନେ କୌଣସି ସୂଚନା ଦେଇନାହାନ୍ତି।