ଜେରୁଜେଲମ,୧୧।୧୦: ପାଲେଷ୍ଟାଇନ ଆତଙ୍କବାଦୀ ସଂଗଠନ ହମାସ ପକ୍ଷରୁ ଇସ୍ରାଏଲ ଉପରେ ଅତର୍କିତ ଭାବେ ଆକ୍ରମଣ କରାଯାଇଥିଲା। କେହି କିଛି ବୁଝିବା ପୂର୍ବରୁ ଗୋଟିଏ ପରେ ଗୋଟିଏ ରକେଟ ମାଡ଼ ହୋଇଥିଲା। ଚାରିଆଡେ ବୋମା ବିସ୍ଫୋରଣର ସ୍ବର ଭୟର ବାତାବରଣ ସୃଷ୍ଟି କରିଥିଲା। ଏଭଳି ସମୟରେ ଇସ୍ରାଏଲର ଜଣେ ମହିଳା ଘରକୁ ଘର ବୁଲି ଲୋକଙ୍କୁ ଡାକି ଅସ୍ତ୍ରଶସ୍ତ୍ର ଯୋଗାଡ କରିଥିଲେ। ବୋଧହୁଏ ସେ ପରବର୍ତ୍ତୀ ସମୟରେ କ’ଣ ହେବ ତାହା ଅନୁମାନ କରିନେଇଥିଲେ, ଯାହାକି ସମ୍ପୂର୍ଣ୍ଣ ଠିକ୍ ଥିଲା।
ଗାଜା ଷ୍ଟ୍ରିପ୍ ଅଞ୍ଚଳର କିିବବୁଟ୍ ନିର୍ ଏମ୍ ଗ୍ରାମକୁ ହମାସ ଆତଙ୍କବାଦୀମାନେ କ୍ଷତି ପହଞ୍ଚାଇପାରି ନ ଥିଲେ। କାରଣ ଗ୍ରାମରେ ପ୍ରବେଶ କରିବାକୁ ଚେଷ୍ଟା କରୁଥିବା ଆତଙ୍କବାଦୀମାନଙ୍କୁ ହତ୍ୟା କରାଯାଇଥିଲା। ଜଣେ ମହିଳାଙ୍କ ଉପସ୍ଥିତ ବୁଦ୍ଧି ଏବଂ କୌଶଳ ଯୋଗୁ ଏହା ହୋଇପାରିଥିଲା। ସେ ହେଲେ ଇନ୍ବିଲ୍ ରବିନ ଲିବରମ୍ୟାନ୍। ଇନ୍ବିଲ୍ ଅନ୍ୟ ଲୋକଙ୍କ ସହ ମିଶି ପ୍ରାୟ ୨୫ ଆତଙ୍କବାଦୀଙ୍କୁ ହତ୍ୟା କରିଥିଲେ। ଏବେ ସମଗ୍ର ଇସ୍ରାଏଲ ତାଙ୍କ ସାହସକୁ ପ୍ରଶଂସା କରୁଥିବା ଦେଖାଯାଇଛି।
ଅକ୍ଟୋବର ୭ ସକାଳେ ଇନ୍ବିଲ୍ ଇସ୍ରାଏଲ ଉପରେ ଆକ୍ରମଣ କରାଯାଇଥିବା ହୃଦୟଙ୍ଗମ କରିପାରିଥିଲେ। ଏଣୁ ତାଙ୍କ ଗାଁକୁ ଆତଙ୍କବାଦୀମାନେ ଟାର୍ଗେଟ କରିପାରନ୍ତି ବୋଲି ସେ ଭାବିଥିଲେ। ଏହାପରେ ସେ ଘରକୁ ଘର ଯିବା ସହ ବସ୍ତିର ଲୋକଙ୍କୁ ଏକଜୁଟ କରି ରାପିଡ ରେସ୍ପନ୍ସ ଟିମ୍ ପ୍ରସ୍ତୁତ କରି ପାଖରେ ଥିବା ଅସ୍ତ୍ରଶସ୍ତ୍ରକୁ ବିତରଣ କରିଥିଲେ। ଏପରିକି ଗାଁର ସୀମାରେଖା ଯିଏ ଡେଇଁବ ସେ ଫେରିବା ଉଚିତ ନୁହେଁ ବୋଲି ସମସ୍ତଙ୍କୁ କହି ମନୋବଳ ବଢ଼ାଇଥିଲେ।
ଏଭଳି ସ୍ଥିତିରେ ଯେତେବେଳେ ଆତଙ୍କବାଦୀମାନେ ସାଧାରଣ ନାଗରିକଙ୍କୁ ହତ୍ୟା କରିବା ଲାଗି ଗାଁ ଆଡକୁ ମୁହାଁଇଥିଲେ, ସେତେବେଳେ ଜବାବରେ ଉଭୟଙ୍କ ମଧ୍ୟରେ ଗୁଳି ବିନିମୟ ହୋଇଥିଲା। ଆତଙ୍କବାଦୀମାନେ ଏଥିଲାଗି ପ୍ରସ୍ତୁତ ନ ଥିଲେ। ତେଣୁ ସେମାନେ ଇନ୍ବିଲ୍ ଏବଂ ତାଙ୍କ ଟିମ୍କୁ ସାମ୍ନା କରିପାରି ନ ଥିଲେ। ସମସ୍ତଙ୍କୁ ଅତି ଚତୁରତାର ସହ ସେମାନେ ହତ୍ୟା କରିଥିଲେ। ପରେ ସେମାନଙ୍କ ଗଣନା କରାଯିବା ପରେ ମୃତ୍ୟୁବରଣ କରିଥିବା ଆତଙ୍କବାଦୀଙ୍କ ସଂଖ୍ୟା ୨୫ ଥିବା ଜଣାପଡ଼ିଥିଲା।
୨୫ ବର୍ଷୀୟ ଇନ୍ବିଲଙ୍କ ସାହସିକତାକୁ ନେଇ ଗାଜା ଷ୍ଟ୍ରିପ୍ର ଏକମାତ୍ର ଗାଁକୁ ହମାସ ଆତଙ୍କବାଦୀମାନେ କାବୁ କରିପାରି ନ ଥିଲେ। ତେବେ ଇନ୍ବିଲ ହେଉଛନ୍ତି କିବବୁଟ୍ ଗ୍ରାମର ସୁରକ୍ଷା ମୁଖ୍ୟ। ସେ ସାଧାରଣ ତଥା ଜରୁରୀକାଳୀନ ପରିସ୍ଥିତିରେ ଗ୍ରାମର ସୁରକ୍ଷା ଦାୟିତ୍ୱରେ ରହିଛନ୍ତି। ଦେଶର ଯୁଦ୍ଧର ପରିସ୍ଥିତିରେ ସେ ନିଜର ଗ୍ରାମବାସୀଙ୍କୁ ସୁରକ୍ଷା ଦେଇ ଏହି ଦାୟିତ୍ୱକୁ ସୂଚାରୁରୂପେ ତୁଲାଇଥିବା କୁହାଯାଉଛି।
ଆତଙ୍କବାଦୀଙ୍କ ହତ୍ୟା ପରେ ଆଇଡିଏଫ୍ ଟିମ୍ ଗ୍ରାମକୁ ଖାଲି କରାଯାଇଛି। ଏବେ ଇନ୍ବିଲ୍ ତେଲ ଅଭିବ୍ର ଏକ ହୋଟେଲରେ ଅଛନ୍ତି। ଅକ୍ଟୋବର ୯ରେ ସେ ନିଜର ଜନ୍ମଦିନ ପାଳନ କରିଛନ୍ତି। ତେବେ ତାଙ୍କର ସାହସିକତାକୁ ନେଇ ସେଠାକାର ମେୟର ଇନ୍ବିଲ୍ଙ୍କ ପ୍ରଶଂସା କରିବା ସହ ଦଶହଜାର ଲୋକଙ୍କ ଜୀବନ ରକ୍ଷା କରିଥିବାରୁ କୃତଜ୍ଞତା ଜଣାଇଛନ୍ତି। ଏହାଛଡ଼ା ଇସ୍ରାଏଲର ବୈଦେଶିକ ମନ୍ତ୍ରଣାଳୟ ପକ୍ଷରୁ ଇନ୍ବିଲଙ୍କ ପ୍ରଶଂସା ମଧ୍ୟ କରାଯାଇଛି।
