ଆମେରିକାର ମହାକାଶ ସଂସ୍ଥା ନାସା (ନ୍ୟାଶନାଲ ଏରୋନଟିକ୍ସ ଆଣ୍ଡ ସ୍ପେସ୍ ଆଡମିନିଷ୍ଟ୍ରେଶନ) ଏବଂ ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ) ଚଳିତବର୍ଷ ମହାକାଶକୁ ମାନବ ପ୍ରେରଣ ଲାଗି ଏକ ରଣନୀତିକ କାର୍ଯ୍ୟଯୋଜନା ପ୍ରସ୍ତୁତ କରୁଛନ୍ତି। ଆମେରିକାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରଥମ ଷ୍ଟେଟ୍ ଭିଜିଟ୍ ଅବସରରେ ଗୁରୁବାର ଭାରତ ଆର୍ଟେମିସ୍ ଆକର୍ଡସ୍ରେ ଯୋଗଦେବା ପାଇଁ ନିଷ୍ପତ୍ତି ନେଇଛି। ୨୦୨୪ରେ ନାସା ଏବଂ ଇସ୍ରୋ ଅନ୍ତର୍ଜାତୀୟ ମହାକାଶ କେନ୍ଦ୍ର (ଆଇଏସ୍ଏସ୍)କୁ ଏକ ମିଳିତ ମିଶନ କରିବା ଲାଗି ସହମତ ହୋଇଛନ୍ତି। ଆର୍ଟେମିସ୍ ଆକର୍ଡସ୍ରେ ଭାରତ ସ୍ବାକ୍ଷର କରିଥିବା ଆମେ ଘୋଷଣା କରିପାରିବା ବୋଲି ନାସାର ଜଣେ ବରିଷ୍ଠ ପ୍ରଶାସନିକ ଅଧିକାରୀ କହିଛନ୍ତି। ସମସ୍ତ ମାନବଜାତିର ଲାଭ ପାଇଁ ମହାକାଶ ଆବିଷ୍କାର ଲାଗି ଦୁଇ ଦେଶର ମିଳିତ ଦୂରଦୃଷ୍ଟି ରହିଥିବା ସେ କହିଛନ୍ତି। ୧୯୬୭ର ଆଉଟର ସ୍ପେସ୍ ଟ୍ରିଟି (ଓଏସ୍ଟି) ଆଧାରରେ ଆର୍ଟେମିସ୍ ଆକର୍ଡସ ନିୟମାବଳୀ ପ୍ରସ୍ତୁତ କରାଯାଇଛି ଯାହା ବେସାମରିକ ମହାକାଶ ଆବିଷ୍କାରକୁ ମାର୍ଗଦର୍ଶନ ଦେଇଥାଏ। ଏକବିଂଶ ଶତାବ୍ଦୀରେ ଏହାର ବ୍ୟବହାର ହେଉଛି। ୨୦୨୫ ସୁଦ୍ଧା ଚନ୍ଦ୍ରପୃଷ୍ଠରେ ଲୋକଙ୍କୁ ପହଞ୍ଚାଇବା ଲାଗି ଆମେରିକା ନେତୃତ୍ୱରେ ଏହି ଉଦ୍ୟମ ଜାରି ରହିଛି। ଏଥିସହିତ ମଙ୍ଗଳ ଓ ଅନ୍ୟ ଗ୍ରହକୁ ମହାକାଶ ଆବିଷ୍କାରରେ ସାମିଲ କରିବା ଲାଗି ଲକ୍ଷ୍ୟ ରଖାଯାଇଛି।
ରାଷ୍ଟ୍ରପତି ଜୋ ବାଇଡେନ୍ଙ୍କ ଆମନ୍ତ୍ରଣକ୍ରମେ ପ୍ରଧାନମନ୍ତ୍ରୀ ମୋଦିଙ୍କ ପ୍ରଥମ ଷ୍ଟେଟ୍ ଭିଜିଟ୍ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। କାରଣ ଏହି ସମ୍ମାନ ଆମେରିକା କେବଳ ଏହାର ଘନିଷ୍ଠ ବନ୍ଧୁ ରାଷ୍ଟ୍ରକୁ ଦେଇଥାଏ। ଏହି ଆମନ୍ତ୍ରଣ ଦୁଇଦେଶର ସମ୍ପର୍କକୁ ଅଧିକ ମଜଭୁତ କରିବାର ସଙ୍କେତ ଦେଉଛି। ମୋଦିଙ୍କ ଗସ୍ତ ଅବସରରେ ପ୍ରତିରକ୍ଷା ସହଯୋଗ ସ୍ବରୂପ ଭାରତରେ ଯୁଦ୍ଧବିମାନ ଇଞ୍ଜିନ ନିର୍ମାଣ ଲାଗି ଜିଇ ଏରୋସ୍ପେସ୍ ହିନ୍ଦୁସ୍ତାନ ଏରୋନଟିକ୍ସ ଲିଃ ସହ ଚୁକ୍ତିନାମା ସ୍ବାକ୍ଷର କରିଛି। ଦୁଇ ଦେଶ ଏଚ୍-୧ବି ଭିଜା ପ୍ରକ୍ରିୟାରେ ପରିବର୍ତ୍ତନ ଏବଂ ନୂଆ ବାଣିଜି୍ୟକ ଦୂତାବାସ ଖୋଲିବା ନେଇ ଘୋଷଣା କରିବାକୁ ଯାଉଛନ୍ତି। କୂଟନୈତିକ ସମ୍ପର୍କ ବୃଦ୍ଧି ଦିଗରେ ଏହା ଏକ ବଡ଼ ପଦକ୍ଷେପ। ଭାରତର ଆମେରିକାରେ ୫ଟି କନ୍ସୁଲେଟ ଥିବାବେଳେ ସିଟଲ୍ରେ ଆଉ ଏକ କନ୍ସୁଲେଟ୍ ଖୋଲିବାକୁ ଯାଉଛି। ସେହିପରି ଆମେରିକା ବେଙ୍ଗାଲୁରୁ ଏବଂ ଅହମଦାବାଦରେ ନୂଆ ବାଣିଜି୍ୟକ ଦୂତାବାସ ଖୋଲିବ। ନୂଆ ଭିଜା ନିୟମ ଦ୍ୱାରା ଭାରତୀୟମାନଙ୍କୁ ଆମେରିକାରେ ରହିବା ଓ କାମ କରିବାରେ ସହଜ ହେବ। ସେହିପରି ମୋଦିଙ୍କ ଆମନ୍ତ୍ରଣକ୍ରମେ ମାଇକ୍ରନ୍ ଟେକ୍ନୋଲୋଜି ଭାରତରେ ସେମିକଣ୍ଡକ୍ଟର ଉତ୍ପାଦନ କରିବାକୁ ଯାଉଛି।
