ନୂଆଦିଲ୍ଲୀ, ୭।୨:ଭାରତ ଭଳି ୩୩ଟି ଦେଶର ପର୍ଯ୍ୟଟକଙ୍କ ପାଇଁ ଭିଜାମୁକ୍ତ ସୁବିଧା ଆରମ୍ଭ କରିଛନ୍ତି ଇରାନ ସରକାର। ଭାରତରେ ଥିବା ଇରାନର ଦୂତାବାସ ଏନେଇ ଆଧିକାରିକ ସୂଚନା ଦେଇଛନ୍ତି । ସର୍ତ୍ତମୂଳକ ଭାବେ ୧୫ ଦିନ ପର୍ଯ୍ୟନ୍ତ ଭାରତ ସମେତ ୩୩ଟି ଦେଶର ପର୍ଯ୍ୟଟକ ବିନା ଭିଜାର ଇରାନରେ ରହିପାରିବେ। ଏହି ସୁବିଧା ପାଇବା ପାଇଁ କିଛି ସର୍ତ୍ତ ଜାରି କରିଛନ୍ତି ଇରାନ ସରକାର। ଏଥିପାଇଁ ପର୍ଯ୍ୟଟକମାନଙ୍କୁ କେବଳ ବିମାନ ଯୋଗେ ଇରାନ ଗସ୍ତ କରିବାକୁ ପଡ଼ିବ। ଆଣବିକ କାର୍ଯ୍ୟକ୍ରମ ବନ୍ଦ କରୁ ନ ଥିବାରୁ ବିଭିନ୍ନ ପଶ୍ଚିମ ଦେଶ ପକ୍ଷରୁ ଇରାନ ଉପରେ ଅନେକ ପ୍ରତିବନ୍ଧକ ଲଗାଯାଇଛି। ତେଣୁ ଅର୍ଥନୈତିକ ଭାବେ ଦେବାଳିଆ ହୋଇ ପଡ଼ିଥିବା ଇରାନ କିଛି ଦେଶ ପାଇଁ ଭିଜା ମୁକ୍ତ ନିଷ୍ପତ୍ତି ନେଇ ନିଜ ପର୍ଯ୍ୟଟନ ଶିଳ୍ପକୁ ସୁଦୃଢ କରି ଦେଶର ଅର୍ଥନୀତିରେ ସୁଧାର ଆଣିବା ପାଇଁ ଲକ୍ଷ୍ୟ ରଖିଛି।
