ତେହରାନ,୧୨ା୭:ରୁଷିଆ-ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ଥମିବାର ନାଁ ନେଉନି। ଏହି ସମୟରେ ଇରାନ ରୁଷିଆକୁ ଡ୍ରୋନ୍ ଯୋଗାଇବାକୁ ନିଷ୍ପତ୍ତି ନେଇଛି। ରୁଷିଆ ଏହି ଡ୍ରୋନ୍ଗୁଡ଼ିକୁ ୟୁକ୍ରେନ୍ ବିରୋଧରେ ଯୁଦ୍ଧ ପାଇଁ ବ୍ୟବହାର କରିବ। ଆମେରିକାର ଜଣେ ଅଧିକାରୀ କହିଛନ୍ତି, ୟୁକ୍ରେନ ଯୁଦ୍ଧ ପାଇଁ ଇରାନ ରୁଷିଆକୁ ସମ୍ଭାବ୍ୟ ଶହ ଶହ ଡ୍ରୋନ୍ ବିତରଣ କରିବାକୁ ଯୋଜନା କରୁଛି। ଏହି ଡ୍ରୋନ୍ ମଧ୍ୟରୁ କେତେକ ଯୁଦ୍ଧ କରିବାର କ୍ଷମତା ମଧ୍ୟ ରହିଛି।
ହ୍ବାଇଟ୍ ହାଉସର ଜାତୀୟ ସୁରକ୍ଷା ପରାମର୍ଶଦାତା ଜେକେ ସଲିଭାନ କହିଛନ୍ତି, ଇରାନ ଡ୍ରୋନ୍ ବ୍ୟବହାର ପାଇଁ ରୁଷିଆ ସୈନ୍ୟମାନଙ୍କୁ ତାଲିମ ଦେବା ପାଇଁ ପ୍ରସ୍ତୁତ ହେଉଛି। ୟୁକ୍ରେନ ଆମେରିକାକୁ ନିବେଦନ କରିଥିଲା ଏହାର ଯୁଦ୍ଧ ପ୍ରୟାସରେ ହଜାର ହଜାର ଡ୍ରୋନ୍ ଯୋଗାଣ କରୁ। ସଲିଭାନ କହିଛନ୍ତି, ଆମେରିକା ଦ୍ୱାରା ପ୍ରଦାନ କରାଯାଇଥିବା ଗୁପ୍ତଚର ଏହାକୁ ସମର୍ଥନ କରୁଛି।
ସେ ଏହା ମଧ୍ୟ କହିଛନ୍ତି ଯେ, ସାଉଦିଆରବ ଉପରେ ଆକ୍ରମଣ କରିବା ପାଇଁ ୟେମେନର ବିଦ୍ରୋହୀମାନେ ଇରାନ ଡ୍ରୋନ ବ୍ୟବହାର କରିଥିଲେ। ଏକ ମାସ ପୂର୍ବରୁ ଇରାନର ସୈନ୍ୟବାହିନୀ ଏହାର ଶକ୍ତି ଦେଖାଇବା ପାଇଁ କ୍ଷେପଣାସ୍ତ୍ର ସହିତ ସଜ୍ଜିତ ଡ୍ରୋନର ଏକ ଫଟୋ ଛାଡ଼ିଥିଲେ। କେବଳ ଏତିକି ନୁହେଁ, ଇରାନର ରାଷ୍ଟ୍ରାୟତ୍ତ ଟିଭି ଚ୍ୟାନେଲ ମଧ୍ୟ ତେହେରାନ ନିକଟରେ ବିଶ୍ୱର ସବୁଠାରୁ ମାରାତ୍ମକ ଡ୍ରୋନ୍ ଥିବା କହିଛି। ଏହି ଡ୍ରୋନଗୁଡ଼ିକୁ ଏକ ଗୁପ୍ତଚର ଆଧାରରେ ରଖାଯାଇଛି।
ଯଦିଓ ଏହାର ଅବସ୍ଥାନ କେଉଁଠାରେ ଅଛି, କେହି ଜାଣନ୍ତି ନାହିଁ ତଥାପି ଏହି ବେସ୍ କେର୍ମନଶାହ ସହରଠାରୁ ୪୦ ମିନିଟ୍ ଦୂରରେ ରହିପାରେ। ୧୯୮୦ରେ ଇରାନ ଡ୍ରୋନ୍ ତିଆରି କରିବା ଆରମ୍ଭ କଲା। ଏହି ସମୟରେ ଇରାନ ଏବଂ ଇରାକ ମଧ୍ୟରେ ଯୁଦ୍ଧ ହୋଇଥିଲା।
