ହାଇଦ୍ରାବାଦ,୧୮।୩: ଇଣ୍ଡିଆନ ପ୍ରିମିୟର ଲିଗ୍ (IPL) ୨୦୨୬ ସିଜନ ଆରମ୍ଭ ପୂର୍ବରୁ ସନରାଇଜର୍ସ ହାଇଦ୍ରାବାଦ (SRH) ଏକ ବଡ଼ ଘୋଷଣା କରିଛି। ଦଳର ନିୟମିତ ଅଧିନାୟକ ପ୍ୟାଟ୍ କମିନ୍ସ ଆହତ କାରଣରୁ ପ୍ରାରମ୍ଭିକ କିଛି ମ୍ୟାଚ୍ରୁ ବାଦ୍ ପଡ଼ିଥିବାରୁ, ତାଙ୍କ ସ୍ଥାନରେ ବିସ୍ଫୋରକ ବ୍ୟାଟର ଇଶାନ କିଷାନଙ୍କୁ ଦଳର କାମଚଳା ଅଧିନାୟକ ଭାବେ ନିଯୁକ୍ତ କରାଯାଇଛି। ଏଥିସହିତ ଓପନର ଅଭିଷେକ ଶର୍ମାଙ୍କୁ ଉପ-ଅଧିନାୟକ ଦାୟିତ୍ୱ ମିଳିଛି।
୨୦୨୫-୨୬ ଆଶେସ୍ ସିରିଜ୍ ସମୟରେ କମିନ୍ସଙ୍କ ପିଠିର ନିମ୍ନ ଭାଗରେ ଯନ୍ତ୍ରଣା ହୋଇଥିଲା। ଏହି କାରଣରୁ ସେ ଦୀର୍ଘ ସମୟ ଧରି କ୍ରିକେଟ୍ ପଡ଼ିଆରୁ ଦୂରେଇ ରହିଛନ୍ତି। ସେ ଟୁର୍ଣ୍ଣାମେଣ୍ଟର ଶେଷ ଭାଗରେ ଦଳ ସହ ଯୋଡ଼ି ହେବେ ବୋଲି ଆଶା କରାଯାଉଛି।
କିଛି ସମୟ ପୂର୍ବରୁ ଭାରତୀୟ ଦଳରୁ ବାଦ୍ ପଡ଼ିଥିବା ଇଶାନ କିଷାନଙ୍କ ପାଇଁ ଏହି ଦାୟିତ୍ୱ ଏକ ବଡ଼ ସଫଳତା। ତାଙ୍କ ନେତୃତ୍ୱରେ ଝାଡ଼ଖଣ୍ଡ ଗତବର୍ଷ ପ୍ରଥମ ଥର ପାଇଁ ସୟଦ ମୁସ୍ତାକ ଅଲି ଟ୍ରଫି ଜିତିଥିଲା। ସେହି ଟୁର୍ଣ୍ଣାମେଣ୍ଟରେ ସେ ୧୯୭ ଷ୍ଟ୍ରାଇକ୍ ରେଟ୍ରେ ୫୧୭ ରନ୍ ସଂଗ୍ରହ କରି ଶୀର୍ଷ ସ୍କୋରର ହୋଇଥିଲେ।
ଗତ T20 ବିଶ୍ୱକପ୍ ୨୦୨୬ରେ ଈଶାନ (୧୯୩ ଷ୍ଟ୍ରାଇକ୍ ରେଟ୍)ରେ ୩୧୭ ରନ୍ କରିଥିଲେ। ବିଶ୍ୱକପ୍ ଫାଇନାଲ ନ୍ୟୁଜିଲ୍ୟାଣ୍ଡ ବିପକ୍ଷରେ ୫୪ ରନ୍ର ଦ୍ରୁତ ପାଳି ଖେଳିଥିଲେ। ଏହା ପୂର୍ବରୁ ଘରୋଇ କ୍ରିକେଟ ସୟଦ ମୁସ୍ତାକ ଅଲି ଫାଇନାଲରେ ୪୯ ବଲ୍ରୁ ଶତକ ହାସଲ କରିଥିଲେ।
ସନରାଇଜର୍ସ ହାଇଦ୍ରାବାଦରେ ଏହା ଇଶାନଙ୍କର ମାତ୍ର ଦ୍ୱିତୀୟ ସିଜନ ହୋଇଥିଲେ ମଧ୍ୟ ତାଙ୍କର ନେତୃତ୍ୱ ନେବାର କ୍ଷମତା ଏବଂ ବର୍ତ୍ତମାନର ଫର୍ମକୁ ଦୃଷ୍ଟିରେ ରଖି ଫ୍ରାଞ୍ଚାଇଜ୍ ତାଙ୍କ ଉପରେ ଭରସା ପ୍ରକଟ କରିଛି।
