ତେହରାନ/ଜେରୁଜେଲମ୍,୫ା୧୦: ଇରାନ ପକ୍ଷରୁ ଇସ୍ରାଏଲ୍ ଉପରେ କରାଯାଇଥିବା ସଦ୍ୟ ମିଶାଇଲ ମାଡ଼କୁ ସୁପ୍ରିମ ଲିଡର ଆୟାତୋଲ୍ଲା ଅଲୀ ଖାମେନେଇ ପ୍ରଶଂସା କରିବା ସହ ଆବଶ୍ୟକ ପଡ଼ିଲେ ପୁଣି ଆକ୍ରମଣ କରାଯିବ ବୋଲି ଚେତାବନୀ ଦେଇଛନ୍ତି। ଏଥିସହ ଇରାନର ଜବାବରେ ଇସ୍ରାଏଲ୍ ଅସ୍ତିତ୍ୱ ହରାଇବ ବୋଲି ଧମକ ଦେଇଛନ୍ତି।
ଯୁଦ୍ଧକୁ ବର୍ଷେ ପୂରିବାକୁ ଯାଉଥିବାବେଳେ ହମାସ୍ ଓ ହୁଟି ଆତଙ୍କବାଦୀଙ୍କୁ ସମର୍ଥନ କରି ଆସୁଥିବା ଇରାନକୁ ଇସ୍ରାଏଲ୍ ଧମକ ଦେଇଆସୁଥିଲା। ଏଥିସହ ହେଜ୍ବୋଲ୍ଲା ମୁଖ୍ୟ ହସନ୍ ନସ୍ରଲ୍ଲାଙ୍କୁ ଇସ୍ରାଏଲୀ ଡିଫେନ୍ସ ଫୋର୍ସ (ଆଇଡିଏଫ୍) ଏୟାରଷ୍ଟ୍ରାଇକ୍ରେ ନିପାତ କରିଥିଲା। ଏହାର ଜବାବ ଦେବାକୁ ଯାଇ ଇରାନ ମଙ୍ଗଳବାର ଅନୂ୍ୟନ ୧୮୦ ମିଶାଇଲ ଇସ୍ରାଏଲ୍ ଉପରକୁ ଛାଡ଼ିଥିଲା, ଯହିଁରୁ ଅଧିକାଂଶ କ୍ଷେପଣାସ୍ତ୍ରକୁ ଆଇରନ୍ ଡୋମ୍ ଆୟତ୍ତ କରି ଖସାଇ ଦେଇଥିଲା। ଏହି ଆକ୍ରମଣ ପରେ ଇରାନ ଓ ଇସ୍ରାଏଲ୍ ମୁହଁାମୁହଁି ହୋଇଥିବାବେଳେ ମଧ୍ୟପ୍ରାଚ୍ୟରେ ଯୁଦ୍ଧ ଘନେଇବା ଆଶଙ୍କା ବଢ଼ିବାରେ ଲାଗିଛି। ଇସ୍ରାଏଲ୍ ଇରାନର ସୁପ୍ରିମ ଲିଡରଙ୍କୁ ହତ୍ୟା କରିବା ପାଇଁ ସୁଯୋଗ ଖୋଜୁଥିବାବେଳେ ଖାମେନେଇ ସୁରକ୍ଷିତ ସ୍ଥାନରେ ଆମତ୍ଗୋପନ କରିଥିଲେ। ଶୁକ୍ରବାର ନମାଜ ପାଠ ବେଳେ ଖାମେନେଇ ଲୋକଲୋଚନକୁ ଆସିଛନ୍ତି। ପ୍ରାୟ ୫ ବର୍ଷ ପରେ ପ୍ରଥମ ଥର ପାଇଁ ତେହରାନର ମୁଖ୍ୟ ପ୍ରାର୍ଥନା ସ୍ଥଳ ମୋସାଲ୍ଲା ମସ୍ଜିଦରେ ଅନେକ ଲକ୍ଷ ସମର୍ଥକଙ୍କୁ ସମ୍ବୋଧିତ କରି ଇସ୍ରାଏଲ୍ ଉପରେ ଇରାନ ସଶସ୍ତ୍ର ବଳର ମିଶାଇଲ ମାଡ଼କୁ ‘ଜନସାଧାରଣଙ୍କ ସେବା’ ଭାବେ ଅଭିହିତ କରିଛନ୍ତି। ୮୦ ବର୍ଷୀୟ ଖାମେନେଇ ନିଜ ୪୦ ମିନିଟ୍ର ଭାଷଣରେ କହିଛନ୍ତି, ୨୦୨୩ ଅକ୍ଟୋବର ୭ରେ ହମାସ୍ ପକ୍ଷରୁ ଦକ୍ଷିଣ ଇସ୍ରାଏଲ୍ ଉପରେ କରାଯାଇଥିବା ଆକ୍ରମଣ ପାଲେଷ୍ଟିନୀୟଙ୍କ ପକ୍ଷରୁ ଏକ ବୈଧ କାର୍ଯ୍ୟାନୁଷ୍ଠାନ ଥିଲା। ମଙ୍ଗଳବାର କରାଯାଇଥିବା ମିଶାଇଲ୍ ଆକ୍ରମଣ ଅନ୍ତର୍ଜାତୀୟ ଆଇନ, ଇରାନର ଆଇନ ଓ ଇସ୍ଲାମିକ୍ ଆସ୍ଥା ଆଧାରିତ। ଆଫଗାନିସ୍ତାନରୁ ୟେମେନ୍ ଏବଂ ଇରାନରୁ ଗାଜା ପର୍ଯ୍ୟନ୍ତ ରାଷ୍ଟ୍ର ଶତ୍ରୁ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ପ୍ରସ୍ତୁତ ହେବା ଉଚିତ ବୋଲି ଖାମେନେଇ ଆହ୍ବାନ ଦେବା ସହ ଏହି କାର୍ଯ୍ୟରେ ନିୟୋଜିତ ଥିବାବେଳେ ପ୍ରାଣ ହରାଇଥିବା ଲୋକଙ୍କୁ ପ୍ରଶଂସା କରିଛନ୍ତି। ଖାମେନେଇ ସମ୍ବୋଧିତ କରୁଥିବାବେଳେ ତାଙ୍କ ପାର୍ଶ୍ୱରେ ଏକ ବନ୍ଧୁକ ରଖାଯାଇଥିଲା। ହମାସ୍ କିମ୍ବା ହେଜ୍ବୋଲ୍ଲା ବିରୋଧରେ ଲଢ଼ି ଇସ୍ରାଏଲ୍ ତିଷ୍ଠିପାରିବ ନାହିଁ ବୋଲି ସେ କହୁଥିବାବେଳେ ଭିଡ଼ ଭିତରୁ ଧ୍ୱନି ଶୁଭୁଥିଲା, ‘ଆମେ ଆପଣଙ୍କ ସହିତ ଅଛୁ।’
ଯେ, ୨୦୨୦ରେ ଆମେରିକାର ଡ୍ରୋନ୍ ଆକ୍ରମଣରେ ବାଗ୍ଦାଦରେ ରିଭୋଲ୍ୟୁଶନାରି ଗାର୍ଡ ଜେନେରାଲ କାସିମ୍ ସୋଲେମାନି ନିହତ ହୋଇଥିଲେ। ଏହା ପରେ ଶୁକ୍ରବାର ପ୍ରାର୍ଥନା ସଭାରେ ସୁପ୍ରିମ ଲିଡରଙ୍କୁ ଶେଷଥର ପାଇଁ ଦେଖାଯାଇଥିଲା। ଖାମେନେଇଙ୍କ ସଦ୍ୟ ଆବିର୍ଭାବର କିଛି ସମୟ ପୂର୍ବରୁ ଉକ୍ତ ପ୍ରାର୍ଥନା ସଭାରେ ହେଜ୍ବୋଲ୍ଲାର ମୃତ ନେତା ନସ୍ରଲ୍ଲାଙ୍କ ସ୍ମୃତିଚାରଣ କରାଯାଇଥିଲା। ଇରାନ ରାଷ୍ଟ୍ରପତି ମାସୁଦ ପେଜେଶ୍କିଆନ୍ ଏବଂ ରିଭୋଲ୍ୟୁଶନାରି ଗାର୍ଡ ଜେନେରାଲମାନଙ୍କ ସମେତ ଅନେକ ଉଚ୍ଚପଦାଧିକାରୀ ଏଥିରେ ସାମିଲ ହୋଇଥିଲେ। ଇତିମଧ୍ୟରେ ଇରାନ ବହିର୍ବ୍ୟାପାର ମନ୍ତ୍ରୀ ଅବ୍ବାସ ଆରାଘ୍ଚି ଲେବାନନ୍ର ବେରୁଟରେ ପହଞ୍ଚତ୍ ଇସ୍ରାଏଲ୍ ବିରୋଧରେ ହେଜ୍ବୋଲ୍ଲା ଓ ଲେବାନନୀ ସୈନ୍ୟଙ୍କ ସଂଘର୍ଷ ସମ୍ପର୍କରେ ଆଲୋଚନା କରିଛନ୍ତି। ଲେବାନନ୍କୁ ଇରାନ ୧୦ ଟନ୍ ଖାଦ୍ୟ ଓ ଔଷଧ ସହ ବିପୁଳ ସାମଗ୍ରୀ ପଠାଇଥିବା ଜଣାପଡ଼ିଛି।
