ଚେନ୍ନାଇ,୧୨।୪: ଶନିବାର ଚେନ୍ନାଇର ଏମ୍.ଏ. ଚିଦାମ୍ବରମ ଷ୍ଟାଡିୟମ୍ରେ ଖେଳାଯାଇଥିବା ଆଇପିଏଲ୍ ୨୦୨୬ର ୧୮ତମ ମ୍ୟାଚ୍ରେ ଚେନ୍ନାଇ ସୁପର କିଙ୍ଗସ (CSK) ଘରୋଇ ଗ୍ରାଉଣ୍ଡରେ ଦିଲ୍ଲୀ କ୍ୟାପିଟାଲ୍ସ (DC) କୁ ୨୩ ରନ୍ରେ ପରାସ୍ତ କରିଛି। ଏହି ବିଜୟ ସହିତ ଚେନ୍ନାଇ ଚଳିତ ସିଜନରେ ନିଜର ପ୍ରଥମ ବିଜୟ ପଞ୍ଜିକରଣ କରିଛି। ସଞ୍ଜୁ ସାମସନଙ୍କ ଧୂଆଁଧାର ଶତକ ଏବଂ ଜେମି ଓଭରଟନଙ୍କ ଘାତକ ବୋଲିଂ ଚେନ୍ନାଇ ବିଜୟର ମୁଖ୍ୟ କାରଣ ସାଜିଥିଲା। ତେବେ ଦିଲ୍ଲୀ ଇନିଂସର ୧୯ତମ ଓଭରରେ ଫୋର୍ଥ ଅମ୍ପାୟାରଙ୍କ ଏକ ନିଷ୍ପତ୍ତି ସମସ୍ତଙ୍କୁ ଚକିତ କରିଦେଇଛି, ଯାହାକୁ ନେଇ ବିବାଦ ଦେଖାଦେଇଛି।
ଟସ ହାରି ପ୍ରଥମେ ବ୍ୟାଟିଂ କରିଥିବା ଚେନ୍ନାଇ ସୁପର କିଙ୍ଗସ ନିର୍ଦ୍ଧାରିତ ୨୦ ଓଭରରେ ମାତ୍ର ୨ଟି ଉଇକେଟ ହରାଇ ୨୧୨ ରନ୍ର ଏକ ବିଶାଳ ସ୍କୋର ଛିଡ଼ା କରିଥିଲା। ଚେନ୍ନାଇ ପକ୍ଷରୁ ଓପନର୍ ସଞ୍ଜୁ ସାମସନ ମାତ୍ର ୫୬ଟି ବଲ୍ରୁ ଅପରାଜିତ ୧୧୫ ରନ୍ର ଏକ ବିସ୍ଫୋରକ ଇନିଂସ ଖେଳିଥିଲେ। ତାଙ୍କର ଏହି ଶତକୀୟ ଇନିଂସରେ ୧୫ଟି ଚୌକା ଏବଂ ୪ଟି ଛକା ସାମିଲ ଥିଲା।
୨୧୩ ରନ୍ର ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ଦିଲ୍ଲୀ କ୍ୟାପିଟାଲ୍ସର ଆରମ୍ଭ ଭଲ ଥିଲେ ମଧ୍ୟ ଚେନ୍ନାଇର ବୋଲିଂ ଆଗରେ ସେମାନେ ନିୟମିତ ବ୍ୟବଧାନରେ ଉଇକେଟ ହରାଇଥିଲେ। ଦିଲ୍ଲୀ ପକ୍ଷରୁ ଟ୍ରିଷ୍ଟନ ଷ୍ଟବ୍ସ ୬୦ ରନ (୩୮ ବଲ) କରି ଏକାକୀ ସଂଘର୍ଷ କରିଥିଲେ, କିନ୍ତୁ ଅନ୍ୟ କୌଣସି ବ୍ୟାଟର ତାଙ୍କୁ ସାଥ ଦେଇ ନ ଥିଲେ। ପୂର ଦଳ ୨୦ ଓଭରରେ ୧୮୯ ରନ୍ କରିପାରିଥିଲା। ଚେନ୍ନାଇ ପକ୍ଷରୁ ଜେମି ଓଭରଟନ ଚମତ୍କାର ବୋଲିଂ କରି ୪ଟି ଉଇକେଟ ନେଇ ଦିଲ୍ଲୀର ବ୍ୟାଟିଂ ମେରୁଦଣ୍ଡ ଭାଙ୍ଗି ଦେଇଥିଲେ।
ଏସବୁ ମଧ୍ୟରେ ମ୍ୟାଚ୍ର ୧୯ତମ ଓଭରରେ ଏକ ଅଭାବନୀୟ ଘଟଣା ଘଟିଥିଲା, ଯାହା ମ୍ୟାଚ୍ର ମୋଡ଼ ବଦଳାଇ ଦେଇଥିଲା। ଦିଲ୍ଲୀର ବ୍ୟାଟର ଟ୍ରିଷ୍ଟନ ଷ୍ଟବ୍ସ ଅତ୍ୟଧିକ ଝାଳ ଯୋଗୁ ନିଜର ଗ୍ଲୋଭସ (Gloves) ବଦଳାଇବାକୁ ଚାହିଁଥିଲେ। ସେ ନୂଆ ଗ୍ଲୋଭସ୍ ପାଇଁ ଡ୍ରେସିଂ ରୁମ ଆଡ଼କୁ ଇଙ୍ଗିତ କରିଥିଲେ। କିନ୍ତୁ ପଡ଼ିଆରେ ଥିବା ଫୋର୍ଥ ଅମ୍ପାୟାର ତାଙ୍କୁ ଓଭର ମଝିରେ ଗ୍ଲୋଭସ ବଦଳାଇବାକୁ ଅନୁମତି ଦେଇ ନ ଥିଲେ।
ଷ୍ଟବ୍ସ ପୁରୁଣା ଗ୍ଲୋଭସ ପିନ୍ଧି ହିଁ ଖେଳିବାକୁ ବାଧ୍ୟ ହୋଇଥିଲେ ଏବଂ ସେହି ଓଭରରେ ହିଁ ଏକ କ୍ୟାଚ୍ ଆଉଟ ହୋଇଥିଲେ। ଏହି ଘଟଣା ସମୟରେ ଦିଲ୍ଲୀର ଖେଳାଳି ଏବଂ କୋଚ୍ମାନେ ଅମ୍ପାୟାରଙ୍କ ସହ ଯୁକ୍ତିତର୍କ କରୁଥିବା ମଧ୍ୟ ଦେଖିବାକୁ ମିଳିଥିଲା। ଷ୍ଟବ୍ସ ଆଉଟ ପରେ ଦିଲ୍ଲୀର ବିଜୟ ଆଶା ସମ୍ପୂର୍ଣ୍ଣ ଭାବେ ଧୂଳିସାତ ହୋଇଯାଇଥିଲା।
ତେବେ କ୍ରିକେଟ ନିୟମ ଅନୁଯାୟୀ, ଜାରି ରହିଥିବା ଏକ ଓଭର ମଝିରେ ଖେଳାଳିମାନେ ଗ୍ଲୋଭସ ବଦଳାଇ ପାରିବେ ନାହିଁ। ଓଭର ଶେଷ ହେବା ପରେ ହିଁ ଗ୍ଲୋଭସ ବଦଳାଯାଇପାରିବ। ହେଲେ, ଯଦି ଗ୍ଲୋଭସ ଫାଟିଯାଇଥାଏ କିମ୍ବା ନଷ୍ଟ ହୋଇଯାଇଥାଏ, ତେବେ ଫୋର୍ଥ ଅମ୍ପାୟାରଙ୍କ ଅନୁମତି କ୍ରମେ ଓଭର ମଝିରେ ବି ତାହା ବଦଳାଯାଇପାରେ। କିନ୍ତୁ କେବଳ ଝାଳ ଯୋଗୁଁ ଗ୍ଲୋଭସ ବଦଳାଇବାକୁ ନିୟମରେ ଅନୁମତି ନାହିଁ।
