ଆବୁଧାବି,୮।୧୦: ପ୍ଲେ-ଅପ୍ରେ ସ୍ଥାନ ନିଶ୍ଚିତ କରିବା ପାଇଁ ମୁମ୍ବାଇ ଇଣ୍ଡିଆନ୍ସକୁ ସବୁଠୁ ଜରୁରୀ ଥିଲା ହାଇଦ୍ରାବାଦ୍ ଆଗରେ ଏକ ବିଶାଳ ଟାର୍ଗେଟ ଛିଡ଼ା କରିବା। ପ୍ରଥମେ ଇଶାନ କିଷନ ଓ ପରେ ସୂର୍ଯ୍ୟକୁମାର ଯାଦବଙ୍କ ବିସ୍ଫୋରକ ଅର୍ଦ୍ଧଶତକୀୟ ପାଳି ବଳରେ ତାହା କରିଦେଖାଇଥିଲା ମୁମ୍ବାଇ। ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିବା ରୋହିତ ଶର୍ମାଙ୍କ ଦଳ ୨୦ ଓଭରରେ ୨୩୫ ରନ୍ କରି ଦେଇଛି। ଫଳରେ ହାଇଦ୍ରାବାଦ୍ ଆଗରେ ଛିଡ଼ା ହୋଇଛି ୨୩୬ ରନ୍ର ବିଶାଳ ବିଜୟ ଲକ୍ଷ୍ୟ।
ଏବେ ପ୍ରତିପକ୍ଷ ହାଇଦ୍ରାବାଦ୍କୁ ୬୫ ରନ୍ ମଧ୍ୟରେ ଅଲଆଉଟ୍ କରିବାକୁ ପଡ଼ିବ। କିନ୍ତୁ ଯଶପ୍ରୀତ ବୁମରା, ଟ୍ରେଣ୍ଟ ବୋଲ୍ଟ, କୁଲ୍ଟର ନାଇଲଙ୍କ ପାଇଁ ଅସମ୍ଭବ ନୁହେଁ।
ପ୍ରଥମେ ହାଇଦ୍ରାବାଦ୍ର କୌଣସି ବୋଲରଙ୍କୁ ଫୁରସତ ଦେଇ ନ ଥିଲେ କିଷନ। ସେ ୩୨ ବଲରେ ଖେଳିଥିଲେ ୮୪ ରନ୍ର ମାଷ୍ଟରପିସ ପାଳି। ଇନିଂସରେ ସାମିଲ ଥିଲା ୧୧ ଚୌକା ଓ ୪ ଛକା। ସେ ଆଉଟ୍ ହେବା ପରେ ଛକା, ଚୌକା ବର୍ଷା କରିଥିଲେ ସୂର୍ଯ୍ୟ। ୪୦ ବଲରେ ୧୩ ଚୌକା ଓ ୩ ଛକା ସହାୟତାରେ ୮୨ ରନ୍ର ଇନିଂସ ଖେଳିଥିଲେ। ଏମାନଙ୍କ ଯୋଗୁ ମୁମ୍ବାଇ ୨୦ ଓଭରରେ ୯ ଉଇକେଟ ହରାଇ ୨୩୫ ରନ୍ କରିଥିଲା। ଏହା ମୁମ୍ବାଇ ପାଇଁ ଆଇପିଏଲରେ ସର୍ବାଧିକ ଦଳଗତ ସ୍କୋର। ହାଇଦ୍ରାବାଦ୍ ପକ୍ଷରୁ ଜାସନ ହୋଲ୍ଡର ୪ ଉଇକେଟ ନେଇଥିଲେ।
