କେସିଙ୍ଗା,୧୪ା୮(ତୁମେଶ୍ୱର ସାହୁ): ଦୀର୍ଘ ୩୭ ବର୍ଷ ଧରି ଶିକ୍ଷକତା କରି ଛାତ୍ରୀଛାତ୍ରଙ୍କୁ ଅନ୍ଧାରୁ ଆଲୋକିତ କରି ମଣିଷ କରିଥିବା ଶିକ୍ଷକଙ୍କୁ ଏରିୟର ମିଳିବାରେ ଦୀର୍ଘ ୧୩ ବର୍ଷ ବିତିଗଲାଣି ଶିକ୍ଷା ବିଭାଗର ଜିଲା ଶିକ୍ଷାଧିକାରୀ, ଗୋଷ୍ଠୀ ଶିକ୍ଷା ଅଧିକାରୀ କର୍ଣ୍ଣପାତ କରୁ ନ ଥିବାରୁ ଅବସରପ୍ରାପ୍ତ ଶିକ୍ଷକ ପଙ୍କଜ ସ୍ବାଇଁ କେତେ ଯେ, ହଇରାଣ ହରକତ ହେଉଛନ୍ତି, ତାହା ଏଥିରୁ ସ୍ପଷ୍ଟ ଜଣାପଡୁଛି। ଗତ ୧୯.୧୧.୧୯୭୫ରୁ ୩୦.୪.୨୦୧୨ ଯାଏ କେସିଙ୍ଗା ବ୍ଲକର ବିଭିନ୍ନ ସ୍କୁଲରେ ପଙ୍କଜ ଦୀର୍ଘ ୩୭ ବର୍ଷ ଧରି ଶିକ୍ଷକତା କରିଥିଲେ। ସେ ଗତ ୨୦୧୨ରୁ ଅବସର ଗ୍ରହଣ କରିଛନ୍ତି। ଅବସର ଶିକ୍ଷକ କଳାହାଣ୍ଡି ଜିଲା କେସିଙ୍ଗା ବ୍ଲକର ବୋରିଆ ଗ୍ରାମର ସ୍ଥାୟୀ ବାସିନ୍ଦା ଅଟନ୍ତି। ଅବସର ଗ୍ରହଣ କରି ଆଜକୁ ୧୩ ବର୍ଷ ବିତିଯାଇଥିଲେ ସୁଦ୍ଧା ତାଙ୍କରି ଏରିୟର ମିଳିନାହିଁ। ଏ ନେଇ ସ୍ବାଇଁ ଶିକ୍ଷା ବିଭାଗକୁ ଦୌଡ଼ିଦୌଡ଼ି ନିରାଶ ହୋଇ ପଡ଼ିରହିଛନ୍ତି। ପରିବାର ପୋଷଣ ପାଇଁ ବହୁ କଷ୍ଟ ହେଉଛି ବୋଲି କହିଛନ୍ତି।
ରାଜ୍ୟ ସରକାରଙ୍କ ଗଣଶିକ୍ଷା ବିଭାଗର ପ୍ରଦତ୍ତ ୧୫ କିମ୍ବା ୩୦ ବର୍ଷିଆ ଏ.ସି.ପି.ର କୌଣସି ସୁବିଧା ପାଇ ନାହାନ୍ତି। ଶିକ୍ଷକଙ୍କ ସେବା ପୁସ୍ତକ ଦେଖି ଉଭୟ ଏସିପି ମଞ୍ଜୁର କରି ଏରିୟର ପ୍ରଦାନ କରିବା ପାଇଁ ଦୀର୍ଘ ୧୩ ବର୍ଷ ବିତିଗଲାଣି ଶିକ୍ଷା ବିଭାଗର ଉଚ୍ଚ କତ୍ତୃପକ୍ଷ କର୍ଣ୍ଣପାତ କରୁ ନାହାନ୍ତି। ଏ ନେଇ ସ୍ବାଇଁ ଦୀର୍ଘ ୧୩ ବର୍ଷ ହେଲା ଅଭିଯୋଗ କରି ଆସୁଥିଲେ ସୁଦ୍ଧା କେହି ବି ତାଙ୍କ ଅଭିଯୋଗକୁ ଗ୍ରହଣ କରୁନାହାନ୍ତି। ଯାହାଫଳରେ ପରିବାରର ବୋଝ ସହ ନିଜ ସ୍ତ୍ରୀ, ପିଲା ଛୁଆଙ୍କ ଶିକ୍ଷା, ସ୍ବାସ୍ଥ୍ୟ, ଆଦି କାର୍ଯ୍ୟକ୍ରମରେ ଘୋର ଅସୁବିଧା ହେଉଛି। ତେଣୁ ରାଜ୍ୟରେ ନୂତନ ଭାବେ ଗଢ଼ି ଉଠିଥିବା ରାଜ୍ୟ ସରକାର ଓ ଶିକ୍ଷାମନ୍ତ୍ରୀ ଏଥିପ୍ରତି ଦୃଷ୍ଟି ଦେଇ ଅବସରପ୍ରାପ୍ତ ଶିକ୍ଷକଙ୍କ ଏସିପି ମଞ୍ଜୁର କରି ଏରିୟର ପ୍ରଦାନ କରିବାକୁ ଦାବି କରିଛନ୍ତି। ଯଦିଓ ଶିକ୍ଷା ବିଭାଗ ଏଥିରେ କର୍ଣ୍ଣପାତ ନ କରନ୍ତି ତେବେ କେସିଙ୍ଗାସ୍ଥିତ ଗୋଷ୍ଠୀ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟରେ ଅନିର୍ଦ୍ଦିଷ୍ଟ କାଳ ପାଇଁ ଗଣଧାରଣା ଦେବେ ବୋଲି ଶିକ୍ଷା ବିଭାଗକୁ ସ୍ବାଇଁ ଚେତାବନୀ ଦେଇଛନ୍ତି।
ଏ ସଂକ୍ରାନ୍ତରେ କେସିଙ୍ଗା ଗୋଷ୍ଠୀ ଶିକ୍ଷା ଅଧିକାରୀ ଆନନ୍ଦ କୁମାର ବେହେରାଙ୍କୁ ପଚାରିବାରୁ ମୁଁ ଫାଇଲ ଦେଖି ସମାଧାନ କରିବି ବୋଲି ପ୍ରକାଶ କରିଥିଲେ।
