ରାୟପୁର,୨୬।୮: ଛତିଶଗଡ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। କୋର୍ଟ କହିଛନ୍ତି ଯେ, ସ୍ବାମୀ ସ୍ତ୍ରୀଙ୍କ ଇଛା ବିରୋଧରେ ଶାରୀରିକ ସମ୍ପର୍କ ସ୍ଥାପନ କଲେ ଏହାକୁ ବଳାତ୍କାର କୁହାଯିବ ନାହିଁ। ଏକ ମାମଲାର ଶୁଣାଣି ସମୟରେ ସ୍ବାମୀଙ୍କୁ ବଳାତ୍କାର ଅଭିଯୋଗରୁ ମୁକ୍ତ କରିଛନ୍ତି। ହାଇକୋର୍ଟ ତାଙ୍କ ରାୟରେ କହିଛନ୍ତି ଯେ, ଭାରତୀୟ ଆଇନ ଅନ୍ତର୍ଗତ ସ୍ତ୍ରୀଙ୍କ ସହ ଶାରୀରିକ ସମ୍ପର୍କ ସ୍ଥାପନ କରିବା କ୍ଷେତ୍ରରେ ଇଛା ଅବା ଇଛା ବିରୋଧକୁ ଗ୍ରହଣ କରାଯାଇ ପାରିବ ନାହିଁ। ଏହା ବଳାତ୍କାର ଅନ୍ତର୍ଭୁକ୍ତ ନୁହେଁ।
ବୈବାହିକ ଜୀବନରେ ବଳାତ୍କାର ସମ୍ପର୍କରେ ଦିଲ୍ଲୀ ହାଇକୋର୍ଟରେ ମଧ୍ୟ ଏକ ମାମଲା ଆସିଥିଲା। ଏହି ସମୟରେ କେନ୍ଦ୍ର ସରକାରଙ୍କ ପକ୍ଷରୁ କୁହାଯାଇଥିଲା ଯେ, ବୈବାହିକ ଜୀବନରେ ଶାରୀରିକ ସମ୍ପର୍କକୁ ବଳାତ୍କାର ଅପରାଧ ବର୍ଗରେ ସାମିଲ କରାଯାଇ ପାରିବ ନାହିଁ। ସରଳ ଭାବରେ କହିବାକୁ ଗଲେ, ବୈବାହିକ ଜୀବନରେ ବଳାତ୍କାର ମଧ୍ୟ ପାରିବାରିକ ହିଂସାର ଏକ ବିକୃତ ରୂପ। ଏଥିରେ ସ୍ତ୍ରୀଙ୍କ ସହମତି ବିନା ଶାରୀରିକ ସମ୍ପର୍କ କରିବାକୁ ବାଧ୍ୟ କରାଯାଇଥାଏ। କିନ୍ତୁ ଏହା ସମ୍ପର୍କରେ ଭାରତୀୟ ଦଣ୍ଡ ସଂହିତାରେ ସମ୍ପୂର୍ଣ୍ଣ ରୂପେ ବ୍ୟାଖ୍ୟା କରାଯାଇ ନାହିଁ । ବଳାତ୍କାର ଭଳି ଅପରାଧ ପାଇଁ ଆଇପିସିରେ ଧାରା ୩୭୬ ପ୍ରଣିତ କରାଯାଇଛି। ଆଇପିସିର ଏହି ଧାରା ଅନୁଯାୟୀ ସ୍ତ୍ରୀଙ୍କ ବୟସ ୧୨ ବର୍ଷରୁ କମ ହେଲେ ସ୍ବାମୀଙ୍କ ତାଙ୍କୁ ଜୋରିମାନା କିମ୍ବା ଅନ୍ୟ ଦଣ୍ଡବିଧାନ କରାଯାଇ ପାରିବ ବୋଲି କୋର୍ଟ କହିଛନ୍ତି। ଏହା ଅନ୍ତର୍ଗତ ସ୍ବାମୀଙ୍କୁ ଜରିମାନା ସହିତ ୨ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡାଦେଶର ବ୍ୟବସ୍ଥା ରହିଛି। ହାଇକୋର୍ଟ ରାୟ ଦେଇଥିବା ମାମଲାରେ ଅଭିଯୋଗକାରିଣୀ ଆଇନଗତ ଭାବରେ ଅଭିଯୁକ୍ତଙ୍କୁ ବିବାହ କରିଛନ୍ତି। କୋର୍ଟ କହିଛନ୍ତି ସ୍ତ୍ରୀଙ୍କ ବୟସ ୧୮ ବର୍ଷରୁ କମ ନ ଥିବାରୁ ଏହା ବଳାତ୍କାର ନୁହେଁ। ଏହି ମାମଲାରେ ଅଭିଯୁକ୍ତ ବୈବାହିକ ବଳାତ୍କାର ଅଭିଯୋଗରୁ ନିର୍ଦ୍ଦୋଷରେ ଖଲାସ ହୋଇଥିଲେ ମଧ୍ୟ ଏହା ଅସ୍ବାଭାବିକ ଯୌନ ସମ୍ପର୍କ ଅଭିଯୋଗରେ ଆଇପିସି ଧାରା ଅଧୀନରେ ଏବେ କୋର୍ଟରେ ହାଜର ହେବେ।
