ନୂଆଦିଲ୍ଲୀ,୧୭।୨: ଇଣ୍ଡିଆନ୍ ପ୍ରିମିୟର ଲିଗ(ଆଇପିଏଲ୍)ର ୧୬ ତମ ସିଜନ ପାଇଁ ବିସିସିଆଇ ସମ୍ପୂର୍ଣ୍ଣ କାର୍ଯ୍ୟସୂଚୀ ଘୋଷଣା କରିଛି। ଚଳିତ ବର୍ଷ ମାର୍ଚ୍ଚ ୩୧ରୁ ଆଇପିଏଲ୍ ଆରମ୍ଭ ହେବ। ଟୁର୍ନାମେଣ୍ଟରେ ମୋଟ ୭୦ ଲିଗ୍ ମ୍ୟାଚ ଖେଳାଯିବାକୁ ଥିବା ବେଳେ ମେ’ ୨୧ ଯାଏ ଗ୍ରୁପ୍ ଷ୍ଟେଜ୍ ମ୍ୟାଚ୍ ଅନୁଷ୍ଠିତ ହେବ। ମେ’ ୨୮ରେ ଫାଇନାଲ ଖେଳାଯିବ।
ଏଥର ଆଇପିଏଲରେ ଓପନିଂ ମ୍ୟାଚ୍ ହାର୍ଦ୍ଦିକ ପାଣ୍ଡ୍ୟାଙ୍କ ଗୁଜୁରାଟ ଟାଇଟନ୍ସ(ଜିଟି) ଏବଂ ମହେନ୍ଦ୍ର ସିଂ ଧୋନିଙ୍କ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ସହିତ ହେବ। ଏହି ଉଦ୍ଘାଟନୀ ମ୍ୟାଚ ଅହମ୍ମଦାବାଦରେ ଖେଳାଯିବ।
ଟୁର୍ନାମେଣ୍ଟରେ ୧୦ ଦଳ ମଧ୍ୟରେ ମୋଟ ୭୦ ଲିଗ୍ ମ୍ୟାଚ୍ ଖେଳାଯିବ। ଏଥିରେ ପ୍ରଶଂସକମାନେ ୧୮ ଡବଲ ହେଡର୍ ଦେଖିବାକୁ ପାଇବେ। ଡବଲ ହେଡର୍ ଅର୍ଥାତ ଗୋଟିଏ ଦିନରେ ଦୁଇଟି ମ୍ୟାଚ ଖେଳାଯିବ। ସା ମ୍ୟାଚ୍ ୭.୩୦ ରୁ ଖେଳାଯିବ, ଅପରାହ୍ନ ମ୍ୟାଚ ଅପରାହ୍ନ ୩.୩୦ ରୁ ଖେଳାଯିବ।
ଆଇପିଏଲ୍ର ସମସ୍ତ ୧୦ ଟିମ୍କୁ ଦୁଇଟି ଗ୍ରୁପ୍ରେ ବିଭକ୍ତ କରାଯାଇଛି। ପ୍ରତ୍ୟେକ ଦଳ ଗ୍ରୁପ ପର୍ଯ୍ୟାୟରେ ୧୪-୧୪ ମ୍ୟାଚ ଖେଳିବେ। ଏହି ସମୟ ମଧ୍ୟରେ ପ୍ରତ୍ୟେକ ଦଳ ନିଜ ଘରୋଇ ମଇଦାନରେ ୭ ଟି ମ୍ୟାଚ ଖେଳିବାକୁ ଥିବାବେଳେ ବାକି ୭ ଟି ମ୍ୟାଚ ବିରୋଧୀ ଦଳଙ୍କ ମଇଦାନରେ ଖେଳିବାକୁ ପଡିବ।
ଆଇପିଏଲ୍ ୨୦୨୩ର ଗ୍ରୁପ୍:
ଗ୍ରୁପ-ଏ: ମୁମ୍ବାଇ ଇଣ୍ଡିଆନ୍ସ, କୋଲକାତା ନାଇଟ ରାଇଡର୍ସ, ରାଜସ୍ଥାନ ରୟାଲ୍ସ, ଦିଲ୍ଲୀ ରାଜଧାନୀ, ଲକ୍ଷ୍ନୌ ସୁପର ଜିଆଣ୍ଟସ
ଗ୍ରୁପ-ବି: ଚେନ୍ନାଇ ସୁପର କିଙ୍ଗ୍ସ, ପଞ୍ଜାବ କିଙ୍ଗ୍ସ, ସନରାଇଜର୍ସ ହାଇଦ୍ରାବାଦ, ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର, ଗୁଜୁରାଟ ଟାଇଟାନ୍ସ
ମୋଟ ୧୨ ସ୍ଥାନରେ ଆଇପିଏଲ୍ ୨୦୨୩ ଖେଳାଯିବ। ଏଥର ଗୁଆହାଟି, ଧର୍ମଶାଳାରେ ମଧ୍ୟ ଆଇପିଏଲ୍ ମ୍ୟାଚ ଆୟୋଜନ କରିବାର ସୁଯୋଗ ପାଇଛନ୍ତି। ଏହାଛଡ଼ା ଅହମ୍ମଦାବାଦ, ମୋହାଲି, ଲକ୍ଷ୍ନୌ, ହାଇଦ୍ରାବାଦ, ବାଙ୍ଗାଲୋର, ଚେନ୍ନାଇ, ଦିଲ୍ଲୀ, କୋଲକାତା, ଜୟପୁର, ମୁମ୍ବାଇ ଷ୍ଟାଡିୟମରେ ଖେଳାଯିବ।
