ଅନୁଗୋଳ ଅଫିସ, ୧୧।୬ ଗୋଟିଏ ଚୌକିରେ ସରକାରଙ୍କ କୌଣସି କର୍ମଚାରୀ ଅଧିକ ବର୍ଷ ରହିପାରିବେ ନାହିଁ। ଏହା ହେଲେ ସ୍ବଚ୍ଛତାରେ ବାଧା ଉପୁଜିବ। ତେଣୁ ଦୀର୍ଘବର୍ଷ ଧରି ଗୋଟିଏ ଚୌକିରେ ବସିଥିବା କର୍ମଚାରୀମାନଙ୍କୁ ବଦଳି କରିବାକୁ ସରକାରୀ ନିର୍ଦ୍ଦେଶନାମା ରହିଛି। ଏପରି କି ଏହାକୁ କଡ଼ାକଡ଼ି ଭାବେ ପାଳନ କରିବାକୁ ମଧ୍ୟ କୁହାଯାଇଛି। କିନ୍ତୁ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ଉକ୍ତ ସରକାରୀ ନିର୍ଦ୍ଦେଶନାମାକୁ ଠିକ୍ ଭାବେ ପାଳନ କରାଯାଉ ନାହିଁ। କାରଣ ଏଠାରେ କେଉଁ ବାବୁ ୧୦ ବର୍ଷ ରହିଲେଣି ତ ଆଉ କେଉଁ ବାବୁ ୩୧ ବର୍ଷ ଗୋଟିଏ ଚୌକିରେ ବସିସାରିଲେଣି। ହେଲେ ଏମାନଙ୍କୁ ବଦଳି କରିବାକୁ ସ୍ବାସ୍ଥ୍ୟ ପ୍ରଶାସନ ପଛଘୁଞ୍ଚା ଦେଉଥିବା ଅଭିଯୋଗ ହେଉଛି।
ଅନୁଗୋଳ ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କ କାର୍ଯ୍ୟାଳୟରେ ଥିବା ଜଣେ ବାବୁ ୧୩ ବର୍ଷ ହେବ ଗୋଟିଏ ଚୌକିରେ ବସିଛନ୍ତି। ସେହିପରି ଅନ୍ୟ ଏକ ବିଭାଗରେ କାର୍ଯ୍ୟ କରୁଥିବା ଜଣେ ବାବୁ ୧୯୯୧ରୁ ଜିଲା ମୁଖ୍ୟ ଚିକିତ୍ସାଳୟରେ ରହିଛନ୍ତି। ଅନ୍ୟ ଜଣେ ୨୦୧୨ରୁ, ୨ଜଣ ୨୦୧୩ରୁ, ଜଣେ ୨୦୧୪ରୁ, ଆଉ ଜଣେ ୨୦୧୭ରୁ ଏଠାରେ ଗୋଟିଏ ଚୌକି ମାଡ଼ିବସିଥିଲେ ମଧ୍ୟ ବଦଳି ହେଉନାହିଁ। ଜିଲାରେ ଥିବା ୩ଟି ଉପଖଣ୍ଡ ଓ ୮ଟି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଥିବା କେତେଜଣ ଜୁନିୟର ଆସିଷ୍ଟାଣ୍ଟ ଓ ସିନିୟର ଆସିଷ୍ଟାଣ୍ଟ ଅନ୍ୟତ୍ର ବଦଳି ହୋଇଯିବାକୁ ଦୀର୍ଘ ଦିନ ହେବ ଆବେଦନ କରିଛନ୍ତି। କିଏ ପାରିବାରିକ ସମସ୍ୟା କାରଣ ଦର୍ଶାଇଛନ୍ତି ତ ଆଉ କିଏ ବ୍ୟକ୍ତିଗତ ସମସ୍ୟା ଦର୍ଶାଇ ବଦଳି ହେବାକୁ ଚାହଁୁଛନ୍ତି। କିନ୍ତୁ ଜିଲା ସ୍ବାସ୍ଥ୍ୟ ପ୍ରଶାସନ ଏହାକୁ କର୍ଣ୍ଣପାତ କରୁନାହିଁ। ପୂର୍ବରୁ ଜିଲା ମୁଖ୍ୟ ଚିକିତ୍ସା ଅଧିକାରୀ ଡାକ୍ତର ତ୍ରିଲୋଚନ ପ୍ରଧାନ କହିଥିଲେ, ବଦଳି ଋତୁ ଆସିଲେ ଏମାନଙ୍କର ବଦଳି ହେବ। କିନ୍ତୁ କେବେ ବାବୁମାନଙ୍କୁ ଅନ୍ୟତ୍ର ପଠାଯିବ ତାହା ବୁଦ୍ଧିଜୀବୀଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି। ଏ ନେଇ ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ କହିଛନ୍ତି, ପୂର୍ବରୁ କୋଭିଡ୍ ପାଇଁ ବଦଳି ହୋଇ ନ ଥିଲା। ଏବେ ବଦଳି ସିଜିନ୍ ଚାଲିଥିବାରୁ ସେମାନଙ୍କୁ ଖୁବ୍ଶୀଘ୍ର ବଦଳି କରାଯିବ।
