ନୂଆଦିଲ୍ଲୀ,୧୦।୪: କଂଗ୍ରେସ ନେତା ରାହୁଲ ଗାନ୍ଧୀ ନିକଟରେ ଇଂଲଣ୍ଡରେ ଦେଇଥିବା ମନ୍ତବ୍ୟକୁ ନେଇ ରାଜନୀତି ସରଗରମ ରହିଥିଲା। ଏପରିକି ରାହୁଲ ଗାନ୍ଧୀ କ୍ଷମା ମାଗନ୍ତୁ ବୋଲି ଭାଜପା ଜିଦ୍ ଧରି ବସିଥିଲା। ଇତିମଧ୍ୟରେ ଉପରାଷ୍ଟ୍ରପତି ଜଗଦୀପ ଧନକର ରାହୁଲ ଗାନ୍ଧୀଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି, ଭାରତରୁ ବିଦେଶ ଯାତ୍ରା କରୁଥିବା ଲୋକେ ଗଲା ବେଳେ ନିଜ ରାଜନୈତିକ ଚଷମାକୁ ଛାଡିଦେବା ଉଚିତ। ବିଶ୍ୱ ହୋମିଓପାଥି ଦିବସରେ ଏକ କାର୍ଯ୍ୟକ୍ରମକୁ ସମ୍ବୋଧିତ କରି ଧନକର ଏଭଳି ପ୍ରତିକ୍ରିୟା ରଖିଛନ୍ତି। ସେ ଆହୁରି ମଧ୍ୟ କହିଛନ୍ତି, ୨୦୪୭ ମସିହାରେ ଭାରତ ଏହାର ସ୍ବାଧୀନତାର ଶତବାର୍ଷିକୀ ପାଳନ କରିବ। ଏଭଳି ପରିସ୍ଥିତିରେ ଦେଶର ସମ୍ମାନ ଉପରେ ଆକ୍ରମଣ କରିବାର ପ୍ରତ୍ୟେକ ପ୍ରୟାସକୁ ଖଣ୍ଡନ କରାଯିବା ଉଚିତ୍। ବିଦେଶୀ ମାନ୍ୟଗଣ୍ୟ କିମ୍ବା ବିଦେଶୀ ନାଗରିକ ଏହି ମହାନ ଗଣତନ୍ତ୍ର ପରିଦର୍ଶନ କରିବା ସମୟରେ ନିଜ ଦେଶକୁ ନିନ୍ଦା କରୁଥିବା କେବେ ଦେଖିଛନ୍ତି କି। ଏହାର ଉତ୍ତର ହେଉଁଛି ନା। ଆମେ କାହିଁକି ଆମର ବୈଜ୍ଞାନିକ, ସ୍ବାସ୍ଥ୍ୟ ଯୋଦ୍ଧାମାନଙ୍କ ପାଇଁ ଗର୍ବ ଅନୁଭବ କରିପାରିବୁ ନାହିଁ ବୋଲି ଧନକର କହିଛନ୍ତି।
