ଝାରସୁଗୁଡା/ବ୍ରଜରାଜନଗର, ୨୫।୫(ଆଶିଷ ରଞ୍ଜନ ଦାଶ/ବିଜୟ ବରା ): ଝାରସୁଗୁଡ଼ା ଜିଲା ପୋଲିସକୁ ମିଳିଛି ଏକ ବଡ଼ ସଫଳତା। ଚଳିତ ଆଇପିଏଲ ୨୦୨୬ ମ୍ୟାଚଗୁଡ଼ିକରେ ବେଆଇନ ଅନଲାଇନ କ୍ରିକେଟ ଜୁଆ ଖେଳାଉଥିବା ଏକ ବଡ଼ ସଂଗଠିତ ବେଟିଂ ର଼୍ୟାକେଟ୍ର ପର୍ଦ୍ଦାଫାଶ କରିଛି ପୋଲିସ। ବ୍ରଜରାଜନଗର ଥାନା ଅଞ୍ଚଳରେ ଚାଲିଥିବା ଏହି ହାଇଟେକ ନେଟୱର୍କ ଉପରେ ଚଢ଼ାଉ କରି ପୋଲିସ ୮ ଜଣ ଅଭିଯୁକ୍ତଙ୍କୁ ଗିରଫ କରିବା ସହ ବିପୁଳ ପରିମାଣର ସାମଗ୍ରୀ ଜବତ କରିଛି। ଏ ନେଇ ବ୍ରଜରାଜନଗର ଥାନାରେ କେସ ନମ୍ବର ୧୧୯/୨୬ ରେ ମାମଲା ରୁଜୁ କରାଯାଇଛି।ଗିରଫ ହୋଇଥିବା ବ୍ୟକ୍ତିମାନେ ହେଲେ ଝାରସୁଗୁଡା ବ୍ରଜରାଜନଗରର ଗୋବିନ୍ଦ ଦାସ ମହାନ୍ତ, ଆକାଶ ଶ୍ରୀ ବାସ୍ତବ(୨୫), ବିଶାଳ କୁମାର ରବି(୨୭),ମନୁ ସିଂ (୨୫), ଶଙ୍କର ପ୍ରସାଦ ରାମ (୩୫), ରାଜୀବ କୁମାର(୧୯),ଝାରସୁଗୁଡା ବମ୍ବେ ଛକର ଭୀମ କୁମାର ରାମ(୩୫),ସୁନ୍ଦରଗଡ଼ ରାଜଗାଙ୍ଗପୁର ରାହୁଲ ସାହୁ ।
ବିଶ୍ୱସ୍ତ ସୂତ୍ରରୁ ସୂଚନା ପାଇ ଝାରସୁଗୁଡ଼ା ପୋଲିସର ଏକ ସ୍ବତନ୍ତ୍ର ଟିମ ବ୍ରଜରାଜନଗର ଅଞ୍ଚଳର ଏକାଧିକ ସ୍ଥାନରେ ଏକକାଳୀନ ଚଢ଼ାଉ କରିଥିଲା। ଅଭିଯୁକ୍ତମାନେ ବ୍ରଜରାଜନଗରରେ ଭଡ଼ା ଘର ନେଇ ଡିଜିଟାଲ ପ୍ଲାଟଫର୍ମ ଏବଂ ମୋବାଇଲ ଆପ୍ଲିକେଶନ ଜରିଆରେ ଏହି ସିଣ୍ଡିକେଟ ଚଲାଉଥିଲେ। ସେମାନେ ଲାପଟପ, ସ୍ମାର୍ଟଫୋନ ଏବଂ ଅନଲାଇନ ଆପ ବ୍ୟବହାର କରି ସିଧାସଳଖ ଲାଇଭ ମ୍ୟାଚ ଟ୍ରେଣ୍ଡ ଏବଂ ଜନସାଧାରଣଙ୍କ ବେଟିଂ ସେଣ୍ଟିମେଣ୍ଟ ଉପରେ ନଜର ରଖୁଥିଲେ ଏବଂ କମିଶନ ଭିତ୍ତିରେ ଏହି ବେଆଇନ କାରବାର କରୁଥିଲେ।ଚଢ଼ାଉ ସମୟରେ ପୋଲିସ ଘଟଣାସ୍ଥଳରୁ ବହୁ ଗୁରୁତ୍ୱପୂର୍ଣ୍ଣ ପ୍ରମାଣ ସହ
୫ ଲକ୍ଷ ୯ ହଜାର ୧ଶହ ଟଙ୍କା, ୪୧ଟି ସ୍ମାର୍ଟଫୋନ, ୨ଟି ଲ୍ୟାପଟପ, ବହୁ ସଂଖ୍ୟାରେ ସିମ କାର୍ଡ, ଡିଜିଟାଲ ବେଟିଂ ଖାତା,
ଗୋଟିଏ ଇନୋଭା କ୍ରିଷ୍ଟା କାର ଏବଂ ଗୋଟିଏ ମାରୁତି ବାଲେନୋ କାର ଜବତ କରାଯାଇଛି । ପୋଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ଏହି ର଼୍ୟାକେଟର ଚେର ଓଡ଼ିଶା ବାହାରକୁ ମଧ୍ୟ ଲମ୍ବିଛି। ଏହାର ଆନ୍ତଃରାଜ୍ୟ ଆର୍ଥିକ କାରବାର ଏବଂ ଉପରସ୍ତରର ମାଷ୍ଟରମାଇଣ୍ଡମାନଙ୍କ ସହ ସମ୍ପର୍କ ରହିଛି। ସାଧାରଣ ଲୋକଙ୍କୁ ସହଜରେ ଏବଂ କମ ସମୟରେ ଅଧିକ ଟଙ୍କା ରୋଜଗାର କରିବାର ପ୍ରଲୋଭନ ଦେଖାଇ ଏମାନେ ଜୁଆ ଖେଳରେ ବୁଡ଼ାଇ ରଖୁଥିଲେ, ଯାହାଦ୍ୱାରା ଅନେକ ପରିବାର ଆର୍ଥିକ ସଙ୍କଟର ସମ୍ମୁଖୀନ ହେଉଥିଲେ। ଝାରସୁଗୁଡ଼ା ପୋଲିସ ତୁରନ୍ତ ଏହାର ଆର୍ଥିକ କାରବାରର ଅନୁସନ୍ଧାନ କରି ବିଭିନ୍ନ ବ୍ୟାଙ୍କ ଆକାଉଣ୍ଟ ରେ ଥିବା ୩.୭ ଲକ୍ଷ ଟଙ୍କାକୁ ଫ୍ରିଜ କରିଦିଆଯାଇଛି।